मर्कूस 2 - केवट नया कारार

येशू लखुवा मार्ल आदमीके ठीक करैछै

¹ बहुते दिनके बाद येशू कफर्नहुम गाँवमे घुमिके ऐलै, आर आदमीसब ऊ घरमे ऐलै छे कहिके सुनल्कै।

² बहुते आदमीसब जमा भेलै सेल्याके पुरा घर आदमीसिसे भरि गेलै। एत्तेतक कि केबाडीमे भी जगह नैरहै, आर ऊ ओकरासिके परमेश्वरके वचन प्रचार कर्ते रहै।

³ आर चार झन मिलिके एकटा लखुवा मार्ल आदमीके उठ्याके येशूके लगत आनल्कै।

⁴ भीडके कारणसे येशूके लगत नैलजाबे सकैके कारणसे, ऊसब येशू जते रहै ओकर उप्परके छपरी हटैल्कै, आर उघार्ल जगहसे ऊ लखुवा मार्ल आदमी सुत्ल खाट सहित उतारल्कै।

⁵ आपन उप्पर ओकरसिके विश्वास देखिके, येशू लखुवा मार्ल आदमीके कहैल्कै, “हे बालक, हमे तोर पापसिके माफ करैछियौ।”

⁶ उटा घरमे यहूदी धरमशास्त्रके पण्डितसब बैठ्ल रहै, आर येशू जे बात बोल्लै रहे उटा बातके विषयमे आपन मनमे एरं कहिके विचार कर्ते रहै,

⁷ “यी आदमी कहिने एरं बोलैछै? यी ते ईश्वर निन्दा छै! परमेश्वरके सिवाय आर कोय पापसिके माफ नैकरे सकैछै।”

⁸ येशू आपन मनमे जानी लेल्कै कि ऊसब मनमे कि सोचैछै, आर ओकरासिके कहैल्कै, “तोरासिके एरंको नैसोचना चाही।”

⁹ कि हमर लिए यी कहना आसान छै, “तोर पापसब माफ भेलौ?” या, कि हमर लिए यी कहना आसान छै, “उठ्, आपन खाट उठा आर लर?

¹⁰ मगर हमे, आदमीके बेटाके यी धर्तीमे आदमीसिके पापसब माफ करैके अधिकार छै कहिके तुहेंसब जान।” तब येशू लखुवा मार्ल आदमीके कहैल्कै

¹¹ हमे तोरा कहैछियौ, “उठ्, तोर खाट उठा, आर घर जो।”

¹² ऊ तुरन्ते उठ्लै, आर आपन खाट उठ्याके आपन घर चल गेलै। आदमीसब ओकरा देख्ते रहलै। एत्तेतक कि, सभेको आश्चर्य-चकित भेलै, आर हमेसब एरंको कहियो नैदेख्लियै, कहिके परमेश्वरके महिमा करे लाग्लै।

येशू लेवीके बोलाबैछै

¹³ येशू फेर एकबेर गालील समुन्दरके किनारमे गेलै। तब बहुते आदमीसब ओकरलगत ऐलै, आर ऊ ओकरासिके परमेश्वरके वचनसे सिखाबे लाग्लै।

¹⁴ तकरबाद जब येशू जैते रहै ऊ अल्फयसके बेटा लेवीके कर उठाबेवालासिके जगहमे बैठ्ल देखल्कै, आर ओकरा कहैल्कै, “हमर पाछु या आर हमर चेला बन।” तब लेवी खडा भेलै, आपन कामके छोडी देल्कै आर येशूके चेला बनी गेलै।

¹⁵ कुछु दिनके बाद येशू आर ओकर चेलासब लेवीके घरमे सझौवाके खाना खैते रहै। आर कर उठाबेवाला बहुते झन आर दोसर आदमीसब जे पापी कहलैल जैते रहै उहोसब ओत्ते रहै। ऊसब येशूके पाछु चलेवालासब रहै आर ऊसब येशू आर ओकर चेलासिके संगमे खैते रहै।

¹⁶ येशूके, जे आदमीसब पापी कहलैल जैते रहै आर कर उठाबेवालासिके संगमे खैते देखिके फरिसी समूहके आदमी यहूदी धरमशास्त्रके पण्डितसब ओकर चेलासिके कहैल्कै, “येशू कहिने कर उठाबेवाला आर पापी कहलैल ज्यावालासिके संगमे बैठिके खैछै?”

