फिलिप्पी 2 - केवट नया कारारख्रीष्टके नम्रता 1 तुहेंसब ख्रीष्टके संगे एक हुऐके कारणसे तोरासिके उत्साह मिल्लौ छे। ख्रीष्ट तोरासिके प्रेम करैके कारणसे तुहेंसब सान्त्वना पैल्हैं छे। तुहेंसब पवित्र आत्मामे संगति करैके कारणसे तुहेंसब ख्रीष्टके कोमलता आर दया पैल्हैं छे। 2 सेल्याके तुहेंसब एक-दोसरसे सहमत हु, एक-दोसरसे प्रेम कर, एक चित्तके भ्याके एक्केटा मकसद राख आर अहिने करिके हमर आनन्द पुरा कर। 3 स्वार्थ या अहंकारमे कुछु नैकर मगर नम्रतामे दोसरके आपनसे बेसी महत्व दहैं। 4 तुहेंसब सभेकोय खाली आपने भलाइ नैखोज् मगर दोसरके भलाइके भी चिन्ता कर। ख्रीष्टके नम्रता आर महानता 5 जेरं ख्रीष्ट येशूके विचार रहै, ओहिने विचार तोरासिमे भी हुवौ; 6 ऊ सभे किसिमसे परमेश्वरके जुगुर भ्याके भी परमेश्वरके बराबर हुएवाला बातके एकटा पक्डीके राखेवाला चीज जेरं नैसोचल्कै, 7 मगर ऊ सभे चीज त्यागल्कै, ऊ सभे कुछु पाछु छोडी देल्कै आर दासके स्वरुप धारण कैल्कै आर ऊ आदमी बनी गेलै। 8 ऊ आदमीके स्वरुपमे प्रकट भ्याके अपने आपके निच्चा गिरैल्कै, आर परमेश्वरके आज्ञाकारी भ्याके मरैले तैय्यार भेलै, आर एत्तेतक कि एकटा अपराधीके जुगुर भ्याके क्रूसके मौत सहैल्कै। 9 सेल्याके परमेश्वर ओकरा अति उच्च आदरके पदमे राखल्कै, आर ओकरा ऊ नाम प्रदान कैल्कै जे हरेक नामसे उचा छै। 10 ओकरा सम्मान दियैके लिए स्वर्गमे, धर्तीके उप्परमे आर धर्तीके निच्चामे भेल हरेक प्राणीके येशूके नाममे घुटुवा पारे पड्तै। 11 आर हरेक आदमीसिके परमेश्वर पिताके महिमाके लिए येशू ख्रीष्टके प्रभु कहिके स्वीकार करे पड्तै। यी संसारमे उजेतके जुगुर चमक 12 सेल्याके हे हमर प्रिय विश्वासी भ्या-बहिनसब, जब हमे तोरसिके संगे रहियौ तब तुहेंसब सभे दिन आज्ञापालन कैल्हैं। एखन हमे तोरसिसे दूर छियौ, तोरासिके आरहौ बेसी आज्ञापालन करना चाही। तोरासिमेसे हरेक आदमी डरके साथ आर कम्पनके साथ ऊ चीजसब कर जे काम परमेश्वरद्वारा उद्धार पैल आदमीसिके लिए सही छै। 13 कहिनेकी परमेश्वर तोरासिमे काम करैछौ, तोरासिके उटा काम करैके इच्छा आर शक्ति दैछौ जे काम ओकरा खुश करैछै। 14 तुहेंसब बिना कुड-कुडैले आर बिना वाद-विवाद सभे काम कैले जो। 15 ताकी तुहेंसब भ्रष्ट आर दुष्ट आदमीसिसे भर्ल यी संसारमे परमेश्वरके सिद्ध बेटा-बेटीसिके जुगुर साफ आर निर्दोष जीवन जी। यी संसारके आदमीसिके बीचमे तोरासिके आकाशके तारासिके जुगुर अनहारमे चमकना चाही जब तुहेंसब ओकरासिके उटा वचन बताबैछैं जे कहियो खतम नैहुएवाला जीवन दैछै। 16 ताकी जब ख्रीष्ट वापस ऐतै तब हमरा गर्व करैके कारण है कि हमर प्रयास आर कठिन मेहनत करना बेकार नैभेलै। 