रोमी 16 - केवट नया कारारविश्वासी बहिन फिबीके नमस्कार 1 हमे चाहैछियै कि किंक्रिया सहरके मण्डलीके सेविका, आपनसिके विश्वासी बहिन फिबीके तुहेंसब सम्मान कर। 2 हमे तोरासिके कहैछियौ प्रभुमे ओकरा स्वागत कर, जेरं परमेश्वरके आदमीसिके एक-दोसरके स्वागत करना चाही। ओकरा चाहेवाला कोनो भी सहायता ओकरा दहैं, कहिनेकी ऊ बहुते आदमीके आर हमर भी सहायता कैल्कै छे। रोम सहरके विश्वासीसिके नमस्कार 3 विश्वासी बहिन प्रिस्कीला आर ओकर पति अकिलासके जे ख्रीष्ट येशूमे हमर सहकर्मी छै, हमर नमस्कार। 4 ऊसब हमर लिए एकबेर आपन जान संकटमे डाल्लकै रहे। ओकरासिके खाली हमे नै, मगर गैर-यहूदी आदमीसिके मण्डलीसब भी धन्यवाद दैछै। 5 विश्वासी बहिन प्रिस्कीला आर भ्या अकिलासके घरमे जमा हुएवाला मण्डलीके भी हमर नमस्कार कही दहैं। हमर प्रिय, इपेनितसके, जे एशिया प्रदेशसे ख्रीष्टमे विश्वास करेवाला पहेला विश्वासी छै, ओकरा भी हमर नमस्कार कही दहैं। 6 विश्वासी बहिन मरियमके, जे तोरसिके बिच्चेमे बहुते मेहनत कैल्कै, ओकरा नमस्कार कही दहैं। 7 विश्वासी भ्या एड्रोनिकस आर विश्वासी बहिन युनियस, जे हमर आपन यहूदी साथीसब छै, आर हमर पहेलाके साथी कैदीसब छै, आर चुन्ल आर भेज्ल चेलासिके द्वारा ऊसब बहुते सम्मानित छै, आर यीसब भी हमरसे पहेला ख्रीष्टके चेला बन्लै रहे, ओकरा सभैके नमस्कार कही दहैं। 8 एम्प्लीआतस, जे प्रभुमे हमर प्रिय छै, ओकरा हमर नमस्कार कही दहैं। 9 उर्बानस, जे ख्रीष्टमे हमर सहकर्मी छै आर हमर प्रिय दोस्त स्ताखुसके भी हमर नमस्कार कही दहैं। 10 अपोल्लोस, जे साफसे देखैल्कै छे कि ऊ ख्रीष्टके प्रति कतनें वफादार छै, ओकरा हमर नमस्कार कही दहैं। अरिस्तोबुलस आर ओकर घर-परिवारके भी हमर नमस्कार कही दहैं। 11 हमर यहूदी साथी हेरोदियनके नमस्कार कही दहैं। नर्किससके घर-परिवार, जे प्रभुके छै, ओकरा हमर नमस्कार कही दहैं। 12 प्रभुमे मेहनत करेवाला हमर विश्वासी बहिनसब त्रुफेना आर त्रोफोसके हमर नमस्कार कही दहैं। प्रभुमे बहुते मेहनत करेवाला हमर प्रिय विश्वासी बहिन पर्सिसके भी नमस्कार कही दहैं। 13 प्रभुके सेवामे ओकर विशेष जन, रुफस आर ओकर मयाँ जे हमर लिए भी मयाँके जुगुर छै, ओकरासिके भी हमर नमस्कार कही दहैं। 14 असिंक्रितस, फ्लेगन, हर्मेस, पत्रोबास, हर्मास आर ओकरसंगे रहेवाला विश्वासी भ्या-बहिनसिके हमर नमस्कार कही दहैं। 15 फिलोलोगास, युलिया, नेरियास आर ओकर बहिन आर ओलिम्पास आर ओकरसिके संगे भेल सभे विश्वासीसिके हमर नमस्कार कही दहैं। 