रोमी 1 - केवट नया कारारनमस्कार 1 यी चिट्ठी हमे, पावल लिखैछियै। हमे येशू ख्रीष्टके सेवक छियै, आर चुन्ल आर भेज्ल चेला हुऐके लिए परमेश्वरके द्वारा चुन्ल गेलियै छे आर परमेश्वरके खुश-खबरी सुनाबैके लिए अलग कैल गेलियै छे। 2 परमेश्वर यी खुश-खबरीके विषयमे बहुते पहेला आपन वक्तासिके द्वारा पवित्र धरमशास्त्रमे प्रतिज्ञा कैल्कै रहे। 3 यी खुश-खबरी परमेश्वरके बेटाके विषयमे छै, आपनसिके प्रभु ख्रीष्ट। ऊ आदमी बनिके दाऊद राजाके वंशमे जनम लेल्कै। 4 पवित्र आत्माके शक्तिद्वारा येशू ख्रीष्ट मुर्दासे जिन्दा भेलै। यी तरिकासे परमेश्वर साफसे देखैल्कै छे कि येशू परमेश्वरके बेटा छै। 5 अपनासिके परमेश्वरसे अनुग्रह मिल्लै छे आर येशू ख्रीष्टके द्वारा चुन्ल आर भेज्ल चेलाके काम मिल्लै छे ताकी जात-जातके आदमीसब ख्रीष्टमे विश्वास करे सकै आर ओकर आज्ञापालन करे सकै। यी ओकर नामके लिए आदर आन्तै। 6 रोम सहरमे रहेवाला विश्वासीसब, तोरासिके ऊ आदमीसिमे सामिल कैल गेलौ छे जकरा परमेश्वर येशू ख्रीष्टके हुऐके लिए चुनल्कै छे। 7 हमे यी चिट्ठी रोम सहरमे भेल तुहेंसब सभैके लिखैछियौ जकरा परमेश्वर प्रेम करैछै आर ओकर सन्तसब हुऐके लिए बोलैल छैं: हमे प्रार्थना करैछियौ कि आपनसिके परमेश्वर पिता आर प्रभु येशू ख्रीष्ट तोरासिके अनुग्रह आर शान्ति दौ। 8 सभैसे पहेला, हमे हमर परमेश्वरके येशू ख्रीष्टके द्वारा तोरसिके सभैके लिए धन्यवाद चढाबैछियै, कहिनेकी येशू ख्रीष्टमे भेल तोरसिके विश्वासके बारेमे बहुते जगहमे आदमीसब चर्चा करैछै। 9 हमे पुरा मनसे ओकर बेटाके बारेमे आदमीसिके खुश-खबरी प्रचार करैछियै, आर परमेश्वर हमर गवाही छै कि हमे हमर प्रार्थनासिमे तोरासिके लगातार याद करैछियौ। 10 आर हमे सभे दिन हमर प्रार्थनासिमे बिन्ती करैछियै कि परमेश्वरके इच्छा मुताबिक कोनो ने कोनो तरहसे हमरा अन्तमे तोरसिकेलगत आबैके लिए मौका मिलै। 11 कहिनेकी हमरा तोरसिसे मिलैके बहुते इच्छा छै ताकी तोरासिके विश्वासमे मजगुत बनाबैके लिए हमे तोरासिके परमेश्वरके आत्मासे कुछु आत्मिक आशिष दियौ। 12 हमर कहैके मतलब यी छै कि हमे तोरासिके मजगुत बनैमे सहायता कर्बौ आर तुहेंसब हमरा मजगुत बनैमे सहायता कर्भैं। तुहेंसब मजगुत भ्या जैभैं कहिनेकी तुहेंसब जानैछैं कि हमे केरं विश्वास करैछियै, आर हमे मजगुत भ्याजैबै कहिनेकी हमे जानैछियै कि तुहेंसब केरं विश्वास करैछैं। 13 हे विश्वासी भ्या-बहिनसब, तुहेंसब यी बात जान कहिके हमे चाहैछियौ कि हमे बहुतेबेर तोरसिके भेट करैके इच्छा कैलियौ मगर एखनतक तोरसिकेलगत नैआबे सक्लियौ। हमे गैर-यहूदी आदमीसिके बीचमे जेरंके ख्रीष्टके लिए चेला बनैलियै ओहिने करिके हमे तोरसिके बीचमे काम करैके लिए चाहैछियौ। 14 हमे यूनानी भाषा आर संस्कृति जानेवाला आर नैजानेवाला आदमीसब, बुद्धिमान आर निर्बुद्धि आदमीसिके खुश-खबरी सुनाबैके लिए मजबूरी महसुस करैछियै। 15 सेल्याके हमे तोरासिके भी, जेसब रोम सहरमे रहैछैं, खुश-खबरी सुनाबैके लिए बहुते उत्सुक छियै। धर्मी आदमी विश्वाससे जितै 16 कहिनेकी हमे ख्रीष्टके खुश-खबरीमे गर्व करैछियै। आपन शक्तिसे परमेश्वर ऊ सभे आदमीके उद्धार करैछै जे यी खुश-खबरीपर विश्वास करैछै, सभैसे पहेला यहूदी आदमीसिके आर ऊसब भी जेसब गैर-यहूदी आदमीसब छै। 