1 KORINTUS 15 - Kitta' Passitallikang Bau KAREBA BAJI'

Attallasa'na muliang Almase 15:1-11

¹ Na konni-konnina, Urang siana', nakke a'ra'a appiu'rangi mange ri kaui ri Injili kupappissekang injo mange ri kaui na numutarima injo, na kau a'jari ammenteng ka'jang battu ri injo.

² Patteteang ri Injili injomo kau ripakasalama', assimpole numaeng kupappissekang injo mange ri kaui, assala'na jarre'ko a'bitantang ri ia, passangadinna ampa tide' jua mattu-matummu a'jari tappa'.

³ Saba' nusanna' parallu maeng kupabattu mange ri kaui, iamo intu apa numaeng injo todo' kutarima, iamo intu ma'nassana Almase maeng mate kanara kadorakaanta, assituru' lalang ri Kitta' Tangkasa,

⁴ ma'nassana Ia maemmu riloangang, na ma'nassana Ia maemmu attallasa muliang, ri allo makatalluna, assituru' lalang ri Kitta' Tangkasa;

⁵ ma'nassana Ia maeng lapappijanjangammu kalenNa mange ri Kefas na maeng injo mange ri sampuloiya rua suro-suroNa.

⁶ Rimaenna injo Ia lapappijanjangang kalenNa mange rila'bi limambilangang urang siana'; loheang battu ri iyai injo attallasa juapai sa'genna allo inni, mingka rie' tommo sikura tau ri iyai injo matemu.

⁷ Maeng injo Ia lapappijanjangang kalenNa mange ri Yakobus, maeng injo mange risikonjo suro.

⁸ Nukaminang kala'busang battu ri iangase'na injo Ia lapappijanjangang todo' kalenNa mae ri nakke, assimpole mange ri ana' lahere gele injopa larapi' hattunna.

⁹ Saba' nakkemo tukaminang tuna battu risikonjo suro-suro, la'bipa pole gelei siratang riare' suro-suro, saba' nakkemo maeng ma'ri'-ma'risi jamaah Allataala.

¹⁰ Mingka kanara pangamaseang Allataala nakke injo appaanteekamua nakke rikonni-konnina, na pangamaseang nulapassareang injo Allataala mae ri nakke gele nutide' matu-matunna. Sibale'na, nakke la'bi terasa anjama battu ri iyai ngase'; mingka gele sangga nakke, passangadinna pangamaseanna Allataala numinahang injo ri nakke.

¹¹ Injomo saba'na, baji' nakke, iyareka iyai, appakonjomu kambe ngajara na appakonjomu kau a'jari tappa'.

Attallasa'ta muliang 15:12-34

¹² Jari, ampa ripappiissekangi ma'nassana Almase maemmu attallasa battu ri kamateang, anteekamua lama'ring rie' ri kau tuappau ma'nassana gele rie' tau mate attallasa muliang?

¹³ So'di injo gele rie' tau mate attallasa muliang, injo Almase gele todo'i attallasa muliang.

¹⁴ So'di injo Almase gelei attallasa muliang, injo tide' jua matu-matunna kambe appala'bang Injili na tide' todo' matu-matunna katappakammu.

¹⁵ La'bipa pole battu ri injo, kambe a'bura-bura mange ri Allataala, kanara passala ri Ia kambe tapaui ma'nassana Ia maeng lapakaattallasa muliang Almase – padahala Ia gelejuai lapakaattallasa muliang Almase, so'di injo toje'i ma'nassana tau mate inni gelei laripakaattallasa muliang.

¹⁶ Saba' ampa toje'i tau mate inni gele laripakaattallasa muliang, injo Almase gele todo'i ripakaattallasa muliang.

¹⁷ Ampa Almase gelei ripakaattallasa muliang, injo tide'mo matu-matunna katappakammu na tallasi juapako lalang rikadorakaammu.

¹⁸ Ri appakonjona mate ngase' todo'i sikuanna tau mate lalang ri Almase.

¹⁹ Ampa ditte lalang ritallasa inni jua annanro pattajalliang mange ri Almase, injo dittemo tau kaminang silaka battu risikuanna rupatau.

