प्रकाश 4 - केवट नया कारार

स्वर्गके दर्शन

¹ यी सभे बात देख्लके बाद, हमे स्वर्गमे एकटा खुल्ल केबाड देख्लियै आर कोय हमरासे बात कर्ते रहै आर बोलेवाला उहे रहै, जकर आवाज हमे पहेला भी सुन्लियै रहे, जकर आवाज धुतहुकके फुकैके आवाज जुगुर रहै। आर ऊ हमरा कहैल्कै: “हमरलगत एत्ते उप्पर या, आर आब एकरबाद जे बातसब हुए पड्तै से हमे तोरा देखैबौ।”

² तखनिहैं पवित्र आत्मा हमरा अगुवाई कैल्कै। हमे स्वर्गमे एकटा सिंहासन आर उटा सिंहासनपर कक्रहौ बैठ्ल देख्लियै।

³ ऊ जे सिंहासनपर बैठ्ल रहै, ऊ बहुमूल्य पत्थलके जुगुर दिखाई देते रहै, जकरा सूर्यकान्त आर गोमेद पत्थल कहेल जैछै। उटा सिंहासनके चारो बगल एकटा मेघ-धनुष रहै आर यी देखैमे मरकत पत्थलके जुगुर रहै।

⁴ उटा सिंहासनके चारो बगल चौबीसटा दोसर सिंहासनसब रहै आर मथामे सोनाके मकुटसब आर उजरा कपडासब लगैल चौबीसटा धरमगुरुसब उटा सिंहासनमे बैठ्ल रहै।

⁵ उटा सिंहासनसे बिजली चमकते रहै आर मेघ-गर्जनके जुगुर गडगडाहटके आवाज निकल्ते रहै आर उटा सिंहासनके समनामे सातटा चिरागसब बर्ते रहै जे परमेश्वरके सात आत्मासिके देखाबैछै।

⁶ उटा सिंहासनके समनामे एकटा फर्स रहै जे समुन्दरके जुगुर चौडा रहै आर जे सिसाके जुगुर साफ रहै। आर सिंहासनके चारो बगल चारटा जिन्दा प्राणी रहै, जकर शरीर पुरा तरहसे आँखे-आँखसे भर्ल रहै।

⁷ यी जिन्दा प्राणीसिमे से पहेला प्राणी शेरके जुगुर दिखाई देते रहै। दोसर प्राणी गरुके जुगुर दिखाई देते रहै, तेसर प्राणीके चेहरा आदमीके जुगुर दिखाई देते रहै आर चौथा प्राणी उड्ते रहेवाला गरुडके जुगुर दिखाई देते रहै।

⁸ आर उटा चारोटा जिन्दा प्राणीके छ-छटा डेन रहै, आर ओकरासिपर सभे जगहमे आँख रहै एत्तेतक कि डेनके निच्चा भी रहै। आर दिन-रात ऊसब नैरुकिके एरं कहते रहै, “पवित्र, पवित्र, पवित्र प्रभु परमेश्वर जे सर्वशक्तिमान छै। ऊ उहे परमेश्वर छै जे समयके शुरुआतसे ल्याके एखनतक आर सभे दिनके लिए नैबदलैछै।”

^9-10 जे सिंहासनपर बैठ्ल छै, ऊ उहे छै जे सभे दिनके लिए जिन्दा रहैछै। जब भी जिन्दा प्राणीसब ओकरा महिमा आर आदर आर धन्यवाद दैछै, ते चौबीसोटा धरमगुरु ओकर समनामे गिरी जैछै आर ओकर आराधना करैछै। ऊसब यी कहते हुए सिंहासनके समनामे आपन-आपन मकुट राखी दैछै,

¹¹ “हे हमरसिके प्रभु परमेश्वर, तुहें सभे चीजसिके सृष्टि कैलह छे। तोरे इच्छाके मुताबिक उटा सभे चीज बनैल गेलै छे आर उटा सभे अस्तित्वमे छै। इहे कारणसे तुहें महिमा, आदर आर शक्ति ग्रहण करैके योग्य छह।”