मर्कूस 15 - केवट नया कारारराज्यपाल पिलातसके समनामे येशू ( मत्ती २७:१-२ , ११-२६ ; लूक २३:१-५ , १३-२५ ; यूह १८:२८-१९:१६ ) 1 भरौवा हैलहैं साथ प्रमुख पुजारीसब, यहूदी आदमीसिके अगुवासब, यहूदी धरमशास्त्रके पण्डितसब आर महासभाके सभे सदस्यसब सल्लाह करिके येशूके बान्हिके ल्यागेलै आर न्याय करैके लिए यहूदिया प्रदेशके रोमी राज्यपाल पिलातसके घरमे ल्यागेलै। 2 राज्यपाल पिलातस ओकरा पुछल्कै, “कि तुहें यहूदी आदमीसिके राजा छैं?” ऊ ओकरा जबाब देल्कै, “जेरं तुहें कहैछ यी ओहिने ही छै।” 3 प्रमुख पुजारीसब ओकरापर बहुते चीजके दोष लगैल्कै। 4 राज्यपाल पिलातस ओकरा फेर एरं कहिके पुछल्कै, “कि तोरलगत कोनो जबाब नैछौ? देख, ऊसब तोर विरुद्धमे कतनें चीजके दोष लगाबैछौ।” 5 मगर येशू चुपचाप रहलै, एत्तेतक कि राज्यपाल पिलातस आश्चर्य भेलै। 6 सभे साल निस्तार पावनके समयमे, राज्यपाल पिलातस सभे बेर कोनो एकटा कैदीके रिहा कर्ते रहै, जे आदमीके रिहा करैके माँग ऊसब करै। 7 उटा समय बारब्बा नामके एकटा आदमी रहै। जे अन्य क्रान्तिकारीसिके संगमे जेलमे रहै, जे रोमी सरकारके खिलाफ विद्रोहमे कुछु आदमीसिके जान मारल्कै रहे। 8 भीड राज्यपाल पिलातसके लगत ऐलै आर ओकरसे एकटा कैदीके मुक्त करैके लिए कहे लाग्लै जेरं ऊ सभे साल कर्ते रहै। 9 राज्यपाल पिलातस एरं कहिके ओकरासिके सवाल कैल्कै, “कि हमे तोरसिके लिए यहूदी आदमीसिके राजाके छोडिदियौ कहिके तुहेंसब चाहैछैं?” 10 कहिनेकी ऊ जान्ते रहै, कि प्रमुख पुजारीसब येशूके इर्ष्याके कारणसे गिरफ्तार कैल्कै रहे। 11 मगर प्रमुख पुजारीसब आदमीसिके भीडके उक्सैल्कै कि ऊसब राज्यपाल पिलातससे येशूके मुक्त करैके बजाय बारब्बाके मुक्त करैके माँग करै। 12 राज्यपाल पिलातस फेर भीडके पुछल्कै, “तब जकरा तुहेंसब यहूदी आदमीसिके राजा कहैछैं, ओकरा हमे कि करियौ ते?” 13 भीड फेर चिकर्लै, “ओकरा क्रूसमे काँटी ठोकिके जान मार।” 14 राज्यपाल पिलातस भीडके कहैल्कै, “कहिने? यी कि अपराध कैल्कै छे?” मगर आरहौ जोरसे चिकरीके ऊसब कहैल्कै, “ओकरा क्रूसमे काँटी ठोकिके जान मार।” 15 तब राज्यपाल पिलातस भीडके खुशी करैले ओकरसिके लिए बारब्बाके छोडिदेल्कै, आर येशूके कोडा लग्याके क्रूसमे काँटी ठोकिके जान मारैले रोमी सिपाहीसिके सौंपल्कै। 16 तब राज्यपाल पिलातसके सिपाही येशूके राज्यपालके महलके ऐगनमे ल्यागेलै (जकरा प्रेटोरियन कहैछै), आर सभे सिपाहीसिके जमा कैल्कै। 17 सिपाहीसब ओकरा बैगनी रंगके कपडा यी अभिनय करैके लिए पिन्हैल्कै जेरं कि ऊ एकटा राजा छै आर सिपाहीसब ओकर मजाक उडाबे लाग्लै। ऊसब काँटसे बन्ल एकटा मकुट भी बनैल्कै आर ओकरा राजा बनाबैके अभिनय करैके लिए उटा मकुटके ओकर मथामे लग्या देल्कै। 18 तब ऊसब ओकरा अभिवादन करैले शुरु कैल्कै, यी देखाबैके लिए कि ऊसब ओकर सम्मान करैछै आर ऊसब चिकरे लाग्लै, “यहूदी आदमीसिके राजा अमर रहै।” 