²⁰ Mingka nutoje' iamo intu ma'nassana Almase maeng ripakaattallasaimu muliang battu rikamateang, assimpole tulihua battu risikuanna tau maeng mate.

²¹ Saba' assimpole kamateang rie'i kanara se're rupatau, appakonjo todo'i attallasa'na muliang tau mate inni rie'i kanara se're rupatau.

²² Saba' assimpole sikuanna tau mate lalang ri passamaturukanna ri Adam, appakonjo todo'i sikuanna tau laripakaattallasai muliang lalang ripassamaturukanna ri Almase.

²³ Mingka sikonjo assituru' rurunganna: Almase assimpole hassele lihua; maeng injo iyai tua'jari anunNa rihattu pariekanNa.

²⁴ Maeng injo larapi'mu kala'busanna, iamo intu ampa Ia lapassareang Pakkaraengang mange ri Allataala Amma, rimaennamo Ia lapakamate sikonjo pamarentaang, kakahasaang surang kagassingang.

²⁵ Saba' Ia parallu laneteng pamarentaang assimpole Karaeng sa'genna Allataala lataro ngase' sikonjo balinNa rahangang bangkenNa.

²⁶ Bali nukaminang kala'busang, laripakatunru' iamo intu kamateang.

²⁷ Saba' iangase'na maemmu lapakatunru' Allataala rirahangang bangkenNa. Mingka ampa ripaui ma'nassana ”iangase'na maeng ripatunru'mu”, jari toje'mu ma'nassana Ia to'jua maeng lapatunru'i iangase'na rirahangang bangkenna Almase injo gelei antama' bageang ri injo.

²⁸ Mingka ampa iangase'na maeng ripatunru'mu rirahanganna Almase, injo Ia to'jua assimpole Ana' lalapakatunru' kalenNa rirahanganna Allataala, tumaeng appakatunru' injo iangase'na ri rahanganNa, solanna Allataala a'jari risikuanna na lalang risikuanna.

²⁹ Ampa gelei appakonjo, apamo matu-matunna panggeokang tau ririo injo ri tau mate? Ampa tau mate injo gelejuai ripakaattallasa, ngura iyai ririo ri tau maeng mate?

³⁰ Na kambe todo' – ngura kambe a'hattu-hattui taerang kalemba antama' rikasilakaang?

³¹ Urang siana', allo-alloi nakke anrumpa' kamateang. Passabakang bakka'na sumanga'ku ri kau lalang ri Isa Almase, Karaengta, nakke appau ma'nassana toje'i passala inni.

³² Ampa sangga assituru' timbangang rupatau jua nakke maeng a'laga assimpole tua'bali binantang boang ri Efesus, apamo matu-matunna passala injo ri nakke? Ampa tau mate inni gelei ripakaatttallasa muliang, injo ”maemoko langanre surang langinungki, saba' mintara lamateki.”

³³ Akolalo lingui: Pa'bahaang gele intu baji' laappakadaa kabiasaang nubaji'.

³⁴ Ngu'rangi baji'laloko na ako anggeokang kadorakaang muliang! Rie' ri kau tugele laisse' Allataala. Kupau passala inni, solanna appisa'ring siri' ngasekiko.

Batangkale attallasa'na muliang 15:35-58

³⁵ Mingka ma'ringi rie' tau akkuta'nang, ”Anteekamua tau mate inni ripakaattallasa muliang? Surangang ri batangkale apamo iyai larie' muliang?”

³⁶ Oe tau ba'ga! Apa numaeng mutahuru, gelei laattimbo surang attallasa, ampa gelei la'bi riolo mate.

³⁷ Na numutahuru injo gele batanna lamung-lamung injo laattimbo, mingka lisere'na nutide' injo balullanna, pakkalebarang lisere bae gandong iyareka lisere maraeng.

³⁸ Mingka Allataala assare mange ri ia se're batangkale, assimpole nulakaa'raki injo Allataala: Ia assare mange ritasse're-se're lisere batangkalenna to'jua.

