प्रकाश 18 - केवट नया कारार

बेबिलोनके पतन

¹ एकरबाद, हमे आरहौ एकटा स्वर्गदूतके स्वर्गसे उतरिके निच्चा ऐते देख्लियै। ओकरलगत बडका अधिकार रहै आर ओकर बडका तेजके कारण पुरा धर्तीमे उजेत भेलै।

^2-3 ऊ बडका आवाजमे कहैल्कै, “बेबिलोनके उटा नामी सहर आब हारी गेलै छे। कहिनेकी यी बेबिलोन सहर सभे राज्यसिके जात-जातके आदमीसिके उटा अंगुरके मद्द पियैल्कै छे, जे ओकर मूर्तिसिके पूजा छै। सारा धर्तीके राजा ओकरसंगे ओकर गन्दा कामसिमे सामिल भ्यागेलै छे। ऊ जनानीके महँगा-महँगा चीजसिके इच्छाके कारणसे धर्तीके व्यापारीसब मातबर भ्यागेलै छे। मगर परमेश्वर यी बेशरम वेश्याके मरैले देतै। ऐज हरेक प्रकारके भूतसब ओत्ते रहैके लिए चल जैतै आर यी गन्दा आर घृणित चिडियासिके खोय्ता बनाबैके जगह बनी जैतै।”

⁴ एकरबाद हमे आकाशसे एरं कहेल दोसर एकटा आवाज सुन्लियै, “हे हमर आदमीसब, उटा सहरसे बाहार निक्लीके या। ऊ आदमीसिके पापसिके अनुसरण नैकर ताकी जे यातना ओकरासिपर प्रहार कर्तै, उटा तोरसिके उप्परमे नै आबौ।

⁵ कहिनेकी ओकर पापसब बहुते छै जेरं कि ओकर रास स्वर्गतक पहुँची गेलै छे आर परमेश्वर उटा दुष्टताके नैभुलैछै जे ऊ कैल्कै छे आर ओकरा सजाय देतै।

⁶ सेल्याके हमे कहैछिहौं, उटा सहरके संगे ओहिने ही कर, जेरं ऊ दोसर आदमीसिके संगे कैल्कै छे। ओकर सभे खराब कामके लिए ओकरासे दुगन्ना बदला ल्या। उटा सहरके लिए दुगन्ना शक्तिशाली यातनाके तैय्यारी कर जेरं यातनासिसे ऊ दोसर आदमीसिके संगे अत्याचार कैल्कै रहे।

⁷ तुहें ओकरा जरुर ही बहुते पिडा आर तकलीफ दिल्वैभ जे ओकर विलासी जीवन आर ओकर अपने आपके प्रति घमण्डके बराबर छै। ऊ अपने आपके कहैल्कै, ‘हमे एकटा रानीके जुगुर आदमीसिपर राज्य कर्बै। हमे एकटा मोसमात नैछियै आर हमे दुःखके अनुभव नैकर्बै।’

⁸ सेल्याके ओकर घमण्डके कारण ओकरापर अचानकसे बिपत्ति ऐतै। बेमारी, शोक आर अकाल ओकरापर एक्केसंगे ऐतै। आर ओकरा आगिनसे भसम कैल जैतै कहिनेकी प्रभु परमेश्वर शक्तिशाली छै आर ऊ ओकरा सजाय देतै।”

⁹ जब ओकरसंगे व्यबिचार करेवाला आर ओकर भोग-विलासके मजा लिएवाला धर्तीके राजासब ओकर जरैसे उठेवाला धुवाँ देख्तै ते ऊसब ओकर लिए कान्तै आर शोक मनैतै।

¹⁰ आर ओकरासिके डर छै कि ऊसब भी ओकर सजायमे फसी जैतै, सेल्याके ऊसब दूरसे खडा भ्याके कहतै, “हे महान बेबिलोन सहर! संसारके सभे आदमीसिपर आबेवाला बिपत्तिसब बहुते ही भयानक छै! परमेश्वरके सजाय तोरापर अचानक आबी गेलौ छे।”

¹¹ धर्तीके व्यापारीसब उटा सहरके लिए कान्तै आर शोक मनैतै, कहिनेकी आब कोय भी नैछै जे उटा सामानके किन्तै जे ऊ बेचैछै।

¹² ओकर चीजसब बहुते प्रकारके रहै। ओत्ते सोनासब, चानीसब, किमती पत्थलसब आर मोतीसब रहै। ओकरामे बहुते बढियाँ कपडासब रहै, जे महँगा सूत, चमकदार लाल आर बैगनी रंगके कपडासे बनैल गेलै रहे। ओकरासिमे गमकौव्वा लकडीसिसे बन्ल चीजसब, हाथीके दाँतसे बन्ल चीजसब रहै आर दोसर चीजसब रहै जे महँगा लकडी या पित्तल, लूहा या संगमरमरसे बन्ल रहै,