19 ऊसब घुरी-घुरी ओकर मथामे छडी ल्याके मारै, ऊसब ओकर अपमान करैके लिए क्याबेर ओकरापर थुकल्कै आर ऊसब ओकर सम्मान दियैके अभिनय कर्ते ओकर आगुमे झुके लाग्लै। 20 तब येशूके निन्दा करिके ओकर बैगनी रंगके कपडा खोली देल्कै, आर ओकर आपने कपडा लग्या देल्कै। तकरबाद ओकरा क्रूसमे काँटी ठोकिके जान मारैले सहरसे बाहार ल्यागेलै। येशूके क्रूसमे काँटी ठोकिके जान मारल्कै ( मत्ती २७:३२-४४ ; लूक २३:२६-४३ ; यूह १९:१७-२७ ) 21 जब ऊसब सहरसे बाहार जैते रहै, तब सिमोन नामके एकटा आदमी गाँवसे यरूशलेम सहरमे ऐते रहै। सिमोन कुरेनी सहरके रहै आर ऊ सिकन्दर आर रुफसके बाबु रहै। सिपाहीसब ओकरा आदेश देल्कै कि ऊ क्रूसके उठ्याके उटा जगह तक ल्याजै जते ऊसब येशूके क्रूसपर चढैतै। 22 सिपाहीसब येशूके गलगथा नामके जगहमे ल्यागेलै, जकर अरामी भाषामे मतलब, “खोपडीके जगह” हैछै। 23 तब सिपाहीसब येशूके गन्धरस नामके दवा मिल्ल अंगुरके मद्द पियैके लिए देल्कै ताकी ऊ चीज ओकरा दरद महसुस नैकरैमे सहायता करै। मगर ऊ उटा पियैले इन्कार कैल्कै। 24 सिपाहीसब ओकरा क्रूसमे काँटी ठोकिके टाँगल्कै। ओकर कपडासब ककर भागमे पड्तै कहिके निर्णय करैले ऊसब चिट्ठा बन्याके बाँटल्कै। 25 ऊसब ओकरा जखनी क्रूसमे टाँगल्कै रहे तखनी भरौवाके न बज्लै रहे। 26 सिपाहीसब येशूके मथाके उप्परमे एकटा तख्ता लगैल्कै। ओकरामे येशूके क्रूसमे काँटी ठोकैके कारण लिख्ल रहै आर ओकरामे यी शब्द लिख्ल रहै: “यहूदी आदमीसिके राजा।” 27 ऊसब ओकरसंगे दीटा डकेतसिके क्रूसमे काँटी ठोकिके टाँगल्कै: एकटाके ओकर दहिना बगल आर एकटाके बायाँ बगल। 28 धरमशास्त्रके वचन एरंके पुरा भेलै, जे ख्रीष्टके बारेमे कहैछै, “ओकरा एकटा अपराधीके जुगुर गन्ल जैतै।” 29 उटा जगहसे ज्यावाला आदमीसब एरं कहिके मुडा हिल्याके ओकर निन्दा कैल्कै, “वाह! तुहें जे कहते रहैं कि तुहें परमेश्वरके मन्दिरके तोड्भैं आर तीन दिनमे फेर बनैभैं! 30 क्रूससे उतरिके या, आर अपने आपके बचा।” 31 ओहिने करिके प्रमुख पुजारीसब भी यहूदी धरमशास्त्रके पण्डितसिके संगे मिलिके एरं कहिके एक दोसरसे ओकर मजाक कैल्कै, “यी दोसरके ते बचैल्कै मगर अपने आपके नैबचाबे सक्तै। 32 यी आदमी जे इस्राएलीसिके ख्रीष्ट आर राजा छियै कहिके दाबी करैछै आब क्रूससे उतरिके आबक, ताकी हमेसब देखियै आर ओकरापर विश्वास करे सकियै कि यी हमरसिके राजा छै।” आर जे ओकरसंगे क्रूसमे टाँग्ल गेलै रहे, ऊसब भी ओकर निन्दा कर्ते रहै। येशूके मौत ( मत्ती २७:४५-५६ ; लूक २३:४४-४९ ; यूह १९:२८-३० ) 33 बारह बजेसे तीन बजेतक पुरा देशमे अनहार भेलै। 34 तीन बजेके समयमे येशू एरं कहिके जोरसे चिकर्लै, “इलोई, इलोई, लामा सबखथनी?” जकर मतलब छै, “हे हमर परमेश्वर, हे हमर परमेश्वर, तुहें हमरा कथिले त्यागलह छे?” 35 ऊसब आदमीसिमेसे कुछु आदमीसब जे ओकर नज्दिकमे खडा रहै, ओकर आवाज सुनल्कै मगर ओकर बोल्ल बात नैबुझल्कै आर एक दोसरसे कहैल्कै, “सुन, ऊ परमेश्वरके वक्ता एलियाके स्वर्गसे आपन सहायताके लिए बोलाबैछै।” 