1 KORINTUS 11 - Kitta' Passitallikang Bau KAREBA BAJI'

¹ Pinahangi panggeokangku, assimpole todo' nakke minahang ri panggeokanna Almase.

Belo-belo ri ulu bahine 11:2-16

² Nakke appakala'biri ri kau, saba' lalang risikuanna kau tulusu ngu'rangi ri nakke na a'bitantang jarre' riajarang kupabattu injo mange ri kaui.

³ Mingka kukaa'raki, solanna muisseki passala inni, iamo intu Ulu battu risikuanna bura'ne iamo intu Almase, ulu risikuanna bahine iamo intu bura'ne na Ulu battu ri Almase iamo intu Allataala.

⁴ Sikonjo bura'ne ngera dowaang iyareka tuassare injo panjanjang surangang labohongi ulunna, injo latua-tuai ulunna.

⁵ Mingka sikonjo bahine ngera dowaang iyareka tuassare panjanjang surangang gele labohongi ulunna injo latua-tuai ulunna, saba' ia assimpolei bahine lagomisi injo uhu'na.

⁶ Saba' ampa bahine inni gele a'ra' labohongi ulunna, injo ia parallui lagomosi uhu'na. Mingka ampa mange ri bahine injo se'rei nudaa ma'nassana ri pappa' iyareka rigomisi uhu'na, injo parallui labohongi ulunna.

⁷ Saba' bura'ne inni gelejuai parallu labohongi ulunna: Ia appakaassaui ja'bangang na kala'birang Allataala. Mingka bahine inni appakaassaui kala'birang bura'ne.

⁸ Saba' bura'ne inni assala'na gele nubattu ri bahine, mingka bahine inni assala'na nubattu ri bura'ne.

⁹ Rie' pole, bura'ne inni gele ripaa'jari kanara bahine, mingka bahine inni ripaa'jari kanara bura'ne.

¹⁰ Injomo saba'na, bahine inni parallui make tanra kala'birang ri ulunna rikanara sikonjo malaeka'.

¹¹ Manna appakonjo, lalang ri Karaeng Isa tide' bahine ampa tide' bura'ne na tide' bura'ne ampa tide' bahine.

¹² Saba' assimpole bahine inni assala'na nubattu ri bura'ne, appakonjo todo'i bura'ne inni rianakangi battu ri bahine; na iangase'na assala'na nubattu ri Allataala.

¹³ Kaui tommo timbang-timbangi: Siratangika bahine inni ngera dowaang mange ri Allataala ampa gele labohongi ulunna?

¹⁴ Gelejua alang inni lapappiissekangi mange ri kaui ma'nassana iamo nudaa mange ri bura'ne, ampa ia lambere uhu'na,

¹⁵ mingka ma'nassana iamo kala'birang mange ri bahine inni, ampa lambere uhu'na? Saba' uhu' risareangi mange ri bahine inni laa'jari bohong.

¹⁶ Mingka ampa rie' tau a'ra' lagagai, kambe iyareka sikonjo jamaah ri Allataala gele rie' kabiasaang appakonjo.

Kabiasaang daa lalang ri Panganreang Karaeng 11:17-34

¹⁷ Lalang ripassala inni, nakke gelea akkulle appakala'biri ri kau, saba' pa'rappungammu gele appabattu kabajikang, mingka appa'rie'i nudaa.

¹⁸ Saba' ripakaramulana kulangngere ma'nassana ampa a'rappungiko assimpole jamaah, rie' passisala pahangang ri kau, na passala injo so'di lohena kukatappaki.

¹⁹ Saba' ri kau parallui rie' passisalapahangang, solanna kaissekangi sallo' inai ri kau attahang lalang ripasso'ri.

²⁰ Ampa asse're-se'reiko, geleko asse're-se'rei langanre ri Panganreang Karaeng.

²¹ Saba' ripanganreang injo sikuanna tau kanrena to'jua lakanre la'bi riolo, jari rie' tau pa're na tau maraeng injo bengo.

²² Apa tide' sapo kale-kalemu langanre surang langinung? Iyareka apa a'ra'ko attua-tua jamaah Allataala surang laappakasiri' ri tau tide' injo apa-apanna? Apa nuparallu lakupau mange ri kaui? Appakala'biri ri kau? Lalang ri passala inni nakke gelea appakala'biri.

²³ Saba' apa numaeng kutarrusang mange ri kaui, maeng kutarimai battu ri Karaeng Isa, iamo intu ma'nassana Karaeng Isa, ribangngi hattunna Ia laripassareang, ngalle roti

²⁴ na maeng injo Ia lapamasa barakkakangi roti injo; Ia latu'be-tu'bei na appaui, ”Iamo inni batangkalengKu, nuripassareang mange ri kaui; geokangi inni laa'jari pappiu'rangi mae ri Nakke!”

²⁵ Appakonjo todo'i Ia ngalle santeng, rimaenna nganre, ampai appau, ”Santeng inni iamo intu se're passitallikang bau nurisegele surangang raraKu; geokangi inni, ampa muinungi, injo a'jari pappiu'rangi mae ri Nakke!”

²⁶ Saba' ampa nganreiko roti surang nginungiko ri santeng inni, injo mupappissekammu kamamteanna Karaeng sa'genna Ia rie' pole.

²⁷ Jari, inai jua lalang ta'ra gele siratang langanre roti iyareka langinung ri santenna Karaeng Isa, ia dorakai mange ri tubuna surang ri nyahona Karaeng Isa.

²⁸ Injomo saba'na, parallui sikuanna tau laparessa kalenna riolo na maeng injo ampamu nganre roti surang nginung battu ri santeng injo.

²⁹ Saba' inai nganre surang nginung manna gele laakui tubuna Karaeng, ia appabattui hukkungang mange ri kalenna.

³⁰ Injomo saba'na lohe ri kaui tulamma surang tugarring, na gele siso'di' tumate.

³¹ Ampa ditte riparessai riolo kalenta, hukkungang injo gelei tattaba mae ri ditte.

³² Mingka ampa ditte nguppa hukkungang battu ri Karaeng, injo riajaraki, solanta geleki rihukkung assurangang lino inni.

³³ Injomo saba'na, Urang siana'ku, ampa asse're-se'reiko langanre, parralluko assitajangi.

³⁴ Ampa rie' tau pa're, baji'mu ia nganre riolo ri saponna, solanna andako asse're-se'rei larihukkung. Sikonjo passala maraeng lakuatoroi, ampa rie'a.