प्रकाश 21 - केवट नया कारारनया आकाश आर नया धर्ती 1 एकरबाद हमे नया आकाश आर नया धर्ती देख्लियै। कहिनेकी पुरना आकाश आर धर्ती समुन्दर समेत गायब भ्यागेलै। 2 हमे पवित्र सहरके भी देख्लियै, जे कि नया यरूशलेम सहर छै, जे स्वर्गसे परमेश्वरके तरफसे निच्चा आबैछै। उटा सहरके एकटा कनियाँके जुगुर तैय्यार कैल गेलै रहे, जकरा कपडा पिन्हैल गेलै छे आर सिंगार कैल गेलै छे आर जे दुलहाके संगे बिहा करैके लिए तैय्यार छै। 3 फेर हमे एकटा आवाज सुन्लियै जे परमेश्वरके सिंहासनसे जोरसे बोल्लै, “देख, परमेश्वरके निवास आब आदमीसिके बीचमे छै, परमेश्वर ओकरसिके संगे रहतै। ऊसब परमेश्वरके आदमीसब हैतै। ऊ खुद ओकरासिके आपन आदमीसिके रुपमे स्वीकार कर्तै आर ऊ ओकरसिके संगे रहतै आर ऊसब भी ओकरा आपन परमेश्वरके रुपमे स्वीकार कर्तै। 4 परमेश्वर ओकरसिके आँखीसे सभे लोर पोछि देतै। कोय भी आदमी कहियो नैमर्तै या कहियो भी दुःख महसुस नैकर्तै या नैकान्तै या दरदके अनुभव नैकर्तै। कहिनेकी पुरना संसार आब अस्तित्वमे नैछै।” 5 तब सिंहासनमे विराजमान भेल परमेश्वर हमरा कहैल्कै, “देख, आब हमे सभे बात नया बनैबै।” ऊ हमरा एरं भी कहैल्कै, “यी बात लिख, जे हमे कहैछियौ तुहें उटा बात पर विश्वास करे सकैछैं। यी बातसब निश्चित रुपसे हैतै।” 6 तब ऊ हमरा कहैल्कै, “आब सभे कुछु समाप्त भ्यागेलै छे। हम्हीं छियै जे सभे चीजसिके शुरुआत कैलियै आर हम्हीं छियै जे सभे चीजसिके समाप्त कर्बै। हमे उहे परमेश्वर छियै जे समयके शुरुआतसे ल्याके एखनतक आर सभे दिनके लिए नैबदलैछियै। जे कोय भी प्यास्ल छै, हमे ओकरा उटा पानीके मोकासे फोकटमे पानी पियैके लिए देबै जे कहियो खतम नैहुएवाला जीवन दैछै। 7 जे आदमीसब शैतानपर जित हासिल करैछै ऊ हमरद्वारा यी सभे आशिषसब प्राप्त कर्तै। हमे ओकर परमेश्वर हैबै आर ऊ हमर बेटा हैतै। 8 मगर जे हमरापर विश्वास नैराखैछै, ओकरासिके जबरजस्ती गन्धकसे जरेवाला उटा तालाबमे फेक्ल जैतै, जे कि दोसर मौत छै। आर यी नतिजा ओकरसिके भी हैतै, जेसब आदमीसिके समनामे हमरा स्वीकार करैसे डराबैछै, खराब कामसब करैछै, जेसब हत्यारासब छै, जेसब व्यबिचार करैछै, जादु-टोना करैछै आर मूर्तिसिके पूजा करैछै या झुठ बोलैछै।” नया यरूशलेम सहर 9 तब फेर ऊ सातटा स्वर्गदूतसिमेसे एकझन जेसब आदमीसिपर सातटा अन्तिम बिपत्तिसिसे भर्ल सातटा बाटी उझल्लकै रहे, हमरासे बात कैल्कै, ऊ कहैल्कै, “या, हमे तोरा कनियाँ देखैबौ जकर जल्दी ही बलि-भेंडाके संगे बिहा भ्याजैतै।” 10 तब पवित्र आत्माके शक्तिके द्वारा हमरा स्वर्गदूतके अगुवाईमे एकटा बहुते बडका पहाडमे लजैल गेलै, आर स्वर्गदूत हमरा स्वर्गसे परमेश्वरके तरफसे निच्चा महर ऐते पवित्र सहर यरूशलेम देखैल्कै। 11 यी सहर परमेश्वरके तरफसे मिलेवाला तेज रोशनीसे चमकते रहै। यी सहरके चमक किमती पत्थल सूर्यकान्तके जुगुर चमकते रहै, आर सिसाके जुगुर साफ रहै। 