मर्कूस 5 - केवट नया कारार

भूत लाग्ल आदमीके छुटकारा

¹ येशू आर ओकर चेलासब गालील समुन्दरके उपार गेरासेनी आदमीसिके इलाकामे ऐलै।

² येशू नावसे उतर्लके बाद तुरन्ते मसानघाटमेसे निक्लीके ऐल भूत लाग्ल एकटा आदमी ओकरा मिल्लै।

³ ऊ मसानघाटके अगल-बगल रहते रहै। ऊ एतनें हिंसक रहै कि आदमीसब ओकरा बान्हिके राखैके कोशिश करै मगर कोय बान्हे नैसक्ते रहै, सिक्कड ल्याके भी बान्हे नैसक्ते रहै।

⁴ कहिनेकी बहुतेबेर ओकर हात पैर बेडी आर सिक्कड ल्याके बान्हल रहै, तैय्योपर सभे बेर ऊ सिक्कडसिके तोडीके पैरके बेडीके अलग-अलग करिदै। कोनो आदमी ओकरा काबु नैकरे सकै।

⁵ ऊ लगातार दिनरात मसानघाटमे आर पहाड महर चिकर्ते आपन शरीरमे पत्थल ल्याके घा-घौंस बनाबै।

⁶ आर जब ऊ येशूके दुर्हैसे देखल्कै तब दौडिके ऐलै आर ओकर आगुमे झुकिके आराधना कैल्कै।

⁷ आर बडका आवाजमे ऊ चिकरीके कहैल्कै, “हे येशू, परमप्रधान परमेश्वरके बेटा, तुहें हमरासिके कथिले परेशान करैछ? परमेश्वरके समनामे एकटा किरिया खा कि तुहें हमरासिके नैसतैभ।”

⁸ ऊ आदमी एरंको सेल्याके कहैल्कै कहिनेकी येशू ओकरा पहलहै कहैल्कै रहे, “ऐ भूत, यी आदमीसे निक्ली जो।”

⁹ येशू ओकरा पुछल्कै, “तोर नाम कि छौ?” ऊ ओकरा कहैल्कै, “हमरसिके नाम ते फौज छै, जे यी आदमीमे रहैछियै, कहिनेकी हमेसब बहुते छियै।”

¹⁰ उटा भूतसिके उटा गाँवसे नैनिकाली दह कहिके भूत येशूसे आग्रहके साथ बिन्ती कैल्कै।

¹¹ ओत्ते नज्दिकमे पहाडपर सुग्गरके एकटा बथान चर्ते रहै।

¹² उटा भूतसब एरं कहिके येशूसे बिन्ती कैल्कै, “हमरासिके ऊ सुग्गरसिमे जैले द्या, आर हमेसब ओकरसिके भित्तरमे ढुक्बै।”

¹³ तब येशू ओकरासिके अनुमति देल्कै, तब भूतसब उटा आदमीसे बाहार निकल्लै आर सुग्गरसिमे सम्या गेलै। तब उटा सुग्गरके बथान ढलानवाला किनार महर दौडिके गालील समुन्दरमे जैके गिर्लै आर डुबिके मरि गेलै। उटा सुग्गरसिके संख्या दी हजार रहै।

¹⁴ ऊ सुग्गर चराबेवालासब भाग्लै, आर सहर आर गाँवमे खबर देल्कै कि, कि भेलै रहे। ओकरा देखैले आदमीसब ओत्ते ऐलै।

¹⁵ तब ऊसब येशूके लगत ऐलै, आर देखल्कै कि जकरा एक समय भूत लाग्ल रहै, उटा आदमी ठीक भ्याके कपडा पिन्हीके आपन पुरा होशमे बैठ्ल रहै। यी देखिके ओकरासिके बहुते डर भेलै।

¹⁶ यी घटना देखेवाला आदमीसब, भूत लाग्ल आदमी आर सुग्गरके बात ओत्ते ऐल आदमीसिके बत्या देल्कै।

¹⁷ एरंको बात सुनिके ऊ आदमीसब जे देखैले ऐलै रहे, येशूके ओकरसिके इलाका छोडिके जैके लिए येशूके बिन्ती करे लाग्लै।

¹⁸ येशू नावमे चढैबेरियाँ ऊ ठीक भेल आदमी येशूके बिन्ती कैल्कै, “हम्रहौ तोर संगमे जैले द्या।”

¹⁹ येशू ओकरा एरं करैले अनुमति नैदेल्कै, मगर ओकरा कहैल्कै, “आपन घरमे जैके, आपन परिवार, आपन कुटुमसिके आर आपन गाँव-समाजके आदमीसिके बता, कि तोरापर दया करिके प्रभु तोर लिए कतनें बडका काम कैल्कौ छे।”

²⁰ आर ऊ आदमी गेलै, आर येशू ओकर लिए कतनें बडका काम कैल्कै रहे से बात डेकापोलिसके इलाकामे (जकर मतलब छै दशटा सहर) प्रचार करे लाग्लै, आर सभे आदमी आश्चर्य माने लाग्लै।

याइरसके मर्ल बेटी आर एकटा बेमार जनानी

²¹ फेर एकबेर येशू नावमे चढिके गालील समुन्दरके उपार गेलै, जब ऊ ओत्ते पहुँचलै आर ऊ किनार पर ही खडा रहै, तब एकटा बडका भीड येशूके लगत जमा भेलै।

²² यहूदी आदमीसिके सभाघरके मुखियामेसे एकझन याइरस नामके आदमी येशूके लगत ऐलै, आर ओकरा देखिके आदर दियैके लिए मुडा लिब्याके ओकरा घुटुवा पारिके गोड लागल्कै।

