रोमी 9 - केवट नया कारार

परमेश्वरके द्वारा इस्राएलीसिके चुन्ल जाना

^1-3 आब अगर कुछु भी अपनासिके परमेश्वरके प्रेमसे अलग नैकरे सकैछै ते, इस्राएल देशके हमर यहूदी आदमीसब, परमेश्वरसे कहिने अलग छै? हमरा ओकरसिके लिए बहुते दुःख छै, आर सभे दिन हमर मनमे ओकरसिके लिए दरद महसुस हैछै। वास्तवमे, भला ही हमे खुदपर आरोप लगाबे सकैछियै आर आपने ही यहूदी भ्या-बहिनसिके उद्धारके लिए खुद ख्रीष्टसे अलग हुए सकैछियै, हमे ओकर लिए तैय्यार छियै। हमे ख्रीष्टके गवाह मानिके सच कहैछियौ। पवित्र आत्मा आर हमर विवेक भी गवाही दैछै कि यी सभे बातसब झुठ नैछै।

⁴ ऊसब हमर जुगुर इस्राएली छै, आर ओकरासिके परमेश्वरके सन्तान हुऐके लिए चुन्ल गेलै छे। परमेश्वर आपन महिमा ओकरासिके प्रकट कैल्कै। ऊ ओकरसिके संगे प्रतिज्ञा कैल्कै आर आपन विधि-विधान ओकरासिके देल्कै। ओकरसिके संगे परमेश्वरके आराधना करैके आर ओकर अदभुद प्रतिज्ञासब पाबैके विशेष अधिकार छै।

⁵ अब्राहम, इसहाक, आर याकूब ओकरसिके पुर्खासब छै, आर ख्रीष्ट खुद भी, आपन मानव स्वभावमे, एकटा यहूदी आदमी रहै। परमेश्वर, जे सभैपर राज्य करैछै, ओकर प्रशंसा सभे दिन हैते रहै। आमेन!

परमेश्वरके द्वारा प्रतिज्ञाके पूर्ति

⁶ मगर परमेश्वर आपन प्रतिज्ञा पुरा करैमे विफल नैभेलै छे। कहिनेकी सभे इस्राएलके सन्तान सच्कोर इस्राएली नैछै।

⁷ अब्राहमके वंशमे जनम लेले से ही सभेको ओकर सच्चा सन्तान नैभ्याजैछै। कहिनेकी परमेश्वर अब्राहमसे कहैल्कै, “इसहाकके वंशमे जनम लिएवाला ही तोर वंशके मान्ल जैतै।”

⁸ यानिकी, प्रकृतिके मुताबिक जनम लिएवालासब परमेश्वरके सन्तान नैहैछै, मगर खाली प्रतिज्ञाके सन्तान ही अब्राहममे सन्तान मान्ल जैछै।

⁹ कहिनेकी प्रतिज्ञाके वचन यी छै, “अगला साल हमे इहे समयमे दोबारा ऐबौ, आर साराके एकटा बेटा हैतौ।”

¹⁰ आर खाली एतनें ही नै, मगर रिबेकाके गर्भमे एक्केटा पति यानिकी आपनसिके पुर्खा इसहाकसे जोडमा बच्चा भेलै।

^11-12 आर जोडमा बच्चासब जनमैसे पहलहै या कुछु खराब या भला काम करैसे पहेला ही परमेश्वर रिबेकासे कहैल्कै रहे कि ओकर बडका बेटा छोटका बेटाके सेवा कर्तै। परमेश्वर यी देखाबैके लिए कहैल्कै कि ऊ आपन इच्छाके चुनाव आपनहैं करैछै आर यी ओकरसिके कैल कोनो भी कामके कारणसे नैरहै।

¹³ यी ठीक ओरं छै जेरं धरमशास्त्रमे लिख्ल छै, “हमे याकूबके प्रेम कैलियै, मगर एसावके घृणा कैलियै।”

परमेश्वरके इन्साफ

¹⁴ आब हमेसब कि कहियै? कि परमेश्वर आपन चहेल आदमीके चुनैमे अन्यायी छै? हर्गिस नै!

¹⁵ कहिनेकी परमेश्वर मूसाके कहैछै, “हमे जकरापर दया करैले चाहैछियै, ओकरापर हमे दया करैछियै, आर जकरापर हमे कृपा करैले नैचाहैछियै, ओकरापर कृपा नैकरैछियै।”

¹⁶ सेल्याके ते परमेश्वर ऊ आदमीके चुन्तै जकरापर ऊ दया देखाबैके निर्णय लैछै। ओकर पसन्द यी बात पर आधारित नैहैछै कि आदमीसब कि चाहैछै या कि करैके कोशिश करैछै।

¹⁷ कहिनेकी धरमशास्त्रमे परमेश्वर मिश्रके राजा फारोसे कहैछै, “हमे तोरा इहे ल्याके राजा बनैलियौ कि हमे तोरामे आपन शक्ति देखाबियै, आर यी संसारके सभे आदमीसिमे हमर नामके प्रचार कैल जै।”