³⁹ Gelejua assi binantang intu assimpole ngase'i: Assi rupatau ini maraengi battu ri assi binantang, maraengi battu ri assi jangang-jangang, maraengi battu ri assi juku'.

⁴⁰ Rie' batangkale alusu na rie' todo' batangkale kasara, mingka kala'birang batangkale alusu injo maraengi battu rikala'biranna batangkale kasara.

⁴¹ Kala'birang matanna allo maraengi battu rikala'birang bulang, na kala'birang bulang maraengi battu rikala'birang sikonjo bintoeng, na kala'birang sikonjo bintoeng maraengi battu rikala'birang bintoeng maraeng.

⁴² Appakonjo todo'i passala'na attallasa'na muliang tau maeng mate inni. Batangkale ripatahuru injo lalang rikapanrakaang, ripakaattallasa lalang rinugele injo lapanra'.

⁴³ Nuripatahuru lalang rinudaa ripakaattallasa lalang rikala'birang. Nuripatahuru injo lalang rikalammaang, ripakaattallasa lalang ri kagassingang.

⁴⁴ Nuripatahuru injo lalang ri batangkale kasara, ripakaattallasa lalang ri batangkale alusu. Ampa rie' batangkale kasara, injo rie' todo' batangkale alusu.

⁴⁵ Assimpole rie' ta'ukiri: Rupatau makase're injo, Adam a'jari mahallo' attallasa, mingka Adam kala'busang injo a'jari nyaha nuappakaattallasa injo.

⁴⁶ Mingka nupakaramula injo rie' gele nualusu, mingka nukasara; maeng injo ampamo rie' nualusu injo.

⁴⁷ Rupatau pakaramula injo assala'na nubattu ri limpurang tana na assipa' rupatau kasarai, rupatau makarua injo assala'na battu ri suruga.

⁴⁸ Sikonjo mahallo' kasara assimpolei ia nuassala'na battu ri limpurang tana na sikonjo mahallo' suruga assimpolei Ia nuassala'na battu ri suruga.

⁴⁹ Assimpole ditte maeng makemuki tappa battu rinukasara, appakonjo todo'i ditte lamake tappa battu ri suruga.

⁵⁰ Urang siana', iamo inni a'ra' kupau mange ri kaui, iamo intu ma'nassana assi na rara gele rie' harisi'na ri Pakkaraengang Allataala na ma'nassana nulapanra' inni tide' kaharisanna rinugele injo lapanra'.

⁵¹ Sitoje'na nakke appisa'bi mange ri kaui se're harasia: Ditte geleki lapanra' ngase', mingka ditte ngase' laripinra,

⁵² lalang risipappikkaang mata jua, rihattu ammonina timboe' kala'busang na sikuanna tau mate laripakaattallasa muliang lalang rikatallasang nugelemo lapanra' na ditte ngase' laripinra.

⁵³ Saba' tubu panra' injo parallui make tubu nugele akkulle lapanra', na nuakkulle inni lamate parallui make tubu nugele akkulle lamate.

⁵⁴ Sungka'i nuakkulle inni panra' make tubu nugele akkulle panra' surang nuakkulle inni mate make tubu nugele akkulle mate, injo laripa'rupamu pau nurie' injo ta'ukiri: ”Kamateang maemmu ritallangang lalang rikagassingang.

⁵⁵ Oe kamateang ri antee mae pambetaammu? Oe kamateang ri antee mae ti'jo'mu?”

⁵⁶ Ti'jo' kamateang iamo intu kadorakaang na kahasa kadorakaang iamo intu hukkung Tora'.

⁵⁷ Mingka sukkuru mange ri Allataala, tumaeng assare mae ri ditte pambeta patteteang ri Isa Almase, Karaengta.

⁵⁸ Injomo saba'na, Urang siana' mala'biriku, ammenteng ka'jangiko, akolalo bata-bata, na gassingko lalang rijama-jamaang Karaeng! Saba' muisse'mu ma'nassana lalang ripassamaturukang surangang Karaeng karesomu lohe matu-matunna.