1 KORINTUS 1 - Kitta' Passitallikang Bau KAREBA BAJI'

Barasallang 1:1-3

¹ Battu ri Paulus, turia'ra'na Allataala rikeo'i a'jari suro ri Isa Almase, surang battu ri Sostenes, urang siana' julu katappakanta,

² mange ri jamaah Allataala ri Korintus, iamo intu iyai turitangkasi injo lalang ri Isa Almase na rikeo'i a'jari tau tangkasa, surangang iangase'na tau risikonjo tampa', tutappa' injo mange ri arenna Karaengta Isa Almase, iamo intu Karaeng ri iyai surang Karaengta.

³ Barakka' na dame salehangang battu ri Allataala, Ammanta, na battu ri Karaeng Isa Almase minahang ri kaui.

Pau appanai' sukkuru 1:4-9

⁴ Nakke tulusu appanai' sukkuru ri Allataalaku kanara kaui saba' barakka' Allataala nulapassareang injo ri kaui lalang ri Isa Almase.

⁵ Saba' ri Iamo kaui maeng a'jari kalumannyang lalang risikuanna passala: Battu risikonjo rupanna pau-pau surang risikonjo rupanna pangisse',

⁶ assituru' ripassa'bi ri Almase, numaeng ripakajarre' ri kau.

⁷ Appakonjomu injo kaui gele kakurangang risikuanna pangamaseang rihattu mutajanginna lapappijanjangang kalenna Karaengta Isa Almase.

⁸ Ia todo' lapakajarre'ko sa'genna mange riallo kala'busang, jari gelemo rie' daamu rihattunna Karaengta Isa Almase,

⁹ Allataala, tuakkeo' injo ri kaui mange ripassamaturukang surangang Ana'Na Isa Almase, Karaengta, injo mallangi.

Pa'beserang ritangnga-tangnga ri jamaah 1:10-17

¹⁰ Mingka nakke appiu'rangi ri kaui urang siana', saba' arenna Karaengta Isa Almase, solanna a'julu pauiko surang anda rie' pa'beserang ri kaui, mingka sibale'na solanna jarrekiko ripasse're-se'reang na a'julu ati surang pikkirang.

¹¹ Saba', urang siana'ku, nakke maeng ripiissekianga ri tau battu injo ribija-bijanna Kloe ripassala'mu ma'nassana rie' pa'beserang ri kaui.

¹² Nukukuangang injo iamo intu, ma'nassana kau ngase' tungka'-tungka' appau: Nakke battu risossoranna Paulus. Iyareka nakke battu risossoranna Apolos. Iyareka nakke battu risossoranna Kefas. Iyareka nakke battu risossoranna Almase.

¹³ Apa injo Almase ta'bage-bagei? Apa injo Paulus risalli' kanara kau? Iyareka apa injo kau ririo passabakang arenna Paulus?

¹⁴ Nakke appanai' sukkuru ma'nassana gele rie' se're tau manna pole ri kau nakke anrio maraenganna Krispus surang Gayus,

¹⁵ jari gele rie' tau akkulle appau ma'nassana kaui ririo passabakang ri arengku.

¹⁶ Injo pole bija-bijanna Stefanus nakke kurioi. Maraenganna ri iyai injo nakke gelemu kuisse' apa rie' juapa tukurio.

¹⁷ Saba' Almase assuro ri nakke gelea lanrio tau, mingka laappala'bang Injili; na injo pole gele lalang rikasara'dekang a'bisara, solanna salli'na Almase andai tide' matu-matunna.

Pangisse' ri Allataala surang pangisse' ri rupatau 1:18–2:5

¹⁸ Saba' kareba passala salli' toje'i iamo kaba'gaang mange ri tulamate injo, mingka mae ri ditte tularipakasalama' inni kareba injo se'rei kagassingang ri Allataala.

¹⁹ Saba' rie' ta'ukiri: ”Nakke laappattide' kasara'dekang ri tau sara'deki injo na kabajikanna tau bajiki injo Kupakalannya'.”

²⁰ Riapai mae tau sara'deki injo? Riapai mae guru Tora' injo? Riapai mae tau a'bali battu injo ri lino inni? Gelejua Allataala maengi a'bua' kasara'dekang ri lino inni laa'jari kaba'gaang?

²¹ Saba' gelena laisse' Allataala, lino inni ripassabakang kasara'dekanna to'jua, jari Allataala assituru' pangisse'Na a'ra'i lapakasalama' iyai tutappa' injo ri kareba Injili, nularapang injo kaba'gaang ri lino inni.

²² Tau Yahudi injo a'ra'i tanra na tau Yunani injo a'bojai kasara'dekang,

²³ mingka kambe appala'bang Almase turisalli' injo: Risikuanna tau Yahudi se're batu patatto'roang na risikuanna tau gele Yahudi se'rei kaba'gaang,

²⁴ mingka mange ri iyai turikeo' injo, baji' injo tau Yahudi, iyareka tau gele injo Yahudi, Almase iamo kagassingang ri Allataala surang pangisse' ri Allataala.

²⁵ Saba' nuba'ga battu ri Allataala la'bi sara'dekangi nanubattu ri rupatau na nulamma battu ri Allataala la'bi gassingangi nanubattu ri rupatau.

²⁶ U'rangisai, Urang siana', anteekamua tallasa'mu, rihattummu rikeo': Assituru' ukkurang rupatau gele lohe tau lumu nyaha, gele lohe tau rie' kahasana, gele lohe tau rikangalikang.

²⁷ Mingka nuba'ga injo ri lino inni, ripile ri Allataala laappakasiri' ri tau sara'deki injo, na nulamma injo ri lino inni, ripile ri Allataala laappakasiri' mange rinugassing injo,

²⁸ na nugele injo rijillu' surang nutuna injo ri lino inni, lapile Allataala, na injo pole nugele injo rie' matu-matunna, lapile Allataala laappakatide' nurie' matu-matunna,

²⁹ solanna anda rie' manna pole se're tau a'bangga-bangga ri a'rakanna Allataala.

³⁰ Mingka rikanara Ia kau rie' lalang ri Isa Almase, nubattu ri Allataala maeng a'jari kasara'dekangi mae ri ditte. Ia appa'nabai na appakatangkasai surang allappasi ri ditte.

³¹ Injomo saba'na assimpole rie' ta'ukiri: ”Inai jua a'bangga-bangga, baji'mu ia a'bangga-bangga lalang ri Karaeng Isa.”