¹⁷ यी बात सुनिके येशू ओकरासिके कहैल्कै, “निरोगीसिके बैधके जरुरत नैपडैछै, मगर रोगीसिके बैधके जरुरत पडैछै। हमे पापसे भर्ल आदमीसिके पाप करैले छोड आर परमेश्वरके तरफ मन लगा कहिके बोलाबैले ऐलियै छे, ओकरासिके नै जे अपने आपके धर्मी छियै कहिके सोचैछै।”

येशूके उपास सम्बन्धी सवाल

¹⁸ बप्तिस्मा दिएवाला यूहन्ना आर फरिसी समूहके आदमीसिके चेलासब उपास रहते रहै। एक दिन कुछु आदमीसब आबिके येशूके पुछल्कै, “यूहन्नाके चेलासब, आर फरिसी समूहके आदमीसिके चेलासब उपास रहैछै, मगर तोर चेलासब कहिने उपास नैरहैछौं?”

¹⁹ येशू ओकरासिके जबाब देल्कै, “जबतक हमे आपन चेलासिके संगमे छियै, ऊसब केरंके उपास रहे सकैछै? ऊसब नैरहे सकैछै, कहिनेकी ऊसब खुश छै, ठीक ओहिने जेरंके एकटा दुलहाके बराती ओकर संगमे बिहाके खुशीयाली मनाबैछै

²⁰ मगर समय ऐतै, जब दुलहा ओकर बरातीसे अलग करैल जैतै, तब ऊसब उटा समयमे उपास रहतै।

²¹ अगर हमर शिक्षाके पुरना रितीरिवाजके संगमे मिलैल जैतै ते, यी एरं हैतै जेरंके पुरना कपडामे नया कपडाके चिप्पी लगाना। जब कपडा धोयल जैतै तब नया चिप्पी सुकडी जैतै आर कपडाके चिरी देतै। हमर शिक्षा यी कपडाके जुगुर बेकाम भ्याजैतै।

²² ओहिने करिके कोय भी आदमी नया अंगुरके मद्द पुरना चमडाके थैलीमे नैराखैछै, कहिनेकी अंगुरके मद्द फेन्या जैतै आर चमडाके थैली नैनमहरतै तब उटा अंगुरके मद्द चमडाके थैलीके फोडी देतै, तब अंगुरके मद्द आर चमडाके थैली दोनो खतम भ्याजैतै। मगर नया अंगुरके मद्द नया चमडाके थैलीमे राख्ल जैछै।”

येशू यहूदी आदमीसिके विश्राम दिनके प्रभु

²³ यहूदी आदमीसिके विश्रामके दिनके दिनमे, जब येशू आर ओकर चेलासब अनाजके खेत द्याके जैते रहै। उद्याके जैबेरियाँ चेलासब अनाज तोडीके ख्या लाग्लै।

²⁴ यी देखिके फरिसी समूहके आदमीसब ओकरा कहैल्कै, “तोर चेलासब जे काम यहूदी आदमीसिके विश्रामके दिनमे करैछौं, यी हमरसिके पुरना नियमके विरुद्ध छै। तोरा ओकरासिके एरं नैकरैले कहना चाही।”

^25-26 येशू ओकरासिके जबाब देल्कै, “कि तुहेंसब कहियो नैपढ्लहैं छे, बहुते समय पहेला आपनसिके महान पुर्खा दाऊद राजा कि कैल्कै रहे, जब अबियाथार प्रधान पुजारी रहै? जब दाऊद राजा आर ओकर संग-साथीसब भुख्ल रहै, तब दाऊद राजा परमेश्वरके पालमे गेलै आर उटा रोटी खैल्कै जेटा रोटी परमेश्वरके दानके रुपमे चढैल रहै आर आपन दोस्तसिके भी खैले देल्कै। आपनसिके धार्मिक नियमके मुताबिक, खाली यहूदी पुजारीसिके ही उटा रोटी खैके अनुमति रहै।”

²⁷ तब येशू ओकरासिके कहैल्कै, “यहूदी आदमीसिके विश्रामके दिन आदमीके भलाइके लिए बन्लै छे, मगर आदमी विश्रामके दिनके लिए नैबन्लै छे।

²⁸ सेल्याके हमे, आदमीके बेटा, यहूदी आदमीसिके विश्रामके दिनके भी मालिक छियै।”