²³ आर एरं कहिके बिन्ती कैल्कै, “हमर छोटकी बेटी मरै पर छै, तुहें हमर घर आब आर ओकरा छुव ताकी ऊ ठीक भ्याजै आर जिन्दा रहै।”

²⁴ तब येशू याइरससंगे गेलै। बहुते आदमीसब ओकर पाछु-पाछु गेलै, आर ओकर चारो महर भीड लाग्लै।

²⁵ भीडमे एकटा जनानी ओत्ते रहै, जकरा बारह सालसे खून बहेवाला बेमारी लाग्ल रहै।

²⁶ ऊ बहुते बैधसिके हातसे बहुते कष्ट भोगिके आपन सभे धन-दौलत ओर्याके भी ठीक नैभेलै रहे बरु ओकर हालत आरहौ बेसी खराब भेल रहै।

²⁷ जब ऊ सुनल्कै कि येशू आदमीसिके ठीक कैल्कै; तब ऊ भीडमे पाछुसे आबिके येशूके कपडा छुल्कै,

²⁸ ऊ एरं कैल्कै, कहिनेकी ऊ मनहैं मन सोचल्कै, “अगर हमे ओकर कपडा खाली छुबिलेबै ते, हमे ठीक भ्याजैबै।” सेल्याके ऊ भीडमेसे ओकर पाछु ऐलै आर ओकर कपडा छुबी लेल्कै।

²⁹ आर तुरन्ते ओकर खून बहेवाला बेमारी ठीक भ्यागेलै, आर आपन शरीरके बेमारी ठीक भ्यागेलै कहिके ओकरा मालुम भेलै।

³⁰ येशू भीडमे पाछु महर घुमिके देखल्कै आर पुछल्कै, “हमर कपडा के छुल्कै?” ऊ एरं सेल्याके कैल्कै कहिनेकी ऊ जानी लेल्कै कि ओकरासे ठीक करैके शक्ति निकल्लै रहे।

³¹ चेलासब येशूके पुछल्कै, “भीडके ठेलमठेल ते तुहें देख्बे करैछ, तैय्योपर तुहें कहैछ; कि हमरा के छुल्कै?”

³² येशू लगातार इन्हर-उन्हर देखे लाग्लै यी जानैके लिए कि ओकरा के छुल्कै रहे।

³³ उटा जनानी जानी लेल्कै कि ऊ ठीक भ्यागेलै छे, सेल्याके ऊ ऐलै आर आबिके येशूके पैरीमे गोड लागल्कै। ऊ जनानी येशूके बतैल्कै कि ऊ ओकरा छुल्कै रहे। ऊ जनानी सोचल्कै कि येशू ओकरापर गोसैतै आर सेल्याके ऊ जनानी खुबे डरैल रहै आर काँप्ते रहै।

³⁴ तब येशू ओकरा कहैल्कै, “हे बेटी, हमे तोरा ठीक कैलियौ कहिनेकी तुहें हमरापर विश्वास कैल्हैं। कुशलसे जो। तुहें आपन बेमारीसे पुरा तरहसे ठीक भ्या गेल्हैं छे।”

³⁵ जब येशू ओकरासे बोल्तहैं रहै, तखनिहैं यहूदी आदमीसिके सभाघरके मुखिया याइरसके घरसे आदमीसब आबिके कहैल्कै, “तोर बेटी ते मरि गेल्हौं। आब गुरुजीके परेशान करैके जरुरत नैछै।”

³⁶ मगर ओकरसिके कहेल बातके ध्यान नैद्याके येशू यहूदी आदमीसिके सभाघरके मुखियाके कहैल्कै, “नैडर, खाली हमरापर भरोसा राख्।”

³⁷ ऊ खाली पत्रुस, याकूब, ओकर भ्या यूहन्ना आर याइरसके खाली आपन संगमे आबैले अनुमति देल्कै। ऊ भीडमेसे आर कक्रहौ आबैले नैदेल्कै

³⁸ ऊसब यहूदी आदमीसिके सभाघरके मुखियाके घरमे ऐलै, आर येशू आदमीसिके बहुते जोर-जोरसे कानन-बाजन कर्ते देखल्कै।

³⁹ भितर ढुकिके येशू ओकरासिके कहैल्कै, “लडकी नैमर्लै छे, खाली सुत्ल छै। सेल्याके तोरासिके एरंके कानन-बाजन करैके जरुरत नैछै।”

⁴⁰ मगर ऊसब ओकर बात सुनिके हाँसे लाग्लै। तब येशू ओकरासिके सभैके घरसे बाहार भेजी देल्कै, आर ऊ लडकीके मयाँ-बाबु आर ओकर तीनटा चेलासिके संगमे ल्याके लडकी भेल जगहमे गेलै।

⁴¹ आर लडकीके हात पक्डीके ऊ कहैल्कै, “तालिता कुमी” जकर मतलब हैछै, “हे छोट लडकी, हमे तोरा कहैछियौ, उठ्!”

⁴² आर ऊ लडकी तुरन्ते उठ्लै आर चले फिरे लाग्लै। ऊ बारह सालके रहै। जेसब यी देखल्कै ऊसब पुरे आश्चर्य-चकित भ्यागेलै।

⁴³ तब येशू कडा रुपसे ओकर मयाँ-बाबुके चेतावनी देल्कै कि ऊसब यी खबरके नैफैलाबै कि येशू लडकीके मुर्दासे जिन्दा कैल्कै रहे। आर मयाँ-बाबुके कहैल्कै लडकीके कुछु खैले दहैं।