12 यी सहरके चारो बगल एकटा बहुते उच्च दिवाल रहै। आर सहरमे बारहटा केबाड रहै। आर ओकरामेसे हरेक केबाडमे एकटा स्वर्गदूतके पहरा रहै। उटा केबाडमे इस्राएलके बारह कुलके नाम लिख्ल रहै। 13 सहरके हरेक दिशामे पुरुब, पच्छिम, उत्तर आर दक्षिणमे तीनटा केबाड रहै। 14 सहरके दिवाल बारहटा बडका-बडका पत्थलसिपर बन्ल रहै आर हरेक पत्थलपर बलि-भेंडाके बारहटा चुन्ल आर भेज्ल चेलासिमेसे एक-एकटाके नाम लिख्ल रहै। 15 ऊ स्वर्गदूत जे हमरसे बात कैल्कै ओकर हातमे यी सहर आर एकर केबाड आर एकर दिवालके नापैके लिए एकटा सोनाके नापेवाला लग्गा रहै। 16 यी सहर चौखूट रहै आर ओकर लम्बाई आर चौडाई एक समान रहै। स्वर्गदूत आपन नापेवाला लग्गासे सहरके नापल्कै ते ओकर लम्बाई दी हजार चार स किलोमिटर रहै। एकर चौडाई आर उचाई एकर लम्बाईके जतनें ही रहै। 17 ऊ स्वर्गदूत सहरके दिवालके भी नापल्कै ते एकर ऊँचाई लगभग छियासठ मिटर रहै। जे नापके स्वर्गदूत प्रयोग कैल्कै, उटा आदमीसिके द्वारा प्रयोग कैल ज्यावाला नापके जुगुर ही रहै। 18 यी सहर शुद्ध सोनासे बनैल गेलै रहे जे सिसाके जुगुर चमकते रहै आर एकर दिवाल सूर्यकान्त पत्थलसे बन्ल रहै। 19 ऊ सहरके जग हरेक किसिमके किमती पत्थलसे सजैल रहै। जगके पहेला पत्थल सूर्यकान्तके, दोसर नीलमके, तेसर गोदन्तीके, चौथा मरकतके, 20 पच्मा सुलेमानीके, छठमा गोमेदके, सतमा स्वर्णमणीके, अठमा पेरोज, नम्मा पुखराजके, दशमा लहसनियाँके, एगारमा धुम्रकान्तके आर बारहमा चन्द्रकान्तके रहै। 21 बारहटा केबाड भी एक-एकटा मोतीसे बन्ल रहै आर सहरके रस्तासब शुद्ध सोनासे बनैल गेलै रहे जे सिसाके जुगुर चमकते रहै। नया यरूशलेम सहरके महिमा 22 हमे उटा सहरमे कोनो परमेश्वरके मन्दिर नैदेख्लियै कहिनेकी सर्वशक्तिमान परमेश्वर आर बलि-भेंडा उटा सहरमे छै। इहे ल्याके ओत्ते मन्दिरके कोनो जरुरत नैछै। 23 उटा सहरके उजेतके लिए सुरुज आर चानके जरुरत नैछै। कहिनेकी परमेश्वरके महिमा उटा सहरमे चम्कैछै आर बलि-भेंडा ही छै जे एकरा उजेत बनाबैछै। 24 उटा सहरके चमक संसारमे रहेवाला जात-जातके आदमीसिके उजेत दैछै आर धर्तीके सभे राजासब आपन-आपन शान-शौकतके उटा सहरमे आन्तै। 25 उटा सहरके केबाड दिनभर खुल्ला रहैछै। केबाडसब कहियो बन्द नैहैछै कहिनेकी ओत्ते कहियो रात नैहैतै। 26 संसारके जात-जातके आदमीसब आपन मान-आदर आर शान-शौकतके उटा सहरमे ल्याके ऐतै। 27 मगर कोनो भी गन्दा काम करेवाला उटा सहरमे प्रवेश नैकर्तै। कोय भी जे खराब काम करैछै या जे झुठ बोलैछै ओत्ते प्रवेश नैकर्तै। ओत्ते खाली उहे आदमीसब प्रवेश करे सक्तै जकर नाम बलि-भेंडाके जीवनके किताबमे लिख्ल गेलै छे, यी उटा किताब छै जकरामे ऊ आदमीसिके नाम लिख्ल छै जकर लगत कहियो खतम नैहुएवाला जीवन छै। |
Kayort (केवट) Bible by The Love Fellowship is licensed under Creative Commons Attribution-ShareAlike 4.0 License.
Beyond Translation