रोमी 15 - केवट नया कारार

दोसर आदमीसिके भारी उठाना

¹ अपनासब, जे विश्वासमे मजगुत छियै यी जानैछियै कि यी बातसिसे कोय फरक नैपडैछै, मगर अपनासब खाली खुदके खुश बनाबैके लिए एरं नैकरे सकैछियै। अपनासिके ऊ आदमीसिके शंका आर डरसिपर धीरज करना चाही जे यी बातसिके गलत मानैछै।

² अपनासिमेसे हरेकके आपन संगी विश्वासी भ्या-बहिनके विश्वासके लिए बढियाँ काम, ओकरा खुश करेवाला काम आर ओकर विश्वासके मजगुत करेवाला काम करना चाही।

³ कहिनेकी ख्रीष्ट भी खुदके खुशी नैबनैल्कै। मगर जेरं धरमशास्त्रमे लिख्ल छै, “तोर निन्दा करेवाला आदमीसब हमर निन्दा कैल्कै छे।”

⁴ जतनें बात बहुते पहेलासे ही धरमशास्त्रमे लिख्ल छै, उटा आपनसिके शिक्षाके लिए लिख्ल गेलै कि अपनासब धीरज आर धरमशास्त्रसे मिलेवाला उत्साह पाबे सकियै ताकी अपनासब आशा राखे सकियै कि परमेश्वर जे प्रतिज्ञा कैल्कै रहे, उटा पुरा कर्तै।

⁵ हमे प्रार्थना करैछियै कि परमेश्वर तोरासिके धीरज आर उत्साह दौ ताकी तुहेंसब येशू ख्रीष्टके अनुसरण कर्ते आपसमे एकतामे रहैं।

⁶ ताकी तुहेंसब सभेको एक्केसंगे मिलिके परमेश्वर आपनसिके प्रभु येशू ख्रीष्टके पिताके स्तुति कर।

गैर-यहूदी आदमीसिके लिए खुश-खबरी

⁷ सेल्याके, एक दोसरके स्वीकार कर जेरंके ख्रीष्ट तोरासिके स्वीकार कैल्कौ छे, ताकी आदमीसब परमेश्वरके प्रशंसा करै।

⁸ हमे तोरासिके कहैछियौ, आपन पुर्खासिके देल प्रतिज्ञाके सच साबित करैके लिए ख्रीष्ट, परमेश्वरके सच्चाईके सबूत दियैके लिए यहूदी आदमीसिके सेवक बन्लै।

⁹ आर गैर-यहूदीसब भी परमेश्वरके दयाके कारण परमेश्वरके स्तुति कर। यी ठीक ओहिने ही छै जेरं धरमशास्त्रमे लिख्ल छै, “सेल्याके गैर-यहूदी आदमीसिके बिच्चेमे हमे तोर प्रशंसा कर्भौं, आर तोर नामके भजन गैभौं।”

¹⁰ फेर कोनो जगहमे धरमशास्त्रमे एरं भी लिख्ल छै, “हे गैर-यहूदी आदमीसब, परमेश्वरके प्रजाके संगे आनन्द मना।”

¹¹ आर फेर कोनो दोसर जगहमे धरमशास्त्रमे एरं लिख्ल छै, “हे सारा गैर-यहूदी आदमीसब, प्रभुके प्रशंसा कर, आर सभे आदमीसब ओकर प्रशंसा कर।”

¹² फेर, परमेश्वरके वक्ता यशैया धरमशास्त्रमे लिखल्कै छे, “यिशैके वंशसे एकझन ऐतै, ऊ गैर-यहूदी आदमीसिके उप्परमे शासन कर्तै, ओकरापर गैर-यहूदीसब आशा राख्तै कि ऊ ओकरासिके बचैतै।”

¹³ हमे प्रार्थना करैछियै कि परमेश्वर जे आशाके दाता छै, ऊ तुहेंसब विश्वास करैके कारणसे तोरासिके पुरा तरिकासे खुशी आर शान्तिके आनन्द लियैके लिए सहायता करौ ताकी पवित्र आत्माके शक्तिसे तोरसिके आशा बढते जौ।

पावलके सेवाके मकसद

¹⁴ हे हमर विश्वासी भ्या-बहिनसब, हमे तोरसिके विषयमे निश्चित छियै, कि तुहेंसब खुद भी भलाइसे भर्ल छैं आर तुहेंसब पुरा तरहसे जानैछैं कि तोरासिके कि करना चाही, आर तुहेंसब एक दोसरके सिखाबे सकैछैं।

^15-16 मगर हमे तोरासिके जे बात याद दिलाबैके लिए चाहैछियौ से बात लिखैके साहास करैछियौ। परमेश्वर हमरा ऊ आदमीसिके लिए आपन चुन्ल आर भेज्ल चेलाके रुपमे अनुग्रह देल्कै छे, जे गैर-यहूदी आदमीसब छै। हमे ओकरासिके येशू ख्रीष्टके बारेमे खुश-खबरी सुन्याके यहूदी पुजारीके रुपमे परमेश्वरके सेवा करैछियै। एरंके हमे ओकरासिके एकटा दानके रुपमे परमेश्वरके लगत आने सकैछियै जकरासे ऊ खुश छै, कहिनेकी पवित्र आत्मा ओकरासिके शुद्ध बनैल्कै छे।

