प्रकाश 22 - केवट नया कारारजीवनके पानीके लद्दी 1 तब स्वर्गदूत हमरा एकटा लद्दी देखैल्कै जकरामे जीवनके पानी रहै। पानी सिसाके जुगुर साफ रहै। उटा पानी परमेश्वर आर बलि-भेंडाके सिंहासनसे बहते रहै। 2 लद्दी परमेश्वर आर बलि-भेंडाके सिंहासनसे बहते रहै आर सहरके चौडा सडकसे बहते रहै। उटा लद्दीके हरेक किनारमे जीवन दिएवाला गाछ लगैल रहै, जे हरेक साल बारह बेर फल देते रहै यानिकी हरेक महिनामे एकबेर। संसारके जात-जातके आदमीसब ओकर पत्तासिके उपयोग आपन बेमारीके इलाजके लिए करैछै। 3 कुछु भी जे परमेश्वरके श्रापके अधिनमे छै सहरमे नैहैतै। परमेश्वर आर बलि-भेंडाके सिंहासन सहरमे हैतै आर परमेश्वरके सेवकसब ओकर आराधना कर्तै। 4 ऊसब परमेश्वरके अमना-समनामे देख्तै आर परमेश्वरके नाम ओकरसिके कपारमे लिख्ल हैतै। 5 आर ओत्ते कहियो भी रात नैहैतै। जे आदमीसब ओत्ते रहैछै, ओकरासिके आपन रस्तामे उजेत करैके लिए चिरागके कोनो भी जरुरत नैछै। आर नैते ओकरासिके उजेत दियैके लिए सुरुजके जरुरत छै, कहिनेकी परमेश्वर ही छै, जे आदमीसिके लिए उजेत दैछै। आर यी आदमीसब जेसब ओत्ते रहैछै ऊसब सभे दिनके लिए राज्य कर्तै। 6 तब स्वर्गदूत हमरा कहैल्कै, “यी सभे बातसब जे तोरासिके बतैल गेलौ छे, सच छै, आर पुरा तरहसे विश्वास करैके योग्य छै। कहिनेकी प्रभु परमेश्वर जे आपन वक्तासिके मनसिके निर्देशन करैके लिए आपन आत्मा देल्कै रहे, उहे ही छै जे हमरा जे कि ओकर स्वर्गदूत छियै, तोरा उटा बात बताबैके लिए भेजल्कै छे जे जल्दी ही हैतै।” 7 येशू कहैछै, “हमे जल्दी ही आबैछियै। यी किताबमे लिख्ल भविष्यवाणीके बातसिके पालन करेवालासब धन्यके छै।” 8 हमे, यूहन्ना यी सभे बातसब सुन्लियै छे आर देख्लियै छे आर हमे ओकरासिके देख्ल आर ओकर बात सुन्लके बाद हमरा यी सभे बात देखाबेवाला स्वर्गदूतके आराधना करैके लिए हमे ओकर पैरीमे गिरी गेलियै। 9 मगर ऊ हमरा कहैल्कै, “देख्, तुहें एरं नैकर! हमे ते तोर, आर तोर विश्वासी भ्यासब जे परमेश्वरके वक्तासब आर यी किताबके वचन पालन करेवालासिके जुगुर परमेश्वरके सेवक छियै। परमेश्वरके ही गोड लागिके ओकरा आराधना कर।” 10 तब ऊ हमरा कहैल्कै, “यी किताबके भविष्यवाणीके सन्देशसिके गुप्त नैराख। कहिनेकी यी बातसिके पुरा हुऐके समय नज्दिक आबी गेलै छे। 11 जे कोय भी खराब आर घिनलग्गा काम करैछै ओकरासिके आपन खराब आर घिनलग्गा कामसिके कर्ते रहे दहैं। अहिने करिके जे कोय भी बढियाँ आर पवित्र काम करैछै ओकरासिके आपन बढियाँ आर पवित्र कामसिके कर्ते रहे दहैं।” 12 तब प्रभु येशू कहैल्कै, “देख्, हमे जल्दी ही ऐबै। सभे आदमीसब जे भी कैल्कै छे ओकरसिके कैल कामके मुताबिक हमे या ते इनाम दियैके लिए या ते सजाय दियैके लिए आबैछियै। 13 हम्हीं छियै जे सभे चीजसिके शुरुआत कैलियै आर हम्हीं छियै जे सभे चीजसिके समाप्त कर्बै। हमे उहे परमेश्वर छियै जे समयके शुरुआतसे ल्याके एखनतक आर सभे दिनके लिए नैबदलैछियै। 14 आपन कपडा धोयके साफ राखेवालासब धन्यके छै, कहिनेकी ओकरासिके सहरके केबाडसे प्रवेश करैके अधिकार देल जैतै। आर ओकरासिके उटा गाछके फल खैके भी अधिकार देल जैतै जे जीवन दैछै। 15 मगर ऊ आदमीसब जे दुष्ट काम करैछै, जादु-टोना करैछै, जेसब व्यबिचार करैछै, आर मूर्तिसिके पूजा करैछै या ऊसब जे झुठ बोलैछै, ऊसब कहियो भी सहरमे प्रवेश नैकरे सक्तै। 16 हमे, येशू आपन स्वर्गदूतके तोरलगत मण्डलीसिके आदमीसिके यी बातसिके घोषणा करैके लिए भेज्लियै छे। हमे दाऊद राजाके वंशके छियै, हमे ही छियै, जे उटा ताराके जुगुर छियै जे सुरुज उगैके समयमे प्रकट हैछै।” 17 परमेश्वरके आत्मा आर कनियाँ उत्तर देल्कै यानिकी ऊ आदमीसब जे येशूसे सम्बन्धित छै ऊसब कहैल्कै, “आब।” जे भी यी शब्दके सुनैछै ओकरा भी यी कहना चाही, “आब।” जे कोय भी प्यास्ल छै, ऊ एत्ते आबक। उटा पानीके पी जे जीवन दैछै, जे कि ऊ सभैके फोकटमे देल जैछै जे एकरा पियैले चाहैछै। चेतावनी 18 हमे, यूहन्ना हरेक ऊ आदमीके चेतावनी दैछियै जे यी बातसिके विषयमे सन्देशके सुनैछै, जे एखन हैछै आर भविष्यमे हैतै जे बात हमे यी किताबमे लिख्लियै छे। यदि कोय भी यी सन्देशमे कुछु बढाबैछै ते, परमेश्वर तोर सजायके बढ्या देतौ। ऊ तोरासिके उटा बिपत्तिसिसे मार्तौ जकर बयान हमे यी किताबमे कैलियै छे। 19 आर यदि तुहें यी किताबके भविष्यवाणीके सन्देशसिमे से कुछु भी निकालैछैं ते, परमेश्वर तोरासे उटा आशिषसिके ल्यालेतौ जकर बयान यी किताबमे कैल गेलै छे। परमेश्वर ओकरा पवित्र सहरमे प्रवेश करैके आर गाछके फल खैके अनुमति नैदेतै जे जीवन दैछै। 20 येशू यी सभे वचनसिके गवाही दैछै आर कहैछै, “हँ, हमे जल्दी ही आबैछियै।” हमे यूहन्ना जबाब देलियै, “आमेन, हे प्रभु येशू, आब।” 21 हमे प्रार्थना करैछियै कि प्रभु येशू, परमेश्वरके आदमीसिपर अनुग्रह करै! आमेन। |
Kayort (केवट) Bible by The Love Fellowship is licensed under Creative Commons Attribution-ShareAlike 4.0 License.
Beyond Translation