रोमी 5 - केवट नया कारारविश्वास संकटमे विजय हैछै 1 सेल्याके अपनासब आपनसिके विश्वासके द्वारा धर्मी घोषित भ्या गेलियै छे, आर परमेश्वरसे आपनसिके मिलाप उटा कारणसे भेल छै जे आपनसिके प्रभु येशू ख्रीष्ट आपनसिके लिए कैल्कै छे। 2 आपनसिके विश्वासके कारण, ख्रीष्ट अपनासिके यीटा अनुग्रहमे आनल्कै छे जते अपनासब एखन खडा छियै, आर अपनासब निश्चय आर आनन्दके साथ परमेश्वरके महिमामे सामिल हुऐके आशा करैछियै। 3 खाली एतनें ही नै, अपनासब संकटमे भेल समयमे भी आनन्दित हुए सकैछियै, अपनासिके मालुम छै कि आपनसिके दुःख भोग्ल कारणसे अपनासब आरहौ बेसी धीरज राखैले सिखैछियै। 4 परमेश्वर अपनासिके स्वीकार करैछै कहिनेकी अपनासब धीरज राखैले सिख्लियै छे, ऊ अपनासिके स्वीकार करैके कारणसे अपनासिके आशा छै। 5 आशा अपनासिके कहियो लज्जित हुऐले नैदैछै, कहिनेकी परमेश्वरके देल पवित्र आत्माद्वारा ऊ आपनसिके हृदय आपन प्रेमसे भरि देल्कै छे। 6 कहिनेकी जखनी अपनासब कमजोर ही रहियै, तखनिहैं येशू ख्रीष्ट परमेश्वरके नियुक्त कैल समयमे दुष्ट आदमीसिके लिए मर्लै। 7 ककरो लिए एकटा धर्मी आदमीके लिए मरना मुश्किल छै। शायद हुए सकैछै कि वास्तवमे कोनो आदमी बढियाँ आदमीके लिए मरैके लिए तैय्यार भी भ्याजै। 8 मगर परमेश्वर आपनसिके लिए ओकर प्रेम एक्रहैमे देखाबैछै कि जब अपनासब पापी ही रहियै तखनिहैं येशू ख्रीष्ट आपनसिके लिए मर्लै। 9 ख्रीष्ट आपनसिके लिए मरैके कारणसे आर आपनसिके पापके लिए आपन खून बहाबैके कारणसे अपनासब परमेश्वरमे धर्मी घोषित भेल छियै। अपनासब परमेश्वरमे धर्मी घोषित भेल छियै आर ख्रीष्ट जरुर ही अपनासिके परमेश्वरके क्रोधसे बचैतै। 10 कहिनेकी जब अपनासब परमेश्वरके दुश्मनसब रहियै, ऊ आपन बेटाके मौतके द्वारा परमेश्वर आपनसिसे मिलाप कैल्कै। इहे ल्याके अपनासब निश्चित रुपसे यी जाने सकैछियै कि आब जब कि आपनसिके ओकरसंगे मिलाप छै ते ऊ अपनासिके बचैतै कहिनेकी ख्रीष्ट जिन्दा छै। 11 खाली एतनें ही नै आब आपनसिके प्रभु येशू ख्रीष्टद्वारा परमेश्वरसे आपनसिके मिलाप भ्यागेलै छे, इहे ल्याके अपनासब परमेश्वरमे आनन्दित छियै। 12 सृष्टिके पहेला आदमी, आदमसे ही संसारमे पाप ऐलै आर ओकर पाप मौत आनल्कै। आर एरंके आदमके पापके कारणसे सभे आदमीसब पापी भेलै आर उहे पापके कारणसे सभे आदमीमे मौत ऐलै। 13 परमेश्वर मूसाके विधि-विधान दियैसे पहेलासे ही संसारमे पाप रहै, मगर एकरा पापके रुपमे गिन्ल नैगेलै कहिनेकी तखनतक तोड्ल जैके लिए कोनो विधि-विधान नैरहै। 14 तैय्योपर भी आदमके समयसे विधि-विधान लिखेवाला मूसाके समयतक सभे आदमीसब पाप कैल्कै आर ऊसब मर्लै, ऊ आदमीसब भी जेसब आदमके जुगुर अनाज्ञाकारिताके पाप नैकैल्कै रहे। जेरंके ख्रीष्टके जीवन आर मौत सभे आदमीसिके लिए नतिजा आनल्कै, ओहिने करिके आदमके जीवन भी सभे आदमीसिके लिए नतिजा आनल्कै। 15 मगर आदमके पाप उटा वरदानके जुगुर नैछै जे परमेश्वर अपनासिके आपन अनुग्रहसे दैछै। कहिनेकी एकटा आदमीके पाप बहुते आदमीसिके लिए मौत ल्याके ऐलै। मगर परमेश्वरके अनुग्रह आर धार्मिकताके वरदान जे बहुते आदमीसब महसुस कैल्कै छे, ओकर दाम बहुते आदमीसिके लिए ओकरासे बहुते बेसी छै। आर येशू ख्रीष्ट एकटा आदमीके रुपमे आपन अनुग्रहसे जे कैल्कै, ऊ एकरा सम्भव कैल्कै। 16 परमेश्वर जे वरदान अपनासिके देल्कै छे उटा आदमके पापके जुगुर नैछै। कहिनेकी एक्केटा पाप सजाय आनल्कै। जब कि अपनासब बहुते पाप कैलियै छे, तैय्योपर भी परमेश्वर अपनासिके एकटा एरंको वरदान देल्कै जे अपनासिके ओकर नजरमे धर्मी घोषित कैल्कै। 17 कहिनेकी जब आदमके पापके कारण मौत सभे आदमीमे ऐलै, ओरं छै ते जे आदमीसब अनुग्रह आर धर्मी घोषित हुऐके वरदान बहुते पाबैछै। ऊसब एकटा आदमी यानिकी येशू ख्रीष्टद्वारा जरुर ही कहियो खतम नैहुएवाला जीवन पैतै आर येशू ख्रीष्टसंगे ऊसब राज्य कर्तै कहिनेकी ऊसब ओकरामे विश्वास करैछै। 18 सेल्याके जेरंके एकटा पाप सभे आदमीसिके लिए सजायके कारण भेलै, ओहिने करिके एकटा धार्मिकताके काम हरेक आदमीसिके परमेश्वरके नजरमे धर्मी घोषित करैछै आर ओकरासिके जीवन दैछै। 19 कहिनेकी जेरंके एकटा आदमीके अनाज्ञाकारितासे बहुते आदमी पापी बनैल गेलै, ओहिने करिके एक्केझनके आज्ञाकारिताद्वारा बहुते झन धर्मी बनैल जैतै। 20 मूसाके विधि-विधान इहे ल्याके देल गेलै ताकी सभे आदमीसब देखे सकै कि ऊसब कतनें पापी रहै। मगर जब आदमीसब आरहौ बेसी पाप कैल्कै, परमेश्वरके अनुग्रह आरहौ बेसी बढ्लै 21 जेरंके सभे आदमीसब पाप कैल्कै आर ऊसब मर्लै ओहिने करिके आपनसिके प्रभु येशू ख्रीष्टके द्वारा परमेश्वरके अनुग्रहसे ओकरासिके धर्मी घोषित कर्तै आर ओकरासिके कहियो खतम नैहुएवाला जीवन देतै। |
Kayort (केवट) Bible by The Love Fellowship is licensed under Creative Commons Attribution-ShareAlike 4.0 License.
Beyond Translation