मत्ती 4 - केवट नया कारार

शैतानके द्वारा येशू ख्रीष्टके परीक्षा

¹ तब शैतान येशूके परीक्षा करै कहिके पवित्र आत्मा येशूके सुनसान जगहमे ल्यागेलै।

² सुनसान जगहमे येशू चालीस दिन आर चालीस राततक कुछु नैखैल्कै। तब ओकरा खुब भुख लाग्लै।

³ तब शैतान ओकरलगत आबिके कहैल्कै, “अगर तुहें परमेश्वरके बेटा छह ते यी पत्थलसिके रोटी बनै कहिके आज्ञा द्याके साबित कर, आर तुहें ख्या सकह।”

⁴ मगर येशू जबाब देल्कै, “धरमशास्त्रमे लिख्ल छै, ‘आदमी खाली रोटीसे ही जिन्दा नैरहैछै, मगर ऊ परमेश्वरके कहेल सभे वचनके मानिके जिन्दा रहतै।’ ”

⁵ तकरबाद शैतान येशूके पवित्र सहर, यरूशलेम सहरके परमेश्वरके मन्दिरके उच्च जगहमे लज्याके खडा करैल्कै।

⁶ आर ओकरा कहैल्कै, “अगर तुहें परमेश्वरके बेटा छह ते, एत्तेसे निच्चा फानिके साबित कर, कि तोरा चोट नैलाघौं, कहिनेकी धरमशास्त्रमे यी लिख्ल छै: ‘परमेश्वर तोर रक्षाके लिए आपन स्वर्गदूतसिके आज्ञा देथौं, आर तोर पैरीमे पत्थल ल्याके चोट नैलागै कहिके ऊसब तोरा लोकी लेथौं।’ ”

⁷ येशू ओकरा कहैल्कै, “धरमशास्त्रमे यी भी लिख्ल छै: ‘तोरा आपन परमेश्वरसे यी साबित करवाबैके कोशिश नैकरना चाही कि ऊ आपन वादाके पुरा कर्तै।’ ”

⁸ फेर शैतान येशूके एकटा बडका पहाडमे लज्याके संसारके सभे राज्य आर ओकर शान-शौकत ओकरा देखैल्कै।

⁹ आर ओकरा कहैल्कै, “अगर तुहें हमर आगुमे झुकिके हमर आराधना कर्भ ते, यी सभे कुछु हमे तोरा द्या देभौं।”

¹⁰ तब येशू ओकरा कहैल्कै, “शैतान, तुहें हमर लगतसे दूर भ्याजो! कहिनेकी धरमशास्त्रमे लिख्ल छै: ‘तुहें खाली आपन प्रभु परमेश्वरके आगुमे झुकिके ओकर आराधना करिहैं आर खाली ओकरे सेवा करिहैं।’ ”

¹¹ तब शैतान येशूके छोडिके चल गेलै आर स्वर्गदूतसब आबिके ओकर सेवा कैल्कै।

गालील जिलामे येशू ख्रीष्टके कामके शुरुआत

¹² बप्तिस्मा दिएवाला यूहन्नाके पक्डीके जेलमे ध्या देल्कै कहिके सुन्लके बाद येशू यहूदिया प्रदेश छोडिके गालील जिलाके नासरत गाँवमहर वापस चल गेलै।

¹³ तकरबाद ऊ नासरत गाँव छोडिके कफर्नहुम गाँवमे रहे लाग्लै। कफर्नहुम गाँव उटा इलाकामे समुन्दरके किनारमे बस्ल रहै, जते जबुलुन आर नप्तालीके कुलके आदमीसब रहते रहै।

¹⁴ परमेश्वरके वक्ता यशैयाद्वारा बहुते पहेला कहेल परमेश्वरके वचन पुरा हुऐले एरं भेलै:

¹⁵ “यर्दन लद्दीके उपार गालीलके समुन्दरमहर ज्यावाला रस्तामे भेल जबुलुन आर नप्तालीके कुलके इलाकामे रहेवाला आदमीसब आर गालील जिलामे रहेवाला गैर-यहूदी आदमीसब!

¹⁶ परमेश्वरके चिन्हले बिना अनहारमे रहेवाला आदमीसब एकटा महान ज्योतिके देख्तै। यी ज्योति ऊ आदमीसिके उद्धारके रस्ता देखैतै जे परमेश्वरके चिन्है बिना जीवन बिताबैछै आर अनन्तकाल तक मौतके रस्तापर छै।”

¹⁷ उहे समयसे येशू प्रचार कर्ते कहे लाग्लै, “पाप करैले छोड आर परमेश्वरके तरफ मन लगा, कहिनेकी स्वर्गके राज्य नज्दिक ऐल छै।”

येशूके पहेला चेलासब

¹⁸ एक दिन, गालील समुन्दरके किनार द्याके जैबेरियाँ येशू पत्रुस कहेल ज्यावाला सिमोन आर ओकर छोटका भ्या अन्द्रियासके समुन्दर किनारमे जाल फेक्ते देखल्कै, कहिनेकी ऊसब मछमारा रहै।

¹⁹ तब येशू ओकरासिके कहैल्कै, “हमरसंगे या, आर हमर चेला बन; आब तुहें माछ नैमार्भैं, मगर हमे तोरा सिखैबौ कि आदमीसिके हमर चेला बनैले केरंके सिखाबे पडैछै।”

²⁰ तब ऊसब तुरन्ते आपन माछ मारेवाला काम बन्द कैल्कै, आर ओकर चेला बनैले ओकरसंगे गेलै।

²¹ तकरबाद ऊसब ओत्तेसे जैते-जैते येशू जब्दियाके दीटा बेटा, याकूब आर यूहन्नाके देखल्कै। ऊसब आपन बाबु जब्दियाके संगे नावमे बैठिके आपन जाल तैय्यार कर्ते रहै। येशू ओकरासिके भी बोलैल्कै।

²² तब तखनिहैं ऊसब नाव आर आपन बाबुके नावमे छोडिके येशूके चेला बनैले ओकरसंगे चल गेलै।

गालील जिलामे येशूके शिक्षा, प्रचार आर चंगाई

²³ तब येशू यहूदी आदमीसिके सभाघरसिमे शिक्षा सिखैते, परमेश्वरके राज्यके खुश-खबरी प्रचार कर्ते आर आदमीसिमे भेल सभे किसिमके रोग-बेमार आर शारीरिक कमजोरी ठीक कर्ते सारा गालील जिलाभर घुम्लै।

²⁴ सेल्याके गालील जिलाके उत्तर दिशाके सिरिया प्रदेशभर ओकर चर्चा फैल्लै। आदमीसब सभे किसिमके रोग आर पिडासे सतैल रोगी-बेमारीसिके येशू लगत आनल्कै। ओकरासिमेसे कक्रहौ भूत लाग्ल रहै, कक्रहौ मिर्गी लाग्ल रहै आर कक्रहौ लखुवा मार्ल रहै। आर येशू सभैके ठीक कैल्कै।

²⁵ तब गालील जिलासे, डेकापोलिसके इलाकासे (जकर मतलब दशटा सहर), यरूशलेम सहरसे, यहूदिया प्रदेशसे आर यर्दन लद्दीके उपारके इलाकासे आदमीसिके बडका भीड येशूके पाछु लाग्लै।