प्रकाश 13 - केवट नया कारार

दीटा जंगली जानवरसब

¹ एकरबाद हमे एकटा जंगली जानवरके समुन्दरसे निकल्ते देख्लियै, जकर सातटा मुडा आर दशटा सिङ रहै। हरेक सिङमे एकटा मकुट रहै आर हरेक मुडामे परमेश्वरके विरुद्धमे एकटा ईश्वर निन्दावाला नाम लिख्ल गेलै रहे।

² यी जंगली जानवर जकरा हमे देख्लियै से चितुवाके जुगुर रहै, मगर ओकर पैर भालूके पैरके जुगुर रहै आर ओकर मुख शेरके मुखके जुगुर रहै। ऊ विशाल अजगर यी जंगली जानवरके आपन शक्ति देल्कै आर ओकरा यी धर्तीपर शासन करैके अधिकार देल्कै।

³ ऊ जंगली जानवरके एकटा मुडामे एकटा घाके निशान रहै, जे ओकर मरैके कारण बने सक्ते रहै। मगर ओकर घा ठीक भ्यागेलै रहे। सेल्याके धर्तीके आदमीसब चकित भ्यागेलै आर ऊ जंगली जानवरके अनुसरण करे लाग्लै।

⁴ तब सभे आदमीसब ऊ विशाल अजगरके पूजा कैल्कै कहिनेकी ऊ उटा जंगली जानवरके अधिकार देल्कै रहे। ऊ आदमीसब ऊ जंगली जानवरके भी पूजा कैल्कै। ऊ आदमीसब कहैल्कै, “यी जंगली जानवरके जुगुर कोय भी शक्तिशाली नैछै। कोय भी ओकरापर हमला नैकरे सकैछै।”

⁵ ऊ जंगली जानवरके आपन विषयमे अहंकार करैके अधिकार प्राप्त भेलै आर एरंके ऊ जंगली जानवर परमेश्वरके अपमान कैल्कै। ओकरा बियालिस महिनातक काम करैके अधिकार प्राप्त भेलै।

⁶ आर ऊ जंगली जानवर परमेश्वरके अपमान करैले शुरु कैल्कै। ऊ परमेश्वरके नामके विरुद्ध आर उटा जगहके विरुद्धमे बोल्लै जते परमेश्वर रहैछै आर ऊ आदमीसिके विरुद्ध जे स्वर्गमे रहैछै।

⁷ ऊ जंगली जानवरके परमेश्वरके आदमीसिके संगे लडाई करैके आर ओकरासिपर विजय प्राप्त करैके अधिकार प्राप्त भेलै। आर ओकरा हरेक जात, हरेक कुलसब, हरेक भाषासब आर हरेक देशके आदमीसिपर शासन करैके अधिकार प्राप्त भेलै।

⁸ आर यी धर्तीमे रहेवाला सभे आदमीसब ओकर पूजा करे लाग्लै। खाली उहे आदमीसब ओकर पूजा नैकैल्कै जकर नाम संसारके सृष्टि कैल जैसे पहेलासे ही जीवनके किताबमे लिख्ल गेलै रहे। यी जीवनके किताब ऊ बलि-भेंडाके किताब छै जकरा बलिदानके रुपमे मारि देल गेलै रहे।

⁹ जे कोय यी बातके सुने सकैछै जे हमे कहैछियै, ऊ यी बातके बुझैके कोशिश करक!

¹⁰ जे आदमीसिके कैद कैल जाना तय छै, ऊसब जरुर ही कैद कैल जैतै, आर जकरसिके लिए तय छै कि ऊसब तलवारसे मरै, ऊसब जरुर ही तलवारसे जान मार्ल जैतै। इहे ल्याके परमेश्वरके आदमीसिके दुःख सहैमे धीरज राखना चाही आर ओकरापर निरन्तर भरोसा करना चाही।

¹¹ तकरबाद हमे आरहौ एकटा जंगली जानवरके धर्तीसे निकल्ते देख्लियै। एकर दीटा सिङ रहै जेरं भेंडाके हैछै। मगर जब ऊ बोल्लै ते ओकर आवाज विशाल अजगरके जुगुर रहै।

¹² यी दोसर जंगली जानवर उटा पहेलावाला जंगली जानवरके सभे अधिकारके प्रयोग करैछै। दोसर जंगली जानवर धर्ती आर एकरामे रहेवालासिसे उटा पहेलावाला जंगली जानवरके पूजा करवाबैछै, जकरा घाके निशान रहै, जे ओकर मरैके कारण बने सक्ते रहै। मगर ओकर घा ठीक भ्यागेलै रहे।

¹³ यी दोसर जंगली जानवर झुट्ठा चमत्कारसब देखैते रहै। एत्तेतक कि आदमीसिके समनामे देखते-देखते आकाशसे धर्तीपर आगिन बरस्या देते रहै।

¹⁴ बहुते आदमीसब दोसर जंगली जानवरके झुट्ठा चमत्कारसिसे प्रभावित भ्याके धोखा खैल्कै जे उटा पहेलावाला जंगली जानवरके शक्तिसे कैल्कै रहे। दोसर जंगली जानवरके द्वारा आदमीसिके कहेल गेलै कि ऊसब पहेलावाला जंगली जानवरके पूजा करैके लिए एकटा मूर्ति बनाबै, जे हतियारसे घायल भ्यागेलै रहे, मगर फेरसे ठीक भ्यागेलै रहे।

¹⁵ आर दोसर जंगली जानवरके परमेश्वरके द्वारा पहेलावाला जंगली जानवरके मूर्ति बन्याके ओकरा जिन्दा बनाबैके अनुमति देल गेलै रहे, ताकी जंगली जानवरके मूर्ति बोले भी सकै आर ऊ आदमीसिके जान मरव्या दै जेसब ऊ जंगली जानवरके मूर्तिके पूजा नैकरैछै।

¹⁶ दोसर जंगली जानवर महत्वपूर्ण आर महत्वहीन, मातबर आर गरिब, दास या जे दास नैरहै यानिकी सभे आदमीसिके मजबूर कैल्कै कि ऊसब पहेला जंगली जानवरके नाम आपन दहिना हातमे या आपन कपारमे छाप लग्वाबै।

¹⁷ खाली उहे जकरापर यी छाप रहै कुछु किने या बेचे सक्ते रहै। उटा छाप पहेलावाला जंगली जानवरके नाम रहै या ओकर नामके देखाबेवाला एकटा संख्या रहै।

¹⁸ एकरा बुझैके लिए ज्ञानके जरुरत छै। मगर जकरा ज्ञान छै, ऊ यी पता लगाबे सकैछै कि यी जंगली जानवरके संख्याके मतलब कि छै। कहिनेकी यी एकटा व्यक्तिके नाम छै। यी संख्या ६६६ छै।