रोमी 4 - केवट नया कारार

अब्राहम विश्वाससे धर्मी ठहर्लै

¹ आब, यहूदी आदमी हुऐके नातासे अपनासब आपनसिके पूर्वज अब्राहमके विषयमे कि कहियै? ऊ धर्मी घोषित कैल जैके कारण कि रहै?

² अगर अब्राहम बढियाँ कामके द्वारा धर्मी घोषित हैतियै ते ओकरा घमण्ड करैके कारण हैतियै, मगर ऊ आपन बढियाँ कामसिके विषयमे परमेश्वरके समनामे घमण्ड नैकरे सक्तै।

³ धरमशास्त्र कि कहैछै? यी कहैछै कि, “अब्राहम परमेश्वरके प्रतिज्ञामे विश्वास कैल्कै आर परमेश्वर ओकरा धर्मी घोषित कैल्कै।”

⁴ काम करेवाला आदमी जे रोजी पाबैछै उटा दान नैछै, मगर उटा ओकर पाबेवाला हक छै।

⁵ मगर जे आदमी परमेश्वरके समर्थन पाबैके लिए काम नैकरैछै, मगर पापी आदमीसिके धर्मी बनाबेवाला परमेश्वरपर भरोसा राखैछै, ओकरसिके विश्वासके कारणसे ऊ आदमीसब धर्मी घोषित कैल जैछै।

⁶ अहिने करिके, दाऊद राजा लिखल्कै छे कि परमेश्वर केरंके उटा आदमीके आशिष दैछै जकरा परमेश्वर कामसिके बिना धर्मी घोषित करैछै:

⁷ “ऊ आदमी धन्यके छै, जकर पाप माफ भेलै छे, आर जकर पापसब माफ कैल गेलै छे।

⁸ ऊ आदमी धन्यके छै, जकर पापके हिसाब परमेश्वर नैलैछै।”

⁹ कि यी आशिष खाली यहूदी आदमीसिके लिए छै, या खतना नैकैल आदमीसिके लिए भी छै? हमेसब उहे कहैछियै जे बात धरमशास्त्र कहैछै, “परमेश्वर अब्राहमके धर्मी घोषित कैल्कै।”

¹⁰ यी कहिया भेलै? खतना कैल जैसे पहेला भेलै कि खतना कैल जैके बाद? यी अब्राहमके खतना कैल जैसे पहेला भेलै, नै कि ओकर खतना हुऐके बाद।

¹¹ परमेश्वर अब्राहमके खतना हुऐसे पहेला ही स्वीकार करि लेल्कै रहे आर ओकरा धर्मी घोषित करिदेल्कै रहे। खतनाके निशान उटा स्वीकृतीके मोहर छै। सेल्याके, अब्राहम ऊ आदमीसिके आत्मिक पिता छै, जेसब विश्वास ते करैछै मगर ओकरसिके खतना नैभेलै छे। ऊसब आपन विश्वासके कारण धर्मी गिन्ल जैछै।

¹² अब्राहम ऊसब खतना कैल आदमीसिके भी पूर्वज छै, जकर खाली खतना भेल नैछै, मगर जकर लगत उहे किसिमके विश्वास छै जेरं खतना कैल जैसे पहेला अब्राहमके रहै।

¹³ परमेश्वर अब्राहम आर ओकर सन्तानसे प्रतिज्ञा कैल्कै कि ऊ ओकरासिके यी संसार देतै। यी प्रतिज्ञा सेल्याके कैल नैगेलै रहे कहिनेकी अब्राहम विधि-विधानके पालन कैल्कै, मगर परमेश्वरमे ओकर विश्वासके कारण ओकरा धर्मी घोषित कैल्कै।

¹⁴ यदि अब्राहम आर ओकर वंशसिके उटा प्रतिज्ञा देल गेलै, कहिनेकी ऊसब विधि-विधानके आज्ञापालन कैल्कै ते, विश्वास आर प्रतिज्ञा बेकार भेलै।

¹⁵ परमेश्वर ऊ आदमीसिके प्रति क्रोधित छै जेसब उटा विधि-विधान पुरा तरिकासे आज्ञापालन नैकरैछै। जते विधि-विधान नैहैछै ओत्ते अनाज्ञाकारिता भी नैहैछै।

¹⁶ यी प्रतिज्ञा परमेश्वरमे भेल विश्वासमे आधारित हैछै, ताकी परमेश्वरके प्रतिज्ञा ओकर अनुग्रहद्वारा पक्का है। उटा प्रतिज्ञा अब्राहमके सन्तानसिके लिए खाली नैछै जकरसंगे विधि-विधान छै। यी प्रतिज्ञा विश्वास हुऐके कारण अब्राहमके सन्तान भेल सभैके लिए छै, जेरंको ओकर विश्वास रहै। अब्राहम अपनासब सभैके पूर्वज छै।

¹⁷ धरमशास्त्रमे लिख्ल छै, “हमे तोरा जात-जातके आदमीसिके पुर्खा बनैलियौ छे।” परमेश्वरके नजरमे अब्राहम आपनसिके बाबु छै। अब्राहम ऊ परमेश्वरमे विश्वास कैल्कै, जे मुर्दासिके जिन्दा बनाबैछै आर ऊ चीजसिके भी अस्तित्वमे आनैछै जकर अस्तित्व नैछै।

^18-19 परमेश्वर अब्राहमके कहैल्कै कि ओकर बहुते सन्तान हैतै। मगर अब्राहम देखल्कै कि बाल-बच्चा जनमाबैके लिए ऊ बहुते बुढ रहै, कहिनेकी ऊ लगभग एक स साल पुग्ल रहै। सारा भी आब बाल-बच्चा नैजनमाबे सक्तियै। मगर जब कि सभे कुछु यी देखैते रहै कि ऊ जात-जातके आदमीसिके बाबु नैबने सकैछै, तैय्योपर भी ऊ आपन विश्वासमे कमजोर नैभेलै। ऊ विश्वास कर्ते रहलै आर ऊ आशा नैमारल्कै।

²⁰ ऊ परमेश्वरके प्रतिज्ञा कैल बातमे एक्कोरति शंका नैकैल्कै मगर आपन विश्वासमे आरहौ मजगुत भ्याके परमेश्वरके प्रशंसा कैल्कै।

²¹ परमेश्वर जे प्रतिज्ञा कैल्कै छे, उटा प्रतिज्ञा ऊ पुरा करे सक्तै कहिके अब्राहमके पुरा विश्वास रहै।

²² सेल्याके अब्राहमके विश्वासके कारणसे परमेश्वर ओकरा धर्मी घोषित कैल्कै।

²³ यी वचन, “परमेश्वर ओकरा धर्मी घोषित कैल्कै” ओकर लिए खाली नैरहै।

²⁴ मगर यी आपनसिके लिए भी छै जकरा विश्वासके कारणसे परमेश्वर धर्मी घोषित कर्तै। यानिकी यदि अपनासब परमेश्वरमे विश्वास कर्बै, जे आपनसिके येशू प्रभुके मुर्दासे जिन्दा बनैल्कै ते, अपनासब भी विश्वासके कारणसे धर्मी घोषित कैल जैबै।

²⁵ येशू आपनसिके पापके लिए मर्लै आर परमेश्वर अपनासिके धर्मी घोषित करैके लिए येशूके मुर्दासे जिन्दा बनैल्कै।