मर्कूस 16 - केवट नया कारार

येशू मुर्दासे जिन्दा भेलै

¹ दोसर दिन सझौवा यहूदी आदमीसिके विश्रामके दिन बित्लके बाद मरियम जे मग्देला सहरके रहै, याकूब आर योसेसके मयाँ मरियम, आर सलोमी येशूके शरीरमे लगाबैले सुगन्धित अत्तर किनल्कै।

² ऐतबारके दिन भोरे, यी जनानीसब सुरुज उग्लहैं साथ सारामे गेलै।

³ रस्तामे जैबेरियाँ ऊसब एक दोसरके कहैल्कै, “हमरसिके लिए साराके द्वारसे बडका पत्थल के हट्या देतै?”

⁴ जब ऊसब सारा महर देखल्कै ते साराके द्वारमे भेल बडका पत्थल हटैल रहै।

⁵ जब जनानीसब सारामे पहुँचलै आर साराके भितर ढुक्लै तब ऊसब उजरा कपडा लगैल एकटा जवान आदमीके दहिना बगल बैठ्ल देखल्कै, आर ऊसब चकित भेलै।

⁶ जवान आदमी ऊ जनानीसिके कहैल्कै, “चकित नैहो, तुहेंसब नासरत गाँव निवासी येशूके खोजैछैं, जकरा क्रूसमे काँटी ठोकिके मारल्कै रहे। ऊ मुर्दासे जिन्दा भ्याके उठ्लै छे, ऊ एत्ते नैछै, ओकरा राख्ल जगह देख,

⁷ आर तुहेंसब जो ओकर चेलासब आर पत्रुसके कहिदहैं, येशू जिन्दा छै। ऊ गालील जिलामे जैछौ आर तहुँसब सभेको ओत्ते जो। तुहेंसब ओकरा ओत्ते देख्भैं, जेरं ऊ मरैसे पहेला तोरासिके कहैल्कौ रहे।”

⁸ यी बात सुनिके, ऊसब सारासे निक्लीके दौड्लै, कहिनेकी डर आर आश्चर्यसे ऊसब काँप्ते रहै। रस्तामे ऊसब कक्रहौ कुछु नैकहैल्कै, कहिनेकी ऊसब डरैल रहै।

येशू चेलासिके आपन दर्शन देल्कै

⁹ ऐतबारके भरौवा येशू मुर्दासे जिन्दा भ्याके उठ्लके बाद, ऊ सभैसे पहेला मरियम जे मग्देला सहरके रहै ओकरलगत देखा पड्लै। पहेला ओकरासे येशू सातटा भूत निकाल्लकै रहे।

¹⁰ ऊ जैके येशूके चेलासिके यी खबर सुनैल्कै। ऊसब विलाप करिके कान्ते रहै।

¹¹ जब ऊसब ओकरासे येशू जिन्दा भेलै आर मरियम लगत दिखाई पड्लै कहिके जब चेलासब सुनल्कै ओकरासिके विश्वास नैभेलै।

¹² तकरबाद उहे दिन, ओकर दीटा चेलासब यरूशलेम सहरसे गाँवमहर जैबेरियाँ ओकरसिके लगत येशू दोसर रुपमे प्रकट भेलै। मगर ऊसब ओकरा पहचाने नैसकल्कै

¹³ जब ऊसब ओकरा पहचानल्कै, ऊ दीटा चेला यरूशलेम सहर वापस गेलै। ऊसब ओकर दोसर चेलासिके बतैल्कै कि, ओकरसिके संगे कि भेलै। मगर ऊसब ओकरसिके बात विश्वास नैकैल्कै।

¹⁴ पाछु येशू एगार चेलासिके लगत खाना खैबेरियाँ प्रकट भेलै। ऊ ओकरासिके धोपल्कै कहिनेकी ऊसब बहुते हठी भेल रहै। येशू मुर्दासे जिन्दा भेल बातके गवाही ओकरा देखेवालासिके बात ऊसब विश्वास नैकैल्कै रहे।

¹⁵ तब येशू ओकरासिके कहैल्कै, “सारा संसारमे जैके सभे आदमीसिके खुश-खबरी प्रचार कर।

¹⁶ हमरामे विश्वास करेवाला आर बप्तिस्मा लिएवाला उद्धार पैतै, मगर हमरामे विश्वास नैकरेवाला दोषी ठहर्तै।

¹⁷ ऊसब जे हमरामे विश्वास करैछै, ओकरासिके यी चमत्कारसब करैके लिए अधिकार हैतै: हमर नाममे ऊसब भूत निकाल्तै, ऊसब नया भाषासब बोल्तै,

¹⁸ अगर ऊसब बिखवाला साँपसब पकड्तै, साँप ओकरा कोनो हानी नैकर्तै, आर अगर ऊसब कोनो बिखवाला चीज खैतै ते कोनो किसिमसे उटा ओकरसिके नोक्सानी नैकर्तै। ऊसब रोगी-बेमारीसिके उप्परमे आपन हात राख्तै आर ऊसब ठीक भ्याजैतै।”

¹⁹ प्रभु येशू यी सभे बात चेलासिके कहेलके बाद, परमेश्वर ओकरा स्वर्ग उठ्याके ल्यागेलै आर परमेश्वरके दहिना हातके बगल सम्मानके जगहमे बैठ्लै।

²⁰ तब चेलासब सभे जगहमे गेलै आर सभे आदमीसिके बीचमे खुश-खबरीके प्रचार कैल्कै। प्रभु ओकरासिके सहायता कैल्कै आर शक्तिशाली कामद्वारा वचनके साबित कैल्कै कि ओकरसिके सन्देश सच्चा रहै। आमेन।