¹⁸ इहे कारणसे, ओकर इच्छा कैल आदमीपर ऊ दया करैछै, आर ओकर इच्छा कैल आदमीके ऊ हठी बनाबैछै।

¹⁹ तब कुछु आदमीसब हमरासे कहतै, “यदि एरं छै ते, परमेश्वर केरंके कहे सकैछै कि अपनासब गलत छियै? कहिनेकी ऊ जे चाहैछै उटा चीज करैसे कोय भी नैरोके सकैछै।”

²⁰ आदमी भ्याके परमेश्वरसे सवाल करेवाला तुहें के हैछैं? कि सृष्टि कैल चीज ओकरा सृष्टि करेवालाके कहैछै, “हमरा कहिने एरं बनैलह छे?”

²¹ कि कुम्हारके माटीपर अधिकार नैछै, कि एक्केटा माटीके ढेरीसे एकटा महत्वपूर्ण मकसदके लिए आर दोसर साधारण मकसदके लिए बनाबै?

²² परमेश्वरके अधिकार छै कि जे आदमीसिके ऊ बनैल्कै छे ओकरसिके संगे आपन इच्छाके मुताबिक जेरं चाहै ओरं करे सकैछै। परमेश्वर आपन गोस्सा देखाबैले चहते रहै आर सभैके विरुद्ध आपन शक्ति प्रकट करैले चहते रहै जेसब नाश हुऐके हकदार छै। मगर एकर बदलामे, ऊ धीरजके साथ ओकरासिके सहैल्कै।

²³ ऊ एरं कैल्कै कहिनेकी ख्रीष्टके बलिदानवाला मौतके माध्यमसे ऊ देखाबैले चहते रहै कि ऊ कतनें महान छै, जब परमेश्वर ऊ आदमीसिपर दया कैल्कै जकरा परमेश्वर आपन भरपुर महिमामे सामिल हुऐके लिए चुनल्कै छे।

²⁴ चाहे यहूदी आदमीसब है या गैर-यहूदी आदमीसब, अपनासब ऊ चुन्ल आदमीसब छियै।

²⁵ गैर-यहूदी आदमीसिके विषयमे परमेश्वर आपन वक्ता होशेके किताबमे कहैछै, “जेसब हमर प्रजा नैरहै, ओकरासिके हमे हमर प्रजा कहबै। आर जकरा हमे प्रेम नैकैलियै रहे, ओकरा हमे हमर प्यारा कहबै।”

²⁶ आर जे जगहमे परमेश्वर कहैल्कै, “तुहेंसब हमर प्रजा नैछैं” ओथै जिन्दा परमेश्वर ओकरासिके आपन सन्तान कहतै।

²⁷ इस्राएलीसिके बारेमे यशैया परमेश्वरके वक्ता पुकारीके कहैछै, “चाहे इस्राएलीसब गन्तीमे समुन्दरके बालुके जुगुर बहुते छै, तैय्योपर भी ओकरासिमेसे कुछु आदमीसब ही बच्तै।

²⁸ कहिनेकी प्रभु जल्दी ही आर एक्केबेरमे सभे दिनके लिए धर्तीपरके सभे आदमीसिके न्याय कर्तै।”

²⁹ जेरं परमेश्वरके वक्ता यशैया पहेला भी कहैल्कै रहे, “यदि सर्वशक्तिमान प्रभु आपनसिके लिए कुछु सन्तानसिके नैछोड्तियै ते, अपनासब सदोम आर गमोरा सहरके आदमीसिके जुगुर बन्तियै, जकरा परमेश्वर पुरा तरिकासे नाश करिदेल्कै।”

³⁰ आब हमेसब कि कहियै? ऊ गैर-यहूदी आदमीसब परमेश्वरद्वारा धर्मी घोषित हुऐके कोशिश नैकर्ते रहै, मगर ओकरसिके विश्वासके कारण परमेश्वर ओकरासिके आपन समनामे सही बनैल्कै रहे।

³¹ मगर इस्राएलीसब उटा विधि-विधानके मानिके परमेश्वरके द्वारा धर्मी घोषित हुऐले चाहैके कारणसे परमेश्वरके द्वारा धर्मी घोषित हुऐके लिए सफल नैभेलै।

³² ऊसब कहिने नैसकल्कै? इहे ल्याके कि ऊसब विश्वाससे नै मगर बढियाँ कामसिसे परमेश्वरके द्वारा धर्मी घोषित हुऐले चहते रहै। ऊसब ख्रीष्टके ठुकरैल्कै जकरा उटा पत्थलके संगे तुलना करे सकैछियै जे आदमीसिके ठोकर दिलाबैछै।

³³ जेरं धरमशास्त्रमे लिख्ल छै, “देख, हमे यरूशलेम सहरमे एकटा पत्थल राखैछियै, जे आदमीसिके ठोकर द्याके गिराबैके कारण बनैछै, मगर ओकरामे विश्वास करेवाला कोय भी लज्जित नैहैतै।”