36 ऊसब आदमीसिमेसे एकटा आदमी दौडिके गेलै, एकटा स्पन्ज लेल्कै आर एकरा कुछु खट्टा अंगुरके मद्दमे डुबैल्कै। ऊ एकटा लाठीके उप्परमे जोडी देल्कै आर एकरा येशूके मुख लगत पहुँचैल्कै ताकी ऊ ओकरामेसे कुछु सिर्का पिये सकै। उटा आदमी कहैल्कै, “रूक आर कुछु नैकर। हमरासिके देखना चाही कि परमेश्वरके वक्ता एलिया ऐतै आर ओकरा क्रूससे मुक्त कर्तै कि नैकर्तै।” 37 तब येशू बडका आवाज निकालीके आपन जान त्यागल्कै। 38 तब उटा मोटका पर्दा जे परमेश्वरके मन्दिरमे लट्कैल रहै, जे सभैके परमेश्वरके उपस्थितिमे प्रवेश करैसे रोकते रहै, उप्परसे निच्चातक दी टुकरा भ्याके चिर्ल गेलै। 39 येशूके एरंके बडका आवाज निकालीके जान त्याग्ते देखिके ओत्ते खडा भेल कप्तान कहैल्कै, “यी सच छै, कि यी आदमी परमेश्वरके बेटा रहै।” 40 ओत्ते दुर्हैसे देखेवाला कुछु जनानीसब भी रहै। ओकरासिमेसे मरियम जे मग्देला सहरके रहै, आर सलोमी, मरियम छोटका याकूब आर योसेसके मयाँ रहै। 41 पहेला जब येशू गालील जिलामे चारो महर यात्रा कैल्कै, तब यी तीनो जनानी ओकर चेलाके रुपमे ओकर अनुसरण कैल्कै आर येशूके जे भी जरुरत पडै ओकरा ऊसब पुरा करै। कतनें आरहौ जनानीसब भी गालील जिलामे ओकरसंगे-संगे रहै आर ओकरसंगे यरूशलेम सहर ऐलै रहे। ऊसब भी दूरसे देख्ते रहै। येशूके दफन ( मत्ती २७:५७-६१ ; लूक २३:५०-५६ ; यूह १९:३८-४२ ) 42-43 योसेफ नामके एकटा आदमी रहै जे अरिमाथिया सहरके रहै। ऊ महासभाके एकटा प्रमुख सदस्य रहै आर ऊ स्वयं परमेश्वरके राज्यके इन्तजार कर्ते रहै। ऊ बहादुरीके साथ राज्यपाल पिलातस कते गेलै आर येशूके लासके माँग कैल्कै ताकी ओकरा दफन करे सकै। ऊ एरंको सेल्याके कैल्कै कहिनेकी यी तैय्यारीके दिन रहै आर पहलहैं दिपहरिया भ्यागेलै रहे। यी यहूदी आदमीसिके विश्राम दिनसे पहेला दिन रहै, जब ओकरासिके लास दफ्नाबैके लिए लजाबैले मना रहै। 44 जब राज्यपाल पिलातस सुनल्कै कि येशू पहलहै ही मरि गेलै रहे, तब ऊ आश्चर्यचकित भ्यागेलै। तब राज्यपाल पिलातस कप्तानके आपन लगत बोल्याके पुछल्कै, “कि येशू पहलहै ही मरि गेलै?” 45 ओकर मौत भेलै कहिके कप्तानसे खबर पैलके बाद योसेफके येशूके लास लजाबैले अनुमति देल्कै। 46 तब योसेफ मलमलके कपडा किनल्कै, आर ऊ येशूके शरीरके क्रूससे निच्चा उतारल्कै आर ओकरा यहूदी रिवाजके मुताबिक कफनके कपडामे लपेटल्कै आर येशूके शरीरके एकटा दफ्नाबेवाला गुफामे राखी देल्कै, जेटा चट्टानके खोधिके बनैल रहै। तब ऊ एकटा बडका गोल पत्थल गडक्याके साराके गुफाके प्रवेश द्वारके समनामे ओकरा बन्द करैके लिए राखी देल्कै। 47 मरियम जे मग्देला सहरके रहै आर योसेसके मयाँ मरियम येशूके दफन कैल जगह देख्ते रहै। |
Kayort (केवट) Bible by The Love Fellowship is licensed under Creative Commons Attribution-ShareAlike 4.0 License.
Beyond Translation