रोमी 13 - केवट नया कारारशासकके अधिनमे र 1 सभे आदमीसब शासन करेवाला शासकके अधिनमे र। कहिनेकी सभे अधिकार परमेश्वरके तरफसे ऐलै छे, आर उटा अधिकार परमेश्वरके द्वारा ही ठहरैल हैछै। 2 सेल्याके शासन करैके अधिकार भेल आदमीसिके विरोध करेवाला आदमी परमेश्वरके विरोध करैछै। आर एरंके विरोध करेवाला आदमीसब आपन उप्परमे सजाय आनैछै। 3 कहिनेकी यदि कोय बढियाँ काम करैछै ते, ओकरा शासकसिसे डरैके जरुरत नैछै। मगर यदि ऊसब खराब काम करैछै ते, ओकरासिके डरैके जरुरत छै। सेल्याके यदि तुहेंसब शासकसिसे नैडराबैले चाहैछैं ते, जे सही छै से कर, आर ऊसब तोरसिके प्रशंसा कर्तौ। 4 कहिनेकी शासकसब तोरसिके सहायताके काम करैके लिए परमेश्वरके तरफसे सेवक छै। मगर यदि तुहें खराबी करैछैं ते डर मान, कहिनेकी शासकसिके लगत तोरा सजाय दियैके अधिकार छै। ऊसब परमेश्वरके सेवक छै, जकरा इहे कारणसे भेज्ल गेलै छे कि ऊसब गलत काम करेवाला आदमीसिके सजाय दै। 5 सेल्याके खाली तोरासिके परमेश्वरके सजायसे बचैले नै, मगर तोरसिके विवेक शुद्ध रहैके लिए भी तोरा ओकरसिके अधिनमे रहे पड्तौ। 6 इहे कारणसे तुहें कर भी दहैं। कहिनेकी शासन करेवाला आदमीसब परमेश्वरके सेवक छै, आर आपन जिम्मेदारीसिके पुरा करैके लिए ऊसब खुदके समर्पण करैछै। 7 सेल्याके जकरा जतनें देना चाही ओकरा सभैके ओतनें दहैं। जकरा कर देना चाही, ओकरा कर दहैं। जकरा महसुल देना चाही, ओकरा महसुल दहैं। जकरा आदर देना चाही, ओकरा आदर दहैं। जकरा सम्मान देना चाही, ओकरा सम्मान दहैं। 8 तोरासिके खाली एकटा बातके कर्जदार होना चाही आर ऊ यी छै कि तुहेंसब एक दोसरासे प्रेम कर। कहिनेकी जे आदमी दोसरसे प्रेम करैछै, ऊ आदमी परमेश्वरके विधि-विधानके पुरा करैछै। 9 कहिनेकी मूसाके विधि-विधानमे बहुते आज्ञासब छै, जेरं कि, “व्यबिचार नैकर, हत्या नैकर, चोरी नैकर, लालच नैकर।” यी सभे आज्ञासब आर सभे दोसर आज्ञासब, इहे एकटा आज्ञामे मिलैछै, “दोसर आदमीसिसे भी ओतनें ही प्रेम कर जतनें तुहें अपने आपसे प्रेम करैछैं।” 10 प्रेम दोसर आदमीसिके खराबी नैकरैछै। सेल्याके जे प्रेम करैछै, ऊ आदमी परमेश्वरके विधि-विधानके पुरा करैछै। ख्रीष्ट फेर वापस आबैके दिन 11 तोरासिमेसे हरेकके एक-दोसरसे प्रेम कर्ते रहना चाही कहिनेकी उटा समय नज्दिक छै जब परमेश्वर अपनासिके यी खराब संसारसे बचैतै। अपनासब ख्रीष्टमे पहेला बेर विश्वास कैलसे एखन यी समय नज्दिक छै। यी बात जानीके, तोरासिके आपन निनसे जागना चाही आर होशियार रहना चाही। 12 यी खराब दुनियाँमे रहैके आपनसिके समय लगभग एकटा रातके जुगुर छै जे लगभग खतम भ्यागेलै छे आर ख्रीष्ट आबैके समय भी नज्दिक ऐल छै। सेल्याके अपनासिके अनहारसे सम्बन्धित सभे काम करैले छोडी देना चाही आर अपनासिके उटा चीजसब कर्ते रहना चाही जे अपनासिके दुष्ट आदमीसिके विरोध करैले सहायता करैछै जेरं कि सिपाही करैछै जे दिनके समय आपन हतियार ल्याके चलैछै। 13 अपनासिके अनहारमे जियेवाला आदमीके जुगुर नै मगर उजेतमे जियेवाला आदमीके जुगुर सही तरिकासे जिना चाही। मौजमजा, पियक्कडपन, व्यबिचार, भ्रष्टाचार, झगडा आर डाहा नैकर। 14 प्रभु येशू ख्रीष्ट तोरसिके हतियार बनौ आर पापी स्वभावके अभिलाषा पुरा करेवाला बातमे ध्यान नैदहैं। |
Kayort (केवट) Bible by The Love Fellowship is licensed under Creative Commons Attribution-ShareAlike 4.0 License.
Beyond Translation