17 जब हमे तोरासिके खुश-खबरी सुनैलियौ ते तुहेंसब प्रभु येशूमे विश्वास कैल्हैं आर ओकर सेवाके लिए आपन जीवनके बलिदान करि देल्हैं। सेल्याके यदि खुश-खबरी सुनाबैके कारण हमरा मारि भी देल जै, ते हमे भी तोरसिके संगे आनन्दित आर खुश रहबै। 18 ओहिने करिके तहुँसब आनन्दित हु, आर हमरसंगे आनन्द कर। तिमोथी आर इपाफ्रोडिटसके प्रशंसा 19 हमरा प्रभु येशूमे आशा छै कि हमे तिमोथीके तोरसिकेलगत जल्दी भेज्बौ, ताकी जब ऊ वापस ऐतै ते तोरसिके खबर पाबिके हमे उत्साहित हैबै। 20 कहिनेकी हमरलगत तिमोथीके जुगुर स्वभावके दोसर कोय नैछै, जे शुद्ध मनसे तोरसिके चिन्ता करै। 21 कहिनेकी सभेको आपन स्वार्थके खोजमे रहैछै, ऊसब जे बात येशू ख्रीष्टके लिए महत्वपूर्ण छै से बातमे चिन्तित नैहैछै। 22 मगर तोरासिके मालुम छौ कि केरंके तिमोथी अपने आपके विश्वासयोग्य देखैल्कै छे। जेरंके बेटा बाबुके सेवा करैछै ओहिने करिके ऊ हमरसंगे खुश-खबरी फैलाबैमे हमरसंगे मेहनत कैल्कै छे। 23 सेल्याके हमे आशा करैछियौ कि जहिने हमरा कुछु पता चल्तै कि हमरसंगे एत्ते कि हुएवाला छै, ओहिने हमे एकरा तोरसिकेलगत भेजी देबौ। 24 आर हमरा पुरा भरोसा छै कि प्रभुके सहायतासे हमे खुद भी तोरसिकेलगत जल्दी ही ऐबौ। 25 हमे इपाफ्रोडिटसके तोरसिकेलगत भेजैले जरुरी महसुस कैलियै। ऊ हमर विश्वासी भ्या, हमरसंगे-संगे काम करेवाला आर खुश-खबरीके रक्षा करेवाला संगी सिपाहीके जुगुर, आर सन्देशवाहक आर हमरा जरुरी पडल बातमे सेवा करेवाला आदमी छै। 26 कहिनेकी तोरसिके सभैके भेट करैके लिए ऊ बहुते इच्छा कैल्कौ छे, आर यी बातसे चिन्तित छौ कि तुहेंसब ऊ बेमार भेल बात सुनी लेल्हैं छे। 27 ऊ एतनें बेमार भेलै रहे कि ऊ सच्चे मरै पर रहै, मगर परमेश्वर ओकरापर दया कैल्कै आर ओकरा ठीक कैल्कै। परमेश्वर खाली ओक्रहै नै मगर हमरापर भी दया कैल्कै आर परमेश्वर हमरा आरहौ भी बडका दुःख हुऐले नैदेल्कै। 28 सेल्याके हमे ओकरा भेजैले आरहौ बेसी कोशिश कैलियै ताकी तुहेंसब फेर ओकर भेट करिके आनन्दित भ्याजहैं आर हमर चिन्ता भी कम भ्याजै। 29 सेल्याके बहुते आनन्दके साथ प्रभुमे ओकरा स्वागत करिहैं, आर तुहेंसब ओकरा आर ओकर जुगुर दोसर आदमीसिके भी आदर करिहैं। 30 कहिनेकी ऊ ख्रीष्टके कामके लिए आपन जानके जोखिम उठ्याके मरै पर भेलै रहे, ताकी ऊ उटा कामसे हमरा सहायता करे सकै जे काम तुहेंसब करैले नैसक्लहैं छे, कहिनेकी तुहेंसब बहुते दूर छैं। |
Kayort (केवट) Bible by The Love Fellowship is licensed under Creative Commons Attribution-ShareAlike 4.0 License.
Beyond Translation