17 कहिनेकी खुश-खबरीमे परमेश्वर आदमीसिके आपन नजरमे केरंके धर्मी घोषित करैछै कहिके देखाबैछै, आर धर्मी घोषित हुएवाला बात विश्वाससे ही शुरु हैछै आर विश्वाससे ही पुरा हैछै। जेरंके धरमशास्त्रमे लिख्ल छै, “जे आदमी परमेश्वरमे विश्वासके माध्यमसे धर्मी घोषित कैल जैछै, ऊ बचैछै।” अधार्मिकतापर परमेश्वरके क्रोध 18 परमेश्वरके क्रोध आदमीसिके द्वारा कैल ज्यावाला उटा सभेटा भक्तिहीन आर अधर्मी कामसिके विरुद्ध स्वर्गसे प्रकट हैछै। ऊसब खराब काम करिके सचके विरोध करैछै। 19 ऊसब आसानीसे परमेश्वरके बारेमे सही रुपमे बुझे सक्तियै कहिनेकी परमेश्वर यी बात स्पष्ट करिदेल्कै छे। 20 परमेश्वर संसार सृष्टि करैके समयसे ही आदमीसब ओकर कहियो खतम नैहुएवाला शक्ति आर ऊ वास्तवमे परमेश्वर छै कहिके साफसे बुझे सकैछै। यी ईश्वरीय गुणसब अदृश्य छै मगर एकरा चिन्हे सकैछियै, आदमीसब परमेश्वरके सृष्टि कैल चीजसिसे ओकर बारेमे मालुम करे सकैछै। नतिजा स्वरुप, ओकरासिके परमेश्वरके नैचिन्हैके कोनो बहाना नैहैछै। 21 ऊसब परमेश्वरके चिन्हीके भी परमेश्वरके दिएवाला आदर नैदैछै आर धन्यवाद भी नैदैछै। मगर जब ऊसब सोचैछै ओकर कोनो मोल नैहैछै, ओकरसिके मूर्ख विचारसब सभे गलत हैछै। 22 ऊसब अपने आपके बुद्धिमान छियै कहिके दाबी कैल्कै तैय्योपर ऊसब मुर्खे बन्लै। 23 ऊसब सभे दिन जिन्दा रहेवाला महिमित परमेश्वरके आराधना नैकरिके सभे दिन जिन्दा नैरहे सकेवाला आदमी, चिडिया मैना, चार टेंगा जानवर आर घिसरिके चलेवाला जीवसिके रुपमे बनैल मूर्तिसिके आराधना कैल्कै छे। 24 सेल्याके परमेश्वर ओकरासिके ओकरसिके मनके अभिलाषासिके मुताबिक यौन अशुद्धताके लिए छोडिदेल्कै, ताकी ऊसब आपसमे खराब कामसिमे आपन शरीरके अनादर करै। 25 कहिनेकी ऊसब परमेश्वरके विषयमे सच्चाईमे विश्वास करैसे इन्कार करैछै, आर नतिजा स्वरुप ऊसब एकटा झुठपर विश्वास करैछै। सृष्टिकर्ता परमेश्वरके आराधना करैले छोडिके ऊसब परमेश्वरके द्वारा बनैल चीजसिके आराधना आर सेवा कैल्कै। ओकर महिमा सभे दिन हैते रहै। आमेन! 26 सेल्याके परमेश्वर ओकरासिके लाज लागेवाला कामवासनामे छोडिदेल्कै, एत्तेतक कि जनानीसब मरदसिके छोडिके जनानीसिसे शारीरिक सम्बन्ध राखैले शुरु कैल्कै। 27 ओहिने करिके मरदसब भी जनानीसिसे शारीरिक सम्बन्ध राखैले छोडिके मरदसिसे शारीरिक सम्बन्ध राखैले शुरु कैल्कै, नतिजा स्वरुप मरदसब मर्दहैसिसे लजलग्गा काम करिके आपनहैं आपन उप्परमे उटा खराब कामके योग्यके सजाय आनैछै। 28 कहिनेकी ऊसब परमेश्वरके स्वीकार करना मूर्खता सोचल्कै, सेल्याके परमेश्वर भी उटा सभे अनुचित काम करैके लिए ओकरासिके ओकरसिके बेकम्मा मनके वशमे छोडी देल्कै। 29 ऊसब सभे किसिमके पापसे भर्ल छै। ऊसब लोभ आर घृणा करैछै, दोसरके डाहा करैछै आर दोसर आदमीसिके हत्या करैछै। ऊसब झर-झगडा करैछै, छल-कपट करैछै आर झुठ बोलैछै, एक दोसरके चुगलखोरी करैछै, 30 दोसरके बदनाम करैछै। ऊसब परमेश्वरके भी घृणा करैछै, कक्रहौ भी इज्जत नैकरैछै मगर आपनहैं घमण्डसे फुलैछै, डींग मारैछै। आर खराब बातसब खोजी-खोजीके निकालैछै। ऊसब मयाँ-बाबुके बात नैमानैछै। 31 ऊसब मूर्ख छै आर आपन कहेल बात पुरा नैकरैछै आर ऊसब दोसरके कोनो दया-माया नैदेखाबैछै। 32 ऊसब परमेश्वरके यी उचित फैसला जानैछै कि एरं काम करेवाला आदमी मौतके सजाय पाबैके योग्य हैछै, तैय्योपर ऊसब एरं-एरं काम खुद करैछै आर एरं काम करेवाला आदमीसिके समर्थन भी करैछै। |
Kayort (केवट) Bible by The Love Fellowship is licensed under Creative Commons Attribution-ShareAlike 4.0 License.
Beyond Translation