¹³ आर ओकरामे दालचिनी, सभे किसिमके मसल्ला, गमकौव्वा तेल, मुर्र, उजरा धुप, अंगुरके मद्द आर तेल, मैदा आर गहुम, ग्या-माल, भेंडासब, घोडासब आर रथसब रहै। आर जे आदमीसब चीजसब किनैछै आर बेचैछै ऊसब आब आदमीसिके दासके रुपमे कहियो बेचे नैसक्तै।

¹⁴ व्यापारीसब ओकरा कहतै, “उटा सभे चीजसब जकर तुहें इच्छा कर्ते रहैं आब नैछौ। उटा सभेटा मिठा सुगन्धवाला चीजसब जे तोरा पसन्द रहौ, उटा सभेटा चीजसब जकरा तुहें आपन शरीरके सुन्दर बनाबैके लिए इस्तमाल कर्ते रहैं, उटा सभेटा हेर्या गेलौ छे, उटा आब नैमिलैछौ।”

¹⁵ यी सामानसिके व्यापारीसब जेसब यीटा सहरके कारण मातबर भेलै रहे, ओकरासिके डर छै कि ऊसब भी ओकर सजायमे फसी जैतै, सेल्याके ऊसब दुर्हैसे खडा भ्याके ओकर लिए कान्तै आर शोक मनैतै आर कहतै,

¹⁶ “हे महान बेबिलोन सहर! यी सहरके सभे आदमीसिपर आबेवाला बिपत्तिसब बहुते ही भयानक छै! ऊ बढियाँ सूत्तीके कपडासब, बैगनी आर लाल रंगके कपडासब लगाबै आर सोनासब, किमती पत्थलसब आर मोतीसिसे सिंगार्ल रहै।

¹⁷ एक्के छिनमे एकर सभे धन-दौलत नाश भ्यागेलै।” आर जहाजके सभे कप्तान, ऊ सभे आदमीसब जे जहाजसे यात्रा करैछै, जहाजमे काम करेवालासब आर ऊ सभेको जे समुन्दरसे आपन जीविका चलाबैछै, बेबिलोन सहरसे बहुते दूरमे खडा भ्याके देख्ते रहलै।

¹⁸ जब ऊसब उटा आगिनसे निक्लेवाला धुवाँके देख्तै जे सहरके जराबैछै, तब ऊसब चिचियैतै, “यी विशाल सहरके जुगुर कोनो दोसर सहर नैछै।”

¹⁹ तब ऊसब आपन दुःख देखाबैके लिए आपन मुडापर धुर ढारीके कान्ते आर शोक मनैतै एरं कहिके आरहौ चिच्यैलै, “हे महान बेबिलोन सहर! यी सहरके सभे आदमीसिपर आबेवाला बिपत्तिसब बहुते ही भयानक छै! यी सहरके धन-दौलतसे जहाजके मालिकसब मातबर भेलै रहे। आर आब खाली एक्के घण्टामे एकरामे भेल सभे कुछु गायब भ्यागेलै छे।

²⁰ तुहें जेसब स्वर्गमे रहैछैं यी बारेमे बहुते आनन्दित हु जे एकरसंगे भेलै छे। सन्तसब, चुन्ल आर भेज्ल चेलासब आर परमेश्वरके वक्तासब सभेको यी बातके लिए आनन्द कर जे ओकरा भेलै छे, कहिनेकी परमेश्वर उटा सहरपर इन्साफ भेजल्कै छे, उटा खराबीके कारण जे ऊ तोरसंगे कैल्कौ छे।”

²¹ एकरबाद एकटा शक्तिशाली स्वर्गदूत एकटा बडका जाँतके जुगुर पत्थल उठ्याके एरं कहिके समुन्दरमे फेकल्कै, “जेरंके यी पत्थलके समुन्दरमे फेक्ल गेलै छे आर फेर नैमिल्तै अहिने करिके बडका बेबिलोन सहर भी एक्केबेरमे नाश भ्याजैतै, एकरा फेर दोबारा नैबनैल जैतै।

²² हे बेबिलोन, तोर गल्लीसिमे फेर कहियो भी संगीत नै सुनाई देतौ, वीणा आर गायकसिके संगीत, बसली आर धुतहुकके संगीत नैहैतौ। तोर सभे बढियाँ कारीगरसब गायब भ्याजैतौ, आर तोर मिलमे पिसैके लिए कोनो अनाज नैहैतौ।

²³ ओकर रातसब अनहार हैतै, एत्तेतक कि एकटा चिराग भी नैबर्तै। ओत्ते कनियाँ आर दुलहाके खुशीके आवाजसब नैहैतै। एरं इहे ल्याके हैतै कहिनेकी ओकर व्यापारीसब जेसब संसारभरमे सबसे बडका रहै, आपन जादु-मन्तरसे जात-जातके आदमीसिके धोखा देल्कै छे।

²⁴ परमेश्वर बेबिलोन सहरके इहे ल्याके सजाय देल्कै कहिनेकी यी सहर परमेश्वरके वक्तासिके आर सन्तसिके आर सभे धर्तीपरके आदमीसिके खून बहाबैके दोषी रहै।”