1 KORINTUS 12 - Kitta' Passitallikang Bau KAREBA BAJI'

Lohe rupanna barakka', mingka se're jua Nyaha Allataala 12:1-11

¹ Konni-konnina passala barakka' ri Nyaha Allataala. Kukaa'raki, Urang siana', solanna muisse'i katojekanna.

² Muisse'mu ma'nassana rihattummu juapa gele muisse' Allataala, kau gelei muisse'kale rierang mange risikonjo barahala pepe injo.

³ Injomo saba'na, nakke laappakajarre' ri kau ma'nassana gele rie' manna se're tau appau-pau kanara Nyaha Allataala, akkulle appau, ”Laallelalo pua Isa!” na gele rie' manna se're tau ampa tide' Nyaha Tangkasa akkulle ngaku: ”Isa injo Karaeng.”

⁴ Lohe rupanna barakka', mingka se're jua Nyaha.

⁵ Lohe rupanna panjampangi, mingka se're jua Karaeng.

⁶ Lohe pole rupanna panggeokang mara'-maraeng, mingka Allataala jua lajama ngase'i lalang risikuanna tau.

⁷ Mange ritase're-se're tau risarei panjanjang Nyaha Allataala rikaparalluanta ngase'.

⁸ Saba' mange rise're tau, Nyaha Allataala assare barakka' laappau surangang kasara'dekang, na mange ri tau maraeng Nyaha Allataala assimpole assare dalle' laappau lalang pangisse'.

⁹ Mange rise're tau, Nyaha Allataala assimpole assare katappakang, na mange ri tumaraeng Ia assare dalle' laappakamole garring-garring.

¹⁰ Mange rise're tau, Nyaha Allataala assare kahasa laappaa'jari nugele samara, na mange ri tumaraeng Ia assare barakka' panjanjang, na mange ri tumaraeng pole Ia assare barakka' laappassisa'la' lohe rupanna nyaha. Mange rise're tau Ia assare barakka' laappau-pau lalang ribisara mara'-maraeng, na mange ri tau maraeng Ia assare barakka' laambattuangi pau ribisara mara'-maraeng injo.

¹¹ Mingka iangase'na inni rijamai ri nuse're Nyaha Allataala na nuassimpole, nuassare barakka' attantu mange risikuanna tau, assimpole nulakaa'raki Nyaha injo.

Lohe bageang, mingka se're batangkale 12:12-31

¹² Saba' assimpole batangkale injo se're na lohe bage'-bageanna, na iangase' bageanna batangkale injo, manna lohei, injo se'rei batangkale, appakonjo todo'i Almase.

¹³ Saba' ditte ngase' lalangki rise're Nyaha, baji' injo tau Yahudi, iyareka tau Yunani, baji' injo ata, iyareka tau laloasa, maeng ririo ngase'mu a'jari se're tubu na ditte ngase' inni risare ere inung battu rise're Nyaha.

¹⁴ Saba' batangkale injo gele se're jua rupanna, mingka lohe bageanna.

¹⁵ So'di injo bangkeng appau, ”Saba' nakke gelea lima, nakke gelea antama' batangkale,” jari toje'i ia gelei antama' batangkale?

¹⁶ So'di injo toli appau, ”Saba' nakke gelea mata, nakke gelea antama' batangkale”, jari toje'i ia gelei antama' batangkale?

¹⁷ So'di batangkale injo iangase'na sanging mata, ri antee mae pallangngere injo? So'di iangase'na sanging toli, ri antee mae pangara' injo?

¹⁸ Mingka Allataala maeng assare mange risikonjo bageang ri batangkale para rijamaanna, se're tampa' ri batangkale, assimpole nulakaa'raki injo Allataala.

¹⁹ So'di injo ngase'ia sirupa jua, ri antee mae batangkale injo?

²⁰ Toje'i rie' lohe rupanna bageang, mingka se're jua batangkale.

²¹ Jari, mata gelei akkulle appau mange ri lima, ”Nakke tide' paralluku ri kau.” Appakonjo todo'i ulu gelei akkulle appau mange ri bangkeng, ”Nakke tide' paralluku ri kau.”

²² La'bipa pole sikonjo bageang ri batangkale nukajanjangang injo kaminang lamma, iamo kaminang riparalluang.

²³ Mange risikonjo bageang ri batangkalenta nuassituru' panjanjanta kaminang tuna, injo risarei kala'birang, na mange risikonjo bageang batangkalenta nugele injo ripappijanjangang, injo sarro ripariatina.

²⁴ Passala injo gelei parallu risikonjo bageang batangkalenta nuakkulle injo ripappijanjangang. Allataala maengi laatoro baji' batangkalenta, sa'genna mange risikonjo bageang batangkale nugele injo la'biri risarei kala'birang,

²⁵ solanna andai a'jari pa'beserang lalang ri batangkalenta, mingka solanna sikonjo bageang batangkale gele injo assimpole assipariati ngase'i.

²⁶ Injomo saba'na, ampa rie' se're bageang assinsara, iangase'na bageang minahang assinsara; ampa rie' se're bageang ripakala'biri, injo sibatu batangkale minahang a'rannu-rannu.

²⁷ Kau ngase' intu batangkalenna Almase na kau ngase' intu bageanna.

²⁸ Allataala maeng lapattantumu sikura lohena tau lalang ri jamaah: Makase're laa'jari suro, makarua laa'jari nabbi, makatallu laa'jari tulangajara. Sitarrusu'na iyai tunguppa injo barakka' laappaa'jari nugele samara, laappakagassing tugarring-garring, laanjampangi, laa'jari ponggaha, na laappau-pau lalang lohe rupanna bisara.

²⁹ Apa iyai injo suro-suro ngase'i, iyareka nabbi, iyareka langajara? Apa iyai ngase' injo nguppa barakka' laappaa'jari nugele samara,

³⁰ iyareka laappakagassing tugarring-garring, iyareka laa'bisara lalang lohe rupanna bisara, iyareka laambattuangi pau ribisara mara'-maraeng?

³¹ Jari, apparri-parrilaloko languppa barakka' nula'bi parallu. Mingka, nakke kupappijanjangangi mange ri kaui pa'lalangang nukaminang baji'.