प्रकाश 5 - केवट नया कारार

मोहर लाग्ल किताब आर बलि-भेंडा

¹ आर जे सिंहासनपर बैठ्ल रहै, हमे ओकर दहिना हातमे एकटा किताब देख्लियै, एकरामे दोनो बगलसे लिख्ल रहै आर उटा सातटा मोहर लग्याके बन्द कैल रहै।

² तब एकटा शक्तिशाली स्वर्गदूतके बडका आवाजमे एरं कहते हमे देख्लियै, “यी किताबके मोहरसिके तोडैके आर एकरा खोलैके अधिकार ककर लगत छै?”

³ मगर स्वर्गमे या धर्तीमे या धर्तीके निच्चामे कोय भी उटा किताबके खोलैके या ओकरामे जे लिख्ल रहै ओकरा पढैके योग्य नैरहै।

⁴ तब हमे बहुते जोर-जोरसे कान्लियै, कहिनेकी उटा किताबके खोलैके या ओकरामे जे लिख्ल रहै ओकरा पढैके योग्य कोय नैरहै।

⁵ तब धरमगुरुसिमेसे एकझन हमरा कहैल्कै, “नैकान। देख्, ऊ यहूदा कुलके शेर छै, ऊ दाऊद राजाके वंश छै जे शैतानपर विजय पैल्कै छे आर उहे ही यी किताबके सातटा मोहरसिके तोडैके आर एकरा खोलैके योग्य छै।”

⁶ तब हमे एकटा बलि-भेंडाके देख्लियै जे सिंहासन आर चारटा जिन्दा प्राणीसिके आर चौबीसटा धरमगुरुसिके बीचमे खडा रहै। बलि-भेंडाके शरीरपर एरंको चिन्ह रहै जेरं कि ओकरा पहेला जान मार्ल गेलै रहे। ओकर सातटा सिङ आर सातटा आँख रहै, यी सात आत्मासब छै जे परमेश्वरके सिंहासनके समनामे छै, जे सारा धर्तीमे भेज्ल गेलै छे।

⁷ बलि-भेंडा आबिके ओकर दहिना हातसे जे सिंहासनमे बैठ्ल रहै, उटा किताबके ल्या लेल्कै,

⁸ जब ऊ उटा किताब लेल्कै ते, ऊ चारोटा जिन्दा प्राणी आर चौबीसोटा धरमगुरुसब बलि-भेंडाके समनामे झुकी गेलै। आर हरेक धरमगुरुसब एकटा वीणा आर सोनासे बन्ल बाटी पकडले रहै। बाटी धुपसे भर्ल रहै, जे ऊ आदमीसिके प्रार्थनाके देखाबैछै जेसब परमेश्वरके सेवा करैछै।

⁹ ऊसब यी नया गीत बलि-भेंडा यानिकी येशू ख्रीष्टके विषयमे गाबैछै, “तोरलगत यी किताबके खोलैके लिए मोहरसिके लियैके आर तोडैके अधिकार छै, कहिनेकी तोर जान मारि देल गेल्हौं रहे आर आपन मौतके खूनसे तुहें हरेक कुलसब, हरेक भाषासब, आदमी आर हरेक जात-जातके आदमीसे, परमेश्वरके लिए आदमीसिके मोल चुक्याके किनि लेलह छे।

¹⁰ आर ओकरासिके हमरसिके परमेश्वरके लिए तुहें राजासब बनैलह, तुहें ओकरासिके पुजारीसब बनैलह जेसब हमरसिके प्रभु परमेश्वरके आराधनाके काम करैछै आर ऊसब धर्तीमे राजासिके जुगुर राज्य कर्तै।”

¹¹ जब हमे फेरसे देख्लियै ते, अचानकसे लाखो-लाख स्वर्गदूतसिके आवाज सुन्लियै, ओकरसिके गन्ती नैकैल ज्या सक्ते रहै। ऊसब राजाके उटा सिंहासनके, ऊ चारटा जिन्दा प्राणीसिके आर ऊ चौबीसटा धरमगुरुसिके चारो बगल रहै।

¹² ऊसब जोर-जोरसे गैते रहै, “ऊ बलि-भेंडा जकर जान मारि देल गेलै रहे, ऊ महिमाके योग्य छै। ओकर अधिकार महान छै। ओकर बुद्धि गहरा छै। ऊ बहुते शक्तिशाली छै आर ऊ बहुते मातबर छै। या अपनासब ओकर आदर करैछियै। या अपनासब ओकर प्रशंसा करैछियै।”

¹³ फेर हमे स्वर्गमे, धर्तीमे, धर्तीके निच्चा आर समुन्दर आर ओत्ते भेल सभे प्राणीके एरं कहते सुन्लियै, “या अपनासब ओकर प्रशंसा करियै जे सिंहासनमे बैठ्ल छै। या अपनासब बलि-भेंडाके महिमा करैछियै। या अपनासब सभे दिनके लिए ओकर आदर करैछियै आर ओकरा सम्मान दियै, कहिनेकी ऊ सभैसे बेसी शक्तिशाली छै।”

¹⁴ तब ऊ चारो जिन्दा प्राणी कहैल्कै, “आमेन।” तब ऊ धरमगुरुसब झुकिके आराधना कैल्कै।