¹⁷ सेल्याके येशू ख्रीष्टसे हमर रिश्ता छै, ओकर कारणसे ही परमेश्वरके सेवामे हमे गौरव करे सकैछियै।

¹⁸ कहिनेकी हमे यी कहैके लिए साहासी छियै कि ख्रीष्ट हमरद्वारा जे काम कैल्कै छे, ओकरद्वारा हमे गैर-यहूदी आदमीसिके परमेश्वरके अनुसरण करैके लिए प्रभावित कैलियै छे। ऊसब हमर बोल्ल वचन सुनिके आर हमर कैल काम देखिके परमेश्वरपर भरोसा कैल्कै छे।

¹⁹ पवित्र आत्माद्वारा हमरा देल शक्तिसे हमे अदभुत काम आर चमत्कार करैछियै। सेल्याके जते भी हमे यरूशलेम सहरसे ल्याके इल्लुरिकन प्रदेशतक गेलियै छे, हमे ओत्ते भी सभे आदमीसिके येशू ख्रीष्टके बारेमे खुश-खबरी सुनैलियै छे।

²⁰ मगर हमर मनके इच्छा यी छै कि खुश-खबरीके प्रचार उहे इलाकासिमे है, जते येशू ख्रीष्टके विषयमे एखनतक सुनैल नैगेलै छे। हमे उटा घर बनाबेवाला राज मिसतिरीके जुगुर छियै, जे कोनो दोसर आदमीके उठैल जगमे घर नैबनाबैछै।

²¹ हमे उटा बातके पुरा करैले चाहैछियै जे बात धरमशास्त्रमे लिख्ल छै, “जे आदमीसिके ओकर विषयमे कहियो नैबतैल गेलै छे, ऊसब देख्तै। आर जे आदमीसब ओकर विषयमे कहियो भी नैसुनल्कै छे, ऊसब बुझ्तै।”

²² सेल्याके, हमे तोरसिकेलगत आबैसे बहुतेबेर रुक्लियै छे।

पावलके रोम सहर जैके योजना

²³ मगर आब यरूशलेम सहरसे इल्लुरिकन प्रदेशतक हमे आपन काम पुरा करि लेलियै छे, आर बहुते सालसे तोरसिकते लगत आबैके हमर इच्छा छै।

²⁴ सेल्याके जब हमे स्पेन देश जैबै, हमरा आशा छै कि जैके समयमे तोरसिसे भेट है आर कुछु समयके लिए हमे तोरसिके संगे संगतिसे आनन्दित भ्याजियै आर हमे चाहैछियै कि तुहेंसब हमरा स्पेन देशके यात्राके लिए सहायता करिहैं।

²⁵ मगर आब हमे विश्वासीसिके दान दियैके लिए यरूशलेम सहरमहर जैछियै।

²⁶ कहिनेकी जे यरूशलेम सहरमे विश्वासीसब छै आर जेसब गरिब छै, ओकरसिके लिए माकेडोनिया प्रदेश आर अखैया प्रदेशके मण्डलीके आदमीसब स्वेच्छासे कुछु दान दियैके फैसला कैल्कै।

²⁷ यी दान ऊसब खुशीसे जमा कैल्कै रहे, आर सच्चे यीसब यरूशलेम सहरके आदमीसिके कर्जदार छै। कहिनेकी गैर-यहूदी आदमीसब यरूशलेम सहरके विश्वासीसिसे खुश-खबरीके आत्मिक आशिष पैल्कै, सेल्याके ओकरासिके लागैछै कि एकर बदलामे ऊसब कमसे कम ओकरासिके आर्थिक सहायता करे सकैछै।

²⁸ सेल्याके, हमे सभैसे पहेला यरूशलेम सहर जैछियै ताकी ओकरासिके यी जमा कैल सहायताके पैसा लज्याके दियै। तकरबाद, फेर हमे रोम सहरमे आबिके तोरसिसे मुलाकात करिके स्पेन देशमे जैबै।

²⁹ आर हमे जानैछियै कि हमे तोरसिकेलगत ऐबौ आर ओकर कारण ख्रीष्ट पुरा तरहसे तोरासिके आशीर्वाद देतौ।

³⁰ आर हे विश्वासी भ्या-बहिनसब, प्रभु येशू ख्रीष्टमे आपनसिके विश्वासके कारण आर पवित्र आत्मा जे प्रेम अपनासिके देल्कै छे ओकर कारण हमे तोरसिसे बिन्ती करैछियौ कि तुहेंसब हमर लिए परमेश्वरसे बहुत ही मन लग्याके प्रार्थना कर।

³¹ आर प्रार्थना कर कि हमे यहूदिया प्रदेशके अविश्वासी आदमीसिसे सुरक्षित रहियै, आर ताकी यरूशलेम सहरमे रहेवाला विश्वासीसब हमर पहुँचैल आर्थिक सहायतासे खुश भ्याजै,

³² आर हमे परमेश्वरके इच्छासे तोरसिकेलगत आनन्दके साथ आबिके तोरसिके संगे विश्राम पाबे सकियै।

³³ हमे प्रार्थना करैछियै कि शान्ति दिएवाला परमेश्वर तुहेंसब सभैके संगे रहौ। आमेन।