प्रकाश 6 - केवट नया कारार

मोहरसिके रहस्य

¹ फेर हमे देख्लियै कि बलि-भेंडा उटा सातटा मोहरसिमेसे एकटाके खोलल्कै, आर हमे चारोटा जिन्दा प्राणीसिमेसे एकटाके बोलैते सुन्लियै। ओकर आवाज बडका गडगडाहटके जुगुर रहै। ऊ कहैल्कै, “आब जो, आगु बढ।”

² तब हमे एकटा उजरा रंगके घोडा देख्लियै, ओकरापर सवार हुएवालाके संगमे एकटा धनुष रहै, आर ओकरा एकटा मकुट देल गेलै, आर ऊ स्वर्गसे बाहार निक्लीके धर्तीमे गेलै, ओकर जुगुर जे पहेलासे ही विजय पाबि लेल्कै छे आर फेरसे विजय हैतै।

³ जब बलि-भेंडा दोसर मोहर खोलल्कै ते, दोसर जिन्दा प्राणीके यी कहते सुन्लियै, “आब जो, आगु बढ।”

⁴ तब चमकदार लाल घोडा उटा जगहसे बाहार ऐलै जते सिंहासन रहै। परमेश्वर ऊ घोडसवारके धर्तीमे आदमीसिके एक दोसरसे लडवाबैके शक्ति देल्कै, ताकी ऊसब लडाईमे एक दोसरके जान मारि दै। यी मकसदके लिए परमेश्वर यी घोडसवारके एकटा बडका तलवार भी देल्कै।

⁵ जब बलि-भेंडा तेसर मोहर खोलल्कै, ते हमे तेसर जिन्दा प्राणीके यी कहते सुन्लियै, “आब जो, आगु बढ।” तब हमे देख्लियै कि एकटा करिया घोडा बाहार ऐलै आर घोडसवारके हातमे एकटा तराजु रहै।

⁶ हमे सुन्लियै कि उटा चारटा जिन्दा प्राणीके बीचमे से कोय बोल्ते रहै जे एकटा आदमीके जुगुर रहै, “भविष्यमे धर्तीपर अकाल हैतै आर सेल्याके एकटा चानीके सिक्कामे एक किलो गहुम आर तीन किलो ज किनैके लिए काफी हैतै। मगर तेल आर अंगुरके मद्दके कमी नैहैतै।”

⁷ जब बलि-भेंडा चौथा मोहर खोलल्कै, हमे चौथा जिन्दा प्राणीके यी कहते सुन्लियै, “आब जो, आगु बढ।”

⁸ तब हमे एकटा प्राणघातक हर्दिहा रंगके घोडा देख्लियै, आर घोडाके सवारी करेवालाके मौत कहेल जैछै। आर नरक ओकर पाछु-पाछु बहुते नज्दिक चल ऐते रहै। ओकरासिके धर्तीमे रहेवाला हरेक चार आदमीसिमेसे एकटा आदमीके जान मारैके अधिकार मिल्लै। ऊसब आदमीसिके तलवारसे जान मारल्कै, ऊसब आदमीसिके भूखसे जान मारल्कै, ऊसब आदमीसिके खराब-खराब बेमारीसिसे जान मारल्कै आर ऊसब आदमीसिके जंगली जानवरसिसे भी जान मरवैल्कै।

⁹ जब बलि-भेंडा पचमा मोहर खोलल्कै, तब हमे वेदीके निच्चामे देख्लियै, ओत्ते ऊ आदमीसिके आत्मासब रहै, जेसब मार्ल गेलै रहे कहिनेकी ऊसब परमेश्वरके वचनके घोषणा कैल्कै रहे आर ऊसब येशू ही ओकरसिके प्रभु छै कहिके आपन विश्वाससे पाछु नैहट्लै रहे।

¹⁰ तब ऊसब जोर-जोरसे परमेश्वरसे कहैल्कै, “हे पवित्र आर सच्चा प्रभु, तुहें धर्तीमे रहेवाला ऊ दुष्ट आदमीसिके सजाय दियैमे एतनें लम्बा इन्तजार कहिने करैछ? हमेसब बिन्ती करैछिहौं कि तुहें ऊ आदमीसिके व्यवहारके बदला ल्या जेसब हमरसिके हत्या कैल्कै छे।”

¹¹ ओकरासिमेसे हरेकके एकटा उजरा कपडा देल गेलै आर परमेश्वर ओकरासिके कहैल्कै, “एखनके लिए आराम कर, कहिनेकी एखन भी तोरसिके सहकर्मी आर तोरसिके साथी विश्वासीसब छै जकरासिके तोरेसिके जुगुर जान मार्ल जैतै। जब जान मार्ल ज्यावालासिके संख्या पुरा भ्याजैतै, तभे हमे बदला लेबै।”

¹² आर हमे बलि-भेंडाके छठमा मोहर खोल्ते देख्लियै। तब एकटा बहुते बडका भूकम्प भेलै, आर सुरुजके रंग मोटका करिया कम्बलके जुगुर करिया रंगमे बदली गेलै आर पुरे चानके रंग खूनके जुगुर लाल भ्यागेलै।

¹³ आकाशसे तारासब धर्तीमे एरंके खस्लै जेरं कि अन्जीरके गाछसे कच्चा फल गिरैछै, जब अन्हर ओकरा हिलाबैछै।

¹⁴ आकाश उटा किताबके जुगुर गायब भ्यागेलै जकरा लपेटी लेल जैछै आर सभे पहाड आर समुन्दरके सभे टापूसब आपन जगहसे हटी गेलै।

¹⁵ नतिजा स्वरुप धर्तीके सभे आदमीसब जकरामे राजासब, राजकुमारसब, शासकसब, मातबरसब, बलवानसब, हरेक दाससब आर जे दाससब नैछै सभे आदमीसब पहाडके गुफासब आर चट्टानमे जैके नुकैलै।

¹⁶ आर ऊसब पहाडसब आर चट्टानसिके कहे लाग्लै, “हमरासिपर खस आर सिंहासनमे जे बैठ्ल छै ओकर नजरसे हमरासिके नुका। आर बलि-भेंडाके सजायसे नुक्या ले।

¹⁷ कहिनेकी उटा भयानक दिन आबी गेलै छे जब परमेश्वर आर बलि-भेंडा सभैके सजाय देतै आर कोय भी यी सजायसे बचे नैसक्तै।”