तीतस 1 - केवट नया कारार

नमस्कार

¹ हमे, पावल, यी चिट्ठी तोरा लिखैछियौ। हमे येशू ख्रीष्टके चुन्ल आर भेज्ल चेला छियै। हमरा परमेश्वरसे चुन्ल आदमीसिके विश्वासके मजगुत बनाबैके लिए आर ओकरासिके येशू ख्रीष्टके सच्चाई बुझाबैले सहायता करैके लिए हमरा नियुक्त कैल छै ताकी ऊसब परमेश्वरके खुश बनाबेवाला जीवन जिये सकै।

² नतिजा स्वरुप, ऊसब परमेश्वरसंगे कहियो खतम नैहुएवाला जीवन जियैके आशा करैछै कहिनेकी कहियो झुठ नैबोलेवाला परमेश्वर यी संसारके सृष्टि करैसे पहेला ही यी प्रतिज्ञा कैल्कै कि ओकर आदमीसब सभे दिन जितै।

³ आर आब सही समयमे, परमेश्वर यी खुश-खबरी प्रकट कैल्कै आर हमेसब सभे आदमीसिके यी बातके प्रचार करैछियै। आपनसिके उद्धारकर्ता परमेश्वर हमर प्रचारके कामद्वारा यी आज्ञा देते हमरा जिम्मेदारी देल्कै कि हमे ओकर खातिर यी काम करियै।

⁴ तीतस तुहें जे हमर आपने बेटाके जुगुर छैं कहिनेकी तुहें भी ख्रीष्टमे भरोसा राखैछैं। हमे प्रार्थना करैछियै कि परमेश्वर पिता आर आपनसिके उद्धारकर्ता येशू ख्रीष्ट तोरासिके अनुग्रह आर शान्ति दौ।

क्रेट टापुमे तीतसके काम

⁵ सेल्याके हमे तोरा क्रेट टापुमे छोड्लियौ, ताकी तुहें हमर आज्ञाके मुताबिक स्थानीय मण्डलीसिके समस्यासिके सुधारे सक्हैं जे काम करैके लिए हमरलगत समय नैरहै। आर तुहें क्रेट टापुके सभे सहरमे मण्डलीके अगुवासब नियुक्त कर। यी विषयमे हमरद्वारा तोरा देल निर्देशनसिके याद राख।

⁶ मण्डलीके अगुवाके एक्केटा पतनी होना चाही। ऊ दोषरहित आर एरंको आदमी होना चाही जकर बेटा-बेटीसब विश्वासी छै, आर ऊ बेटा-बेटीसब बढियाँ व्यवहार करक ताकी ओकरसिके खराब व्यवहारके लिए कोय भी आदमी ओकरासिके दोषी नैठहराबै।

⁷ कहिनेकी मण्डलीके देख-रेख करेवाला आदमी परमेश्वरके काम करे पडैके कारणसे दोषरहित होना चाही। ऊ आपन चहेल बात पुरा हुऐके चाहना करेवाला या तुरन्ते रिसाबेवाला या मतवाला या झग्डौहा या धन-दौलतके लिए ठगेवाला नै होना चाही।

⁸ मगर अतिथि सत्कार करेवाला, दोसर आदमीसिके लिए भलाइ करैले पसन्द करेवाला, आपन इच्छाके काबुमे राखेवाला, सही तरिकासे व्यवहार करेवाला, परमेश्वरमे समर्पित जीवन जिएवाला आर अनुशासित जीवन जिएवाला आदमी होना चाही।

⁹ ओकरा येशू ख्रीष्टके विषयमे विश्वासयोग्य सन्देशपर मजगुतीसे विश्वास करना चाही जे हमेसब ओकरा सिखैलियै छे। ताकी ऊ दोसर आदमीसिके सही शिक्षाके अनुसरण करैके लिए उत्साह दिए सकै आर संगहै संग सही शिक्षाके विरुद्धमे बहस करेवाला आदमीसिके यकीन दिलाबे सकै कि ऊसब गलत छै।

झुट्ठा शिक्षकसब

¹⁰ हमे एरं इहे ल्याके कहैछियौ कहिनेकी बहुते आदमीसब सही शिक्षाके विरुद्धमे विद्रोह कर्तै, यानिकी ऊसब जे बकवास बातसब सिखाबैछै आर जेसब दोसर आदमीसिके धोखा दैछै। यी बात खास करिके कुछु यहूदी आदमीसिके विषयमे सच छै, जेसब विश्वासी बनी गेलै छे। खास करिके ऊ आदमीसब एरंको समूहके छै जेसब खतनाके नियमके मुताबिक सभे विश्वासीसिके खतना हुए पडैछै कहिके कहैछै।

¹¹ एरंको आदमीसिके सिखाबैले अनुमति नैदहैं, कहिनेकी ऊसब झुट्ठा शिक्षा सिख्याके पुरा परिवारके विश्वासके बर्बाद करैछै। ऊसब एरंको झुट्ठा शिक्षा पैसा कमाबैके लिए सिखाबैछै।

¹² क्रेट टापुके बासिन्दा एकटा आदमी जकरा क्रेट टापुके आदमीसब बुद्धिमान आदमी छै कहिके मानैछै, ऊ कहैछै, “क्रेट टापुके आदमीसब जहिया भी झुठ बोलैछै। ऊसब जंगली जानवरसिके जुगुर व्यवहार करैछै। ऊसब कोढिया आदमीसब छै आर जहिया भी बहुते खाना खैछै।”

¹³ यी बातसब एखनिहौं भी क्रेट टापुके आदमीसिके बारेमे सच छै, सेल्याके ओकरासिके कडासे धोप, ताकी ऊसब येशू ख्रीष्टके सच्चा शिक्षामे विश्वास कर्तै।

¹⁴ यहूदी आदमीसिके झुट्ठा खिसासब आर सचसे भट्कल ऊ आदमीसिके आज्ञासिके नैसुन।

¹⁵ ऊ आदमीसिके लिए जकर मन एरंको छै जकरामे कोनो भी पापमय विचार नैछै, सभे चीज परमेश्वरके समनामे शुद्ध छै। मगर ऊ आदमीसिके लिए जेसब दुष्ट छै आर जेसब येशूमे विश्वास नैकरैछै, जे कुछु भी ऊसब करैछै उटा अशुद्ध छै। ऊसब निरन्तर दुष्ट बातसब सोचैछै आर ऊसब सही आर गलतमे फरक नैबुझे सकैछै।

¹⁶ यी झुट्ठा शिक्षकसब परमेश्वरके चिन्हैछियै कहिके कहैछै, मगर ऊसब व्यवहारमे साफसे देखाबैछै कि ऊसब परमेश्वरके नैचिन्हैछै। कहिनेकी परमेश्वर ओरंको आदमीसिके घृणा करैछै आर ऊसब कोनो भी बढियाँ काम करैमे असमर्थ हैछै।