प्रकाश 10 - केवट नया कारार

स्वर्गदूत आर छोटका किताब

¹ तकरबाद हमे एकटा दोसर शक्तिशाली स्वर्गदूतके स्वर्गसे उतरिके निच्चा ऐते देख्लियै। एकटा बादल ओकर चारो तरफ रहै आर एकटा मेघ-धनुष ओकर मथाके चारो तरफ रहै। ओकर चेहरा सुरुजके जुगुर चमकते रहै आर ओकर पैर आगिनके खम्भाके जुगुर रहै।

² ओकर दहिना पैर समुन्दरमे राखल्कै आर ओकर बायाँ पैर जमिनमे राखल्कै। ओकर हातमे एकटा छोटका किताब रहै, जे खुल्ल रहै।

³ ऊ स्वर्गदूत जोरसे पुकारा कैल्कै आर ओकर आवाज शेरके गर्जनके जुगुर रहै। जब ऊ चिकर्लै ते, सातटा तेज आवाजसब ओकरा जबाब देल्कै, जे मेघ-गर्जनके आवाजके गडगडाहट जुगुर रहै।

⁴ जब ऊ सातटा मेघ-गर्जनसब आपन-आपन आवाज निकाल्लकै ते, हमे ओकरसिके द्वारा कहेल बात लिखैके लिए तैय्यार रहियै, मगर तखनिहैं स्वर्गसे एरं कहेल आवाज हमे सुन्लियै, “ऊ सातोटा मेघ गर्जनके आवाज जे बात बोल्लै तकरा गुप्त राख, यी बातसिके नैलिख।”

⁵ फेर ऊ स्वर्गदूतके जकरा हमे समुन्दर आर धर्तीपर खडा भेल देख्लियै रहे, ऊ आपन दहिना हात आकाशके महर उठैल्कै जे कसम खैके लिए रहै।

⁶ आर सभे दिन जिन्दा रहेवाला आर स्वर्ग, धर्ती आर समुन्दर आर ओकरामे भेल सभे चीजसिके सृष्टि करेवालाके नाममे कसम खैके ऊ कहैल्कै, “आब कोनो भी बातके लिए आरहौ इन्तजार नैकरे पड्तै। आब उटा सभे बात पुरा भ्याजैतै।”

⁷ जहिने ही ऊ सतमा स्वर्गदूत आपन धुतहुक फुक्तै, परमेश्वर तुरन्ते काम कर्तै। परमेश्वर आपन गुप्त योजनाके पुरा कर्तै, जेरं कि ऊ आपन सेवा करेवाला परमेश्वरके वक्तासिके एकर सूचना पहेला देल्कै रहे।

⁸ तब फेर हमे उटा आवाज सुन्लियै जे स्वर्गसे हमरसे बात कैल्कै रहे। उटा आवाज हमरा कहैल्कै, “जो, जे समुन्दर आर जमिनमे खडा छै, ऊ स्वर्गदूतके हातमे भेल उटा खोल्ल किताबके ल्याले।”

⁹ तब हमे ऊ स्वर्गदूतके लगत गेलियै आर कहैलियै, “यी छोटका किताब हमरा द्या।” तब ऊ हमरा कहैल्कै, “यी ले आर एकरा खो। एकर स्वाद सहदके जुगुर मिठ्ठ छै, मगर पाछु एकर तित्तसे तोर पेटमे दरद हैतौ।”

¹⁰ सेल्याके हमे ऊ स्वर्गदूतके हातसे उटा छोटका किताब लेलियै आर ओकरा खैलियै। आर सचमे एकर स्वाद सहदके जुगुर मिठ्ठ रहै, मगर जब हमे एकरा घोट्लियै ते हमर पेट दुखाबे लाग्लै।

¹¹ तब हमरा एरं कहेल गेलै, “जे बात परमेश्वर तोरा बताबैके लिए कहैछौ, से बात अलग-अलग समूह आर जात-जातके आदमीसिके, अलग-अलग भाषा बोलेवाला आदमीसिके आर राजासिके एकबेर फेरसे बता।”