प्रकाश 1 - केवट नया कारार

¹ परमेश्वर येशू ख्रीष्टके उटा गुप्त बातसब बतैल्कै जे बात बहुते जल्दी पुरा हैतै, ताकी ऊ उटा बातसब आपन सेवकसिके समनामे प्रकट करे सकै। तब येशू आपन सेवक हमे, यूहन्नाके यी बातसब देखाबैके लिए आपन स्वर्गदूतके भेजल्कै।

² सेल्याके हमे, यूहन्ना उटा सभे कुछु लिख्लियै जे हमे देख्लियै। हमे यी लेखमे परमेश्वरके वचन आर उटा सच्चा शिक्षासब लिखिके बतैलियै छे, जकर जानकारी येशू ख्रीष्ट हमरा देल्कै रहे।

³ परमेश्वर हरेक ऊ आदमीके आशिष देतै जे यी भविष्यवाणीके दोसर आदमीसिके पढिके सुनाबैछै आर ऊ हरेक ऊ आदमीके आशिष देतै जे एकरा सुनैछै आर एकरा मानैछै। कहिनेकी यी बातसब जल्दी ही हैतै।

सातोटा मण्डलीसिके यूहन्नाके नमस्कार

⁴ हमे, यूहन्ना यी चिट्ठी तुहेंसब सातटा मण्डलीसिके विश्वासीसिके लिए लिखैछियै जे एशिया प्रदेशमे छै। हमे प्रार्थना करैछियै कि आपनसिके परमेश्वर तोरासिके अनुग्रह आर शान्ति दौ। ऊ उहे परमेश्वर छै जे समयके शुरुआतसे ल्याके एखनतक आर सभे दिनके लिए नैबदलैछै। आर ऊ सात आत्मासिके तरफसे, जे परमेश्वरके सिंहासनके समनामे छै।

^5-6 आर येशू ख्रीष्टके तरफसे जकर वचनपर भरोसा कैल ज्या सकैछै। उहे ही छै जे मुर्दासे फेरसे जिन्दा भेलै आर ऊ यी संसारके सभे राजासिके शासक छै। ऊ आपनसिसे प्रेम करैछै आर ऊ आपन खून बहयाके अपनासिके आपनसिके पापसिसे बचाबैछै। ऊ अपनासिके एरंको समूहके आदमी बन्या देल्कै छे, जकर परमेश्वर ओकरसिके राजा छै आर ऊ अपनासिके परमेश्वर ओकर पिताके लिए पुजारी बन्या देल्कै छे। ओकरा आदर आर अधिकार सभे दिन आर हर समय मिल्ते रहै। आमेन।

⁷ देख, ऊ बादलके सवारीमे आबैछै, आर हरेक आदमी ओकरा देख्तै। जे आदमीसब ओकर मौतके लिए जिम्मेदार रहै, ऊसब भी ओकरा ऐते देख्तै आर धर्तीके सभे आदमीसब जोर-जोरसे कान्तै जब ऊसब ओकरा देख्तै। हौं, अहिने हैतै। आमेन।

⁸ प्रभु परमेश्वर कहैछै, “हम्हीं छियै जे सभे चीजसिके शुरुआत कैलियै आर हम्हीं छियै जे सभे चीजसिके समाप्त कर्बै। हमे उहे परमेश्वर छियै जे समयके शुरुआतसे ल्याके एखनतक आर सभे दिनके लिए नैबदलैछियै। हमे सर्वशक्तिमान छियै।”

प्रभु येशू ख्रीष्टके दर्शन

⁹ हमे, यूहन्ना, जे ख्रीष्टमे तोर साथी छियौ, तोरेसिके जुगुर सतैल जैछियै। हमे परमेश्वरके राज्यके एकटा नागरिक छियै जेरं कि तुहेंसब छैं आर हमरा भी आपन तकलीफके ओहिने ही धीरजके साथ सहन करना चाही जेरं तुहेंसब करैछैं। हमे परमेश्वरके वचन प्रचार करैके आर येशूके विषयमे बताबैके कारण पत्मोसके टापुमे निर्वासित करि देल गेलियै रहे।

¹⁰ प्रभुके दिनमे पवित्र आत्मा हमरा अगुवाई कैल्कै। हमे आपन पाछुसे कक्रहौ बोल्ते सुन्लियै जे धुतहुकके जुगुर बडका आर साफ आवाजमे बोल्ते रहै।

¹¹ ऊ हमरा कहैल्कै, “जे कुछु तुहें देखैछैं, ओकरा एकटा किताबमे लिख, आर एकरा एफिसस सहर, स्मुर्ना सहर, पर्गामम सहर, थिआटिरा सहर, सार्डिस सहर, फिलाडेल्फिया सहर आर लाउडिकिया सहरमे भेल सातटा मण्डलीसिके भेज।”

¹² तब हमे यी देखैके लिए पाछु महर घुम्लियै कि के हमरसंगे बोल्ते रहै। जब हमे पाछु घुम्लियै ते हमे दिया राखेवाला सातटा सोनाके लबना देख्लियै।

¹³ आर उटा सातटा लबनासिके बिच्चेमे कोय खडा रहै जे एकटा आदमीके बेटाके जुगुर दिखाई देते रहै, ऊ लम्बा कपडा पिन्हल रहै जे ओकर पैरी तक पहुँचते रहै। ऊ आपन छातीके चारो महर एकटा सोनाके पट्टी बान्हले रहै।

¹⁴ ओकर मथाके केश उजरा ऊनके जुगुर उजरा या बरफके जुगुर रहै। ओकर आँख आगिनके धधकके जुगुर चमकते रहै।

¹⁵ ओकर पैर भट्टीमे धिपैल पित्तलके जुगुर चमकते रहै आर जब ऊ बोल्लै ते ओकर आवाज एकटा विशाल झरनाके आवाजके जुगुर रहै।

¹⁶ ओकर दहिना हात ल्याके सातटा तारासब पक्डीके राखल्कै रहे आर ओकर मुखसे धर्हा दी धारवाला तलवार निकल्ल रहै। ओकर चेहरा दिपहरियाके समयमे चमकेवाला सुरुजके जुगुर चमकते रहै।

¹⁷ जब हमे ओकरा देख्लियै, तब हमे तुरन्ते ओकर पैरीमे गिरी गेलियै। हमे एकटा मर्ल आदमीके जुगुर भ्या गेलियै। मगर ऊ आपन दहिना हात हमर उप्परमे राखिके कहैल्कै, “नैडर, हम्हीं छियै जे सभे चीजसिके शुरुआत कैलियै आर हम्हीं छियै जे सभे चीजसिके समाप्त कर्बै।

¹⁸ हमे ऊ छियै जे सभे दिन जिन्दा छियै। हमे एकबेर मरि गेलियै रहे, मगर आब हमे जिन्दा छियै आर हमे सभे दिन जिन्दा रहबै। देख, हमरलगत मौत आर पातालपर, मर्ल आदमीसिके जगहपर अधिकार छै।

¹⁹ सेल्याके जे तुहें देख्लहैं छे, ओकरा लिखि ले यानिकी उटा दोनो चीजसब जे एखन हैछै आर जे पाछु हैतै।

²⁰ आब हमे हमर दहिना हातमे भेल सातटा तारासिके मतलब कि छै आर दिया राखेवाला सातटा सोनाके लबनासिके मतलब कि छै से बतैबौ जे बात पहेला मालुम नैरहै। एकर मतलब यी छै: सातटा तारासब सातटा मण्डलीसिके स्वर्गदूतसब छै आर दिया राखेवाला सातटा लबनासब सातटा मण्डलीसब छै।”