प्रकाश 17 - केवट नया कारार

लाल जंगली जानवरमे बैठ्ल जनानी

¹ उटा सातटा बाटी लिएवाला सातटा स्वर्गदूतसिमेसे एकझन हमरलगत आबिके कहैल्कै, “एत्ते या, हमे तोरा देखैबौ कि परमेश्वर केरंके उटा महा-वेश्याके सजाय देतै, जे एरंको जगहमे बैठैछै, जते बहुते लद्दीसब छै।

² यी धर्तीके राजासब ओकरसंगे अनैतिक कामसब कैल्कै। यी एरं रहै जेरं कि ऊ ओकरासिके अंगुरके मद्द पियैके लिए देल्कै।”

³ पवित्र आत्मा हमरा अगुवाई कैल्कै आर स्वर्गदूत हमरा सुनसान जगहमे ल्यागेलै, आर हमे ओत्ते एकटा जनानीके देख्लियै जे एकटा जंगली जानवरमे सवार रहै जे लाल रंगके रहै। ओकर सातटा मुडा आर दशटा सिङ रहै। ओकर शरीर परमेश्वरके अपमान करेवाला नामसिसे झाँप्ल रहै।

⁴ यी जनानी बैगनी आर लाल रंगके कपडा पिन्हल रहै। ऊ आपन शरीरके सोनाके गहना, किमती पत्थल आर महँगा मोतीसिसे सिंगार्ल रहै। ऊ आपन दहिना हातमे दारुसे भर्ल एकटा सोनाके बाटी पकडले रहै, जे ओकर खराब कामसब आर गन्दा यौन अभ्याससिके देखाबैछै।

⁵ ओकर मथामे एकटा नाम लिख्ल रहै, जकर एकटा गुप्त मतलब रहै। यी एरं रहै, “हमे महान बेबिलोन सहर छियै। हमे सभे वेश्यासिके मयाँ छियै आर ऊ छियै जे संसारके सभे खराब कामसिके स्रोत छियै।”

⁶ आर हमे देख्लियै कि ऊ जनानी सन्तसिके खून पिबिके मत्ल रहै, यानिकी ऊ आदमीसिके जकरा आदमीसब जान मारि देल्कै रहे, कहिनेकी ऊसब विश्वासयोग्यताके साथ येशूके अनुसरण कर्ते रहै। जब हमे ओकरा देख्लियै ते, हमे बहुते आश्चर्यचकित भेलियै।

⁷ तब ऊ स्वर्गदूत हमरा कहैल्कै, “चकित नैहु। ऊ जनानी आर ओकरा लादेवाला सातटा मुडा आर दशटा सिङ भेल जंगली जानवरके मतलब हमे तोरा बतैबौ।

⁸ ऊ जंगली जानवर जकरा तुहें एखन देख्लहैं, एक समय जिन्दा रहै मगर आब जिन्दा नैछै। ऊ अथाहा कुण्डसे बाहार आबेवाला छै आर परमेश्वर ओकरा पुरा तरहसे नाश करि देतै। धर्तीमे रहेवाला आदमीसब जकरसिके नाम परमेश्वर संसारके सृष्टि करैसे पहेला उटा किताबमे नैलिखल्कै छे जकरामे कहियो खतम नैहुएवाला जीवन पाबेवाला आदमीसिके नाम लिख्ल छै, ऊसब सभेको आश्चर्यचकित भ्याजैतै जब यी जंगली जानवरके देख्तै। एक समय ऊ जिन्दा रहै, आब ऊ जिन्दा नैछै, मगर ऊ फेर वापस ऐतै।

⁹ एकरा बुझैके लिए बुद्धिके जरुरत छै। मगर जकरा बुद्धि छै, ऊ यी पता लगाबे सकैछै। ऊ जंगली जानवरके सातटा मुडा उटा सहरके सातटा पहाडसिके देखाबैछै, जते यी जनानी राज्य करैछै। यी मुडासब सातटा राजासिके भी देखाबैछै।

¹⁰ ऊसब सातटा राजासब भी छै, ओकरासिमेसे पाँचटा राजा ते पहलहै मरि गेलै छे। ओकरासिमेसे एकझन एखन राजा छै, आखरीवाला एखनतक नैऐलै छे, मगर जब ऊ ऐतै ते खाली कुछु समयके लिए शासन कर्तै।

¹¹ ऊ जंगली जानवर जे बहुते पहेला रहते रहै मगर एखन नैछै, ऊ अठमा राजा छै। मगर ऊ अठमा राजा पहेला सातटा राजामेसे एकटा छै। आर अन्तमे ऊ राजाके जरुर ही सभे दिनके लिए सजाय देल जैतै।

¹² उटा दशटा सिङसब जे तुहें पहेला देख्लहैं रहे, ऊ दशटा राजासिके देखाबैछै जेसब एखन शासन करैले शुरु नैकैल्कै छे। ऊ दशटा राजासिके ऊ जंगली जानवरके संगे मिलिके शासन करैके अनुमति छै, मगर ओकर शासन खाली कुछु समयके लिए हैतै।

¹³ ऊसब सभेको एक्केटा काम करैके लिए सहमत हैतै आर ऊसब आपन-आपन शक्ति आर अधिकार जंगली जानवरके द्या देतै।

¹⁴ ऊसब बलि-भेंडाके विरुद्धमे लडै कर्तै मगर बलि-भेंडा ओकरासिके परास्त करि देतै कहिनेकी ऊ प्रभुसिके प्रभु आर राजासिके राजा छै। ऊ ओकरासिके आपन बोलैल, चुन्ल आर विश्वासयोग्य अनुयायीसिके संगे परास्त करि देतै।”

¹⁵ स्वर्गदूत हमरा यी भी कहैल्कै, “जे पानी तुहें पहेला देख्लहैं रहे, जकरापर ऊ जनानी बैठ्ल रहै, ऊ जात-जातके आदमीसब, हरेक देशसब आर हरेक भाषासिके आदमीसब छै।

¹⁶ आर उटा समय ऐतै जब उटा जंगली जानवर ऊ दशटा राजासिके संगे जे ओकरसंगे छै, उटा वेश्याके घृणा कर्तै जे ओकरापर बैठ्ल छै। ऊसब ओकरापर हमला कर्तै, ओकरा नंगा बनैतै, ऊसब ओकर शरीरके मास खैतै आर बाँकीके ऊसब आगिनमे जर्या देतै।

^17-18 ऊ जनानी जकरा तुहें देख्लहैं रहे, ऊ यी बडका सहर छै जे धर्तीपर सभे राजासिपर शासन करैछै। यी चीजसब ओकरसंगे भेलै छे, कहिनेकी परमेश्वर आपन मकसदके पुरा करैके लिए ओकरसिके मनके निर्देशन देल्कै छे। इहे कारण छै कि ऊसब आपन अधिकार जंगली जानवरके द्या देल्कै कि ऊ शासन करै, जबतक कि उटा सभेटा पुरा नैहै जे परमेश्वर कहैल्कै रहे।”