16 एक दोसरके बहुते ही प्रेमसे ख्रीष्टियन नमस्कार कर। ख्रीष्टमे सभे मण्डलीसब तोरासिके नमस्कार भेजल्कौ छे। 17 हे विश्वासी भ्या-बहिनसब, हमे तोरासिके बिन्ती करैछियौ, कि ऊ आदमीसब जे तोरसिके बीचमे फुट पैदा करैछै आर जे आदमीसिके गलत बातसिपर विश्वास करैके लिए लगाबैछै, ओकरसिसे होशियार र आर ओकरासिसे दूर र। 18 कहिनेकी एरंको आदमीसब आपनसिके प्रभु ख्रीष्टके नै, मगर आपन पेटके लिए सेवा करैछै, आर ओकरसिके मिठ्ठ-मिठ्ठ बोली आर चापलुसीवाला बातसे सिधा-साधा आदमीसिके धोखा दैछै। 19 सभेको जानैछै कि तुहेंसब कतनें बढियाँसे प्रभुके आज्ञा मानैछैं। सेल्याके तोरसिके विषयमे हमे आनन्द मनाबैछियै। मगर हमे यी चाहैछियै कि तुहेंसब कि बढियाँ छै यी जानैमे बुद्धिमान मगर खराब करैमे निर्दोष र। 20 शान्ति दिएवाला परमेश्वर जल्दी ही शैतानके शक्तिके नाश करिके ओकरा तोरसिके अधिनमे करि देतौ। आपनसिके प्रभु येशू ख्रीष्टके अनुग्रह तोरसिके संगे रहौ। पावलके दोस्तसिसे नमस्कार 21 तिमोथी, हमर सहकर्मीके, आर हमर आपन संगी यहूदीसब लुकियस, यासोन आर सोसीपात्रोस तोरासिके नमस्कार भेजल्कौ छे। 22 हमे, तर्तियस जे पावलके लिए यी चिट्ठी लिखैछियै, आपन नमस्कार भेजैछियौ। हमे भी प्रभुके एकटा चेला छियै। 23 गायस भी तोरासिके आपन नमस्कार भेजैछौ। हमे ओकर घरमे रहैछियै जते मण्डली जमा हैछै। इरास्तस जे सहरके लिए पैसाके हिसाब-किताब देखैछै, आर आपनसिके विश्वासी भ्या कवार्टस भी तोरासिके नमस्कार भेजल्कौ छे। 24 हमे प्रार्थना करैछियै कि आपनसिके प्रभु येशू ख्रीष्टके अनुग्रह तोरसिके संगे रहौ। आमेन। पावलके अन्तिम प्रार्थना 25 आब ओकरा, जे हमर प्रचार कैल खुश-खबरीके मुताबिक तोरासिके विश्वासमे मजगुत बनाबे सकैछौ, यानिकी येशू ख्रीष्टके विषयके प्रचारके मुताबिक, उटा रहस्यके प्रकाश बमोजिम, जे युग-युगसे गुप्तमे रहै, 26 मगर आब यी परमेश्वरके वक्तासिके लिख्ल बातसिके द्वारा प्रकट भेलै छे आर आब कहियो खतम नैहुएवाला परमेश्वरके आज्ञाके मुताबिक सभे जात-जातके आदमीसिके मालुम भेलै छे, ताकी सभे जात-जातके आदमीसब विश्वास करिके परमेश्वरके आज्ञापालन करे सकै। 27 येशू ख्रीष्टके द्वारा एक्केटा सर्वज्ञानी परमेश्वरके सभे दिन महिमा हैते रहै। आमेन। |
Kayort (केवट) Bible by The Love Fellowship is licensed under Creative Commons Attribution-ShareAlike 4.0 License.
Beyond Translation