प्रकाश 7 - केवट नया कारार

एक लाख चौवालिस हजार आदमीपर मोहर

^1-2 एकरबाद, हमे चारटा स्वर्गदूतसिके संसारके चारो कोनामे खडा भेल देख्लियै। ऊ स्वर्गदूतसिके संसारके बिपत्तिसिसे हानी पहुँचाबैके परमेश्वरके तरफसे अधिकार मिल्लै रहे, चाहे ऊ समुन्दरमे है या जमिनमे। ऊसब संसारके चारो कोनासिसे हावाके रोकी देल्कै, ताकी समुन्दरमे, जमिनमे आर गाछमे हावा नैचलै। हमे आरहौ एकटा स्वर्गदूतके पुरुब दिशामे प्रकट हैते देख्लियै। ओकरलगत जिन्दा परमेश्वरके एकटा मोहर रहै। ऊ स्वर्गदूत बडका आवाजसे ऊसब चारटा स्वर्गदूतसिके बोलैल्कै आर कहैल्कै,

³ “जबतक हमेसब हमरसिके परमेश्वरके सेवकसिके मथामे मोहर नैलग्या दियै, ताकी ऊसब उटा बिपत्तिसिसे पीडित नैहै, तबतक धर्ती, समुन्दर आर गाछसिके नाश नैकरिहैं।”

⁴ जब स्वर्गदूतसब निशान लगाबैके काम पुरा करि लेल्कै ते, कोय हमरा बतैल्कै कि ऊ आदमीसब जकर मथामे स्वर्गदूतसब परमेश्वरके मोहरसे निशान लगैल्कै छे, ओकरसिके संख्या एक लाख चौवालिस हजार रहै। यी आदमीसब इस्राएलके सभे बारहटा कुलसिमेसे रहै।

⁵ स्वर्गदूतसब यहूदा कुलसे बारह हजार आदमीसिपर, रुबेनके कुलसे बारह हजार आदमीसिपर, गादके कुलसे बारह हजार आदमीसिपर,

⁶ आशेरके कुलसे बारह हजार आदमीसिपर, नप्तालीके कुलसे बारह हजार आदमीसिपर, मनश्शेके कुलसे बारह हजार आदमीसिपर,

⁷ शिमियोनके कुलसे बारह हजार आदमीसिपर, लेवीके कुलसे बारह हजार आदमीसिपर, इस्साखारके कुलसे बारह हजार आदमीसिपर,

⁸ जबुलुनके कुलसे बारह हजार आदमीसिपर, योसेफके कुलसे बारह हजार आदमीसिपर, बेन्यामिनके कुलसे बारह हजार आदमीसिपर मोहरके निशान लगैल्कै।

उजरा कपडा लगैल बडका भीड

⁹ एकरबाद हमे देख्लियै कि आदमीसिके एकटा एतनें बडका भीड रहै कि कोय भी ऊ सभैके नै गिने सक्ते रहै। ऊसब संसारके हरेक जातसब, हरेक कुलसब, हरेक देशके आदमीसब आर हरेक भाषासिसे रहै। ऊसब सिंहासन आर बलि-भेंडाके समनामे खडा रहै। ऊसब उजरा कपडा पिन्हल रहै आर हरेक आदमी आपन-आपन हातमे खजुरके ठ्यार पकडले रहै जे कि ओकरसिके आदरके चिन्ह रहै।

¹⁰ आर ऊसब जोर-जोरसे कहते रहै, “या अपनासब आपन परमेश्वरके स्तुति करियै, जे सिंहासनमे बैठ्ल छै आर या अपनासब ओकर भी स्तुति करियै, जकरा बलि-भेंडा कहेल जैछै कहिनेकी उहे ही छै जे अपनासिके आपनसिके पापसिके न्यायसे बचैल्कै छे।”

¹¹ सभे स्वर्गदूतसब सिंहासनके चारो बगल आर धरमगुरुसिके आर चारो जिन्दा प्राणीके चारो बगल खडा रहै। आर ऊसब सिंहासनके समनामे झुकिके एरं कहिके परमेश्वरके आराधना कैल्कै,

¹² “हमेसब घोषणा करैछियै कि हमरसिके परमेश्वर महान, शक्तिशाली, प्रतापी आर ज्ञानवान छै। या अपनासब सभे दिनके लिए ओकर प्रशंसा करियै आर ओकरा धन्यवाद दियै। आमेन!”

¹³ तकरबाद धरमगुरुसिमेसे एकझन हमरा पुछल्कै, “यी उजरा कपडा लगाबेवालासब के छै आर कतेसे ऐलै छे?”

¹⁴ तब हमे ओकरा कहैलियै, “हे हौ सरकार, हमे नैजानैछियै मगर तुहें जानैछ।” ऊ हमरा कहैल्कै, “यीसब ऊ आदमीसब छै जेसब महाकष्टके अनुभव कैल्कै छे। यीसब आपन कपडाके बलि-भेंडाके खूनसे धोय लेल्कै छे आर आब ऊसब उजरा भ्यागेलै छे, एकर मतलब यी छै कि ओकरसिके पापसिके मेट्या देल गेलै छे।

¹⁵ इहे कारणसे ऊसब परमेश्वरके सिंहासनके समनामे खडा छै, आर ऊसब हर समय दिन आर रात परमेश्वरके मन्दिरमे ओकर सेवा करैछै, आर ऊ जे सिंहासनमे बैठैछै, ओकरसिके बीचमे रहतै आर ओकरसिके सुरक्षा कर्तै।

¹⁶ ओकरासिके कहियो भुख आर प्यास नैलाग्तै, सुरुज ओकरासिके फेर कहियो नै जरैतै, नैते कोनो लु ओकरासिके लाग्तै।

¹⁷ कहिनेकी बलि-भेंडा जे सिंहासनके बीचमे छै, ओकरसिके देखभाल कर्तै ओहिने करिके जेरंके एकटा चरवाहा आपन भेंडाके देखभाल करैछै, आर ओकरासिके ताजा पानी पियैके लिए ल्याजैतै जे आदमीसिके जीवन दैछै, आर परमेश्वर ओकरसिके आँखीसे सभे लोर पोछि देतै।”