1 KORINTUS 10 - Kitta' Passitallikang Bau KAREBA BAJI'

Israele a'jari se're pappiu'rangi 10:1–11:1

¹ Kukaa'raki, solanna muisse', Urang siana' ma'nassana puwa-puwata ngase' rie'i rahangang ripattila'langang rammang na iyai ngase' maemmu allimbangi tamparang.

² Laa'jari papinahang ri Musa iyai ngase' maemmu ririo lalang ri rammang surang lalang ri tamparang.

³ Iyai ngase' maengi nganre kanreang nyaha alusu assimpole

⁴ na iyai ngase' maengi nginung inungang nyaha alusu nuassimpole, saba' iyai nginungi battu ri batu alasa nyaha alusu tuminahang injo ri iyai, na batu alasa injo iamo intu Almase.

⁵ Manna injo Allataala gelei angngai mange risibageang bakka' battu ri iyai, saba' iyai ripakamate ri parang luara.

⁶ Iangase'na inni maeng kajariammu assimpole se're pakkalebarang laappiu'rangi mae ri ditte, solanna andai rikaa'raki passala sipa' daa injo assimpole numaeng injo lageokangi,

⁷ na solanna gele ditte a'jari pasomba-somba barahala, assimpole sikura tau ri iyai, assimpole rie' ta'ukiri: ”Attolongimu tau lohe injo langanre surang langinung; maeng injo ammentengimu na a'rannu-rannui.”

⁸ Andaki anggeokang kabalerang, assimpole nulageokang injo lohe tau ri iyai, sa'genna rie' se're hattu matemu ruampulo tallunsabu tau.

⁹ Anda ditte assare passo'ri ri Almase, assimpole nulageokang rilohe tau ri iyai, sa'genna mateimu latotto saa.

¹⁰ Na andalaloki a'husa-husa, assimpole nulageokang rilohe tau ri iyai, sa'genna iyai ripakamate ri malaeka' kamateang.

¹¹ Iangse'na inni maeng tattabamu ri iyai assimpole pakkalebarang na riukirii laa'jari pappiu'rangi mae ri ditte tuattallasa injo rijammang kala'busang inni.

¹² Injomo saba'na, inai larapangi ma'nassana ia sa'ga'i ammenteng, parallui tutu bisannabali ia andai a'dappe'!

¹³ Passo'ri numuppai injo iamo intu passo'ri samara nugele alla'bi battu ri kagassingang rupatau. Saba' Allataala mallang na kanara injomo Ia geleiko lalappasangi riso'ri alla'bi rikagassingammu. Rihattummu riso'ri Ia laassare pikkirang pansulukang mange ri kaui, jari akkullei mutanggong.

¹⁴ Injomo saba'na, Urang siana' mala'biriku, kadereilalo tunyomba injo barahala!

¹⁵ Nakke a'bisara mange ri kaui assimpole tau sara'deki injo. Kaui tommo mutimbang-timbangi numaeng injo kupau!

¹⁶ Gelejua santeng pamasa barakkakang injo, nurikanaranamo ditte appanai' sukkuru, iamo passe'reang surangang rarana Almase? Gelejua roti ritu'be-tu'be injo iamo passe'reang surangang batangkalenna Almase?

¹⁷ Saba' roti injo nuse're jua, jari ditte, manna injo loheki, se're juaki batangkale, saba' ditte ngase' nguppa dahuang ri roti se're injo.

¹⁸ Pariatilalo bangsa Israele kasara inni: Gelejua iyai tunganre injo numaeng ri passidakkaang nguppai dahuang lalang ripanjampangi mejang panaroang koro'bang?

¹⁹ Apamo kukuangang ripappauku injo? Ma'nassana assi binantang nuripassidakkaang injo ri barahala se'rei passala? Iyareka ma'nassana barahala injo se'rei passala?

²⁰ Gele! Apa kukuangang iamo intu ma'nassana passidakkanai injo passidakka mange ri setang, gele mange ri Allataala. La'bipa pole nakke gelei kukaa'raki ma'nassana kau assamaturu' surangang setang injo.

²¹ Geleiko akkulle nginung ri santeng Karaeng ampa nginung todo'ko ri santeng setang injo. Geleiko akkulle ngalle dahuang lalang ripanganreang Karaeng ampa ngalle todo'ko dahuang lalang ripanganreang setang injo.

²² Iyareka apa ditte a'ra' appakarie' panyannunganna Karaeng? Apa ditte la'bi gassingang battu ri Ia?

²³ ”Sikuanna ripakkulleangi.” Nabai, mingka gele iangase'na rie' matu-matunna. ”Sikuanna ripakkulleangi.” Nabai, mingka gele iangase'na laambajiki.

²⁴ Andalalo rie' manna se're tau a'boja passahalang ri kalenna to'jua, mingka parallui tasse're-se're tau a'boja passahalang tujunna tau maraeng.

²⁵ Kau akkullei mukanre sikuanna assi binantang nuribalukang injo ri pasara, manna gele riparessa passabakang ripappisangka ri ati alusu.

²⁶ Saba: ”Lino surang assinna injo anunna Allataala.”

²⁷ Ampa rikeokiko langanre rise're tau gele injo tappa', na mutarimai pakkeo' injo, kanrelalo nulapappatalaang injo ri kau, manna gele muparessa kanara pappisangka ri ati alusu.

²⁸ Mingka ampa rie' se're tau appau mange ri kau, ”Intu passidakka barahala!” akolalo kanrei, passabakang rie'na tuappau passala injo mange ri kau na kanara pappisangka ri ati alusu.

²⁹ Nukukuangang injo surangang pappisangka ri ati alusu gele sangga pappisangka ri ati alusu'mu to'jua, mingka pappisangka ri ati alusu'na tau maraeng. Ma'ringi rie' tau appau, ”Ngura kalaloasaangku parallu ritantuang ri ati alusu'na tau maraeng?

³⁰ Ampa nakke appanai' sukkuru riapa jua numinahang injo kukanre, ngura tau maraeng assalla rikanara kanre injo, nu ri injomo nakke appanai' sukkuru?”

³¹ Injomo saba'na, baji' kau tunganre iyareka tunginung intu, iyareka anggeokang se're passala maraeng, geokang ngase'i injo rikanara kala'biranna Allataala.

³² Akolalo paa'jari tau maraeng intu tatto'ro, baji' injo tau Yahudi iyareka tau Yunani, iyareka jamaah Allataala.

³³ Assimpole todo' nakke apparri-parri appakasannang risikuanna tau lalang risikuanna passala, gele rikaparalluangku to'jua, mingka kaparalluang ri tau lohe, solanna iyai ripakasalama'.