प्रकाश 15 - केवट नया कारारसातटा स्वर्गदूत आर सातटा बिपत्ति 1 एकरबाद हमे आकाशमे एकटा आरहौ अदभुद चिन्ह देख्लियै जे बहुते भयानक रहै। ओत्ते सातटा स्वर्गदूतसब रहै जेसब सातटा अलग-अलग किसिमके बिपत्ति लेल रहै। यी बिपत्तिसब अन्तिम छै कहिनेकी जब यी बिपत्तिसब समाप्त भ्याजैछै तब परमेश्वरके क्रोध समाप्त भ्याजैतै। 2 आर हमे कुछु देख्लियै जकर चौडाई समुन्दरके जुगुर रहै, यी आगिन मिल्ल सिसाके जुगुर दिखाई देते रहै। आर उटा समुन्दरके किनारमे जे सिसाके जुगुर रहै, हमे बहुते आदमीसिके खडा भेल देख्लियै। ऊसब ऊ आदमीसब रहै, जेसब उटा जंगली जानवरके पराजय कैल्कै रहे, कहिनेकी ऊसब ओकर पूजा करैसे इन्कार कैल्कै रहे। ऊसब ओकर मूर्तिके पूजा करैसे आर उटा संख्याके चिन्ह प्राप्त करैसे इन्कार करिदेल्कै रहे, जे उटा जंगली जानवरके नामके देखाबैछै। जंगली जानवरके पराजय करेवाला आदमीसब समुन्दरके किनारमे खडा रहै, जे सिसाके जुगुर रहै। ऊसब हातमे वीणा पकडले रहै, जे ओकरासिके परमेश्वरके तरफसे देल गेलै रहे। 3 ऊसब एकटा एरं गीत गैते रहै, जेरं परमेश्वरके दास मूसा बहुते पहेला गैल्कै रहे। ऊसब येशूके महिमा करैके लिए, जे कि एकटा बलि-भेंडाके जुगुर छै, एरंके गीत गैल्कै, “हे सर्वशक्तिमान प्रभु परमेश्वर, जे कुछु तुहें कैलह छे, उटा महान आर अदभुद छै। तुहें सभे देशके राजा छह। तुहें जे भी करैछ उटा सही आर धर्मी छै। 4 हे प्रभु, सभे आदमीसिके द्वारा तोर आदर कैल जैछौं आर ऊसब सभेको तोर नामके सम्मान करैछौं कहिनेकी खाली तुहें ही पवित्र परमेश्वर छह। हरेक राज्यके जात-जातके आदमीसब तोरलगत आबैछौं आर ऊसब तोर ही आराधना करैछौं, कहिनेकी तोर सही काम सभैके बढियाँसे मालुम छै।” 5 जब यी आदमीसब गीत गाबैले समाप्त करिदेल्कै, तब हमे देख्लियै कि स्वर्गमे परमेश्वरके मन्दिर खुल्ला रहै जे कि परमेश्वरके पालके जुगुर छै। 6-7 आर फेर सातटा स्वर्गदूत जकरा अन्तिम सातटा विपत्तिसिके ल्याके धर्तीमे जाना रहै, ऊ परमेश्वरके मन्दिरसे बाहार निकल्लै। ऊसब चमकदार उजरा कपडा पिन्हल रहै आर ओकरसिके छातीके चारो बगल सोनाके पट्टी भी रहै। फेर चारटा जिन्दा प्राणीमेसे एकझन हरेक स्वर्गदूतके परमेश्वरके तरफसे जे सभे दिन जिन्दा छै, भयानक सजायसे भर्ल एक-एकटा सोनाके बाटी देल्कै। 8 आर मन्दिर परमेश्वरके महिमा आर ओकर शक्तिसे आबेवाला धुवाँसे भरि गेलै। तबतक कोय भी परमेश्वरके मन्दिरमे नै ज्या सकल्कै जबतक कि उटा सातटा बिपत्तिसब समाप्त नै भ्यागेलै, जकरा सातटा स्वर्गदूतसब आनल्कै रहे। |
Kayort (केवट) Bible by The Love Fellowship is licensed under Creative Commons Attribution-ShareAlike 4.0 License.
Beyond Translation