तीतस 3 - केवट नया कारार

प्रभुके आदमीसिके चाल-चलन

¹ विश्वासीसिके याद दिला कि ऊसब शासकसिके आर अधिकारीसिके आदर करै, आर ओकरसिके आज्ञाकारी बनै, आर दोसर आदमीसिके लिए बढियाँ काम करै।

² ऊसब ककरो बारेमे खराब बात नैबोलै, झगडा नैकरै, मगर दोसर आदमीसिके दया देखाबै, आर आदमीसिके संगे बहुते नम्रताके साथ व्यवहार करै।

³ कहिनेकी अपनासब भी विश्वासी हुऐसे पहेला मूर्ख रहियै, परमेश्वरके आज्ञापालन नैकर्ते रहियै आर आदमीसब अपनासिके धोखा देल्कै रहे। अपनासब दासके जुगुर रहियै जे सभे प्रकारके खराब कामसब करैके इच्छासे नियन्त्रित रहै जकरासे अपनासिके आनन्द मिल्ते रहै। अपनासब आपन समयके खराब तरिकासे व्यवहार करैमे आर दोसर आदमीसिसे ईर्ष्या करैमे बितैते रहियै। अपनासब घृणित आदमीसब रहियै; सभेको अपनासिके घृणा कैल्कै आर अपनासब भी ओकरासिके घृणा कैलियै।

⁴ अपनासब एरंको व्यवहार कैलियै तैय्योपर भी, आपनसिके उद्धारकर्ता परमेश्वर आदमीसिके प्रति आपन दया आर प्रेम देखैल्कै।

⁵ ऊ अपनासिके आपनसिके पापके सजायसे बचैल्कै आर यी धरम करमके कामसे नै, मगर ऊ दयालु हुऐके कारणसे छै। ऊ अपनासिके पवित्र आत्मा द्याके बचैल्कै, जे आपनसिके पापसब धोयल्कै आर अपनासिके नया जीवन आर व्यवहार करैके नया तरिका देल्कै।

⁶ परमेश्वर उदारताके साथ अपनासिके पवित्र आत्मा देल्कै छे कि आपनसिके भितरमे शक्तिशाली रुपसे काम करै, येशू ख्रीष्ट आपनसिके पापके लिए मर्लै ताकी आपनसिके उद्धारकर्ता बने सकै।

⁷ परमेश्वर एरंको इहे ल्याके कैल्कै ताकी आपन अनुग्रहसे ऊ अपनासिके आपन नजरमे धर्मी घोषित करे सकै, आर अपनासब ओकर बेटा-बेटीसब बने सकियै आर इहे ल्याके विश्वासके साथ अपनासब ओकरसंगे कहियो खतम नैहुएवाला जीवन पाबैके आशा राखे सकियै।

⁸ हमरद्वारा उप्परमे लिख्ल यी बात सही छै आर एकरापर भरोसा कैल ज्या सकैछै, आर हमे चाहैछियै कि जब तुहें विश्वासीसिके यी बातसब सिखाबैछैं यी बातसिके निरन्तर जोड दहैं। ताकी जेसब परमेश्वरपर विश्वास कैल्कै छे, ऊसब बढियाँ कामसब करैके लिए आपन समय दियैके लिए मन लगाबै। यी शिक्षासब सभैके लिए बढियाँ आर फैदाके छै।

⁹ मगर मूर्ख आर बेकारके सवाल-जबाबसिसे, बाप-पुर्खासिके लम्बा सूचीसिसे, बेकारके मुद्दा आर शब्दसिके बारेमे बहससिसे, मूसाके विधि-विधानके विषयके झगडासिसे अलग र, कहिनेकी ऊसब कोनो मोलके नैछै आर कक्रहौ सहायता नैकरैछै।

¹⁰ यदि कोनो आदमी विश्वासीसिके बीचमे फुट कराबैछै ते ओकरसंगे कडा तरिकासे बात कर आर ओकरा ओरं व्यवहार नैकरैके लिए क। यदि ऊ ओरंको व्यवहार आरहौ करैछै ते, ओकरा फेर चेतावनी दहैं। तकरबाद, यदि ऊ आरहौ ओरंको व्यवहार कर्ते रहैछै ते, तुहें एरंको आदमीके छोडी दिहैं।

¹¹ तुहें जाने सकैछैं कि एरंको आदमी जानी-जानीके गलत रस्ता महर जैछै, आर ओकर आपने खुदके गलत व्यवहारसे ऊ दोषी छै कहिके साबित करैछै।

अन्तिम सन्देश

¹² हमे आर्तिमास आर तुखिकसके तोरलगत क्रेट टापुमे भेज्बौ, आर जब ऊसब ओत्ते पहुँचतै तब तुहें निकोपोलिस सहरमे हमरलगत आबैले पुरा कोशिश कर। कहिनेकी हमे जाडके महिना कटाबैके लिए निकोपोलिस सहरमे ही रहैके निर्णय कैलियै छे।

¹³ जब जेनास नामके वकिल आर अपोल्लोस नामके दोसर आदमी ओकरसिके यात्रामे निक्लैछै, ओकरासिके सहायता करैके लिए तुहें जे-जे करे सक्भैं से कर। ओकरासिके जे चीजके जरुरत छै से दहैं ताकी ऊसब यात्रा करैके समय ओकरासिके कोनो अभाव नैहैतै।

¹⁴ खाली ओतनें ही नै, तुहेंसब विश्वासीसिके बढियाँ कामसब करैमे निरन्तर कडा मेहनत करैके लिए सिखाबे पडैछै ताकी ऊसब आदमीसिके जे जरुरी छै से दिए सक्हैं। एकरासे विश्वासीसिके सहायता हैतै कि ऊसब बेकार जीवन नैजियै आर एकटा मकसदके साथ जीवन जिये सकै।

¹⁵ हमरसंगे एत्ते भेल सभे विश्वासीसब तोरा नमस्कार करैछौ। ओत्ते क्रेट टापुमे हुएवाला संगी विश्वासीसिके नमस्कार कर जे हमरासिके प्रेम करैछै। हमे प्रार्थना करैछियै कि प्रभु तोरापर अनुग्रह करौ।