मत्ती 19 - केवट नया कारार

छुटापत्र नैकरैले शिक्षा

¹ यी सभे बात बोलीके येशू गालील जिलासे पैदल यर्दन लद्दीके पार यहूदिया प्रदेशमहर गेलै।

² आदमीसिके बडका भीड ओकर पाछु-पाछु लाग्लै आर ऊ ओकरासिके ठीक कैल्कै।

³ फरिसी समूहके आदमी ओकरलगत आबिके ओकर परीक्षा करैले पुछल्कै, “कि मरदके लिए आपन पतनीसे छुटापत्र लेना धरमशास्त्रके मुताबिक छै?”

⁴ मगर येशू ओकरासिके जबाब देल्कै, “कि तुहेंसब धरमशास्त्रमे नैपढ्लहैं छे, ‘सृष्टिकर्ता आदमीसिके सृष्टिके शुरुहैमे नर आर नारी करिके बनैल्कै।’

⁵ आर परमेश्वर कहैल्कै, ‘सेल्याके आदमी आपन मयाँ-बाबुके छोडिके आपन पतनीके संगे मिलिके रहैछै, आर ऊ दोनोटा एक हैछै।

⁶ ऊसब आबसे दी झनके जुगुर नै, मगर ऊसब एक झनके जुगुर छै।’ सेल्याके जकरा परमेश्वर एक साथ जोडल्कै छे, ओकरा कोनो भी आदमी अलग नैकरक।”

⁷ ऊसब कहैल्कै, “मूसा कहिने छुटापत्रके कागज लिखिके आपन पतनीके त्यागे सक्भैं कहिके आज्ञा देल्कै?”

⁸ सेल्याके येशू ओकरासिके कहैल्कै, “कहिनेकी तुहेंसब जिद्दी रहैं, सेल्याके मूसा तोरासिके पतनीके त्याग करैके नियम देल्कौ छे। मगर शुरुहैसे एरं नैरहै।

⁹ हमे तोरासिके कहैछियौ, जे आदमी व्यबिचारके कारणके सिवाय आपन पतनीके छुटापत्र द्याके दोसर जनानीसे बिहा करैछै, ऊ आदमी व्यबिचार करैछै।”

¹⁰ चेलासब येशूके कहैल्कै, “पति पतनीसिके सम्बन्ध अहिने छै ते, बिहा नैकरना ही बढियाँ हैतै।”

¹¹ येशू ओकरासिके जबाब देल्कै, “सभे आदमी यी वचन स्वीकार करे नैसक्तै, खाली उहे आदमीसब एरं करे सकैछै जकरा परमेश्वर ऊ तरिकासे जियैके क्षमता देल्कै छे।

¹² बिहा नैकरैके अलग-अलग कारण हैछै। कहिनेकी कतनें झन जनमसे ही नपुंसक हैछै, कक्रहौ दोसर आदमीसब नपुंसक बन्या दैछै, आर कतनें झन परमेश्वरके राज्यके लिए बिहा नैकरेवाला भी हैछै। ऊसब जे बुझैमे सक्षम छै, बुझक।”

येशूद्वारा बच्चासिके आशीर्वाद

¹³ आदमीसब बच्चासिके येशूके लगत आने लाग्लै, कि ऊ ओकरासिपर हात राखिके प्रार्थना कर्तै आर आशीर्वाद देतै; मगर चेलासब आदमीसिके धोपल्कै।

¹⁴ मगर येशू कहैल्कै, “छोटका बच्चासिके हमरलगत आबैले दहैं, एकरासिके नैरोक, कहिनेकी उहे आदमीसब जे यी बच्चासिके जुगुर भरोसाके लायक छै परमेश्वरके राज्यमे रहतै।”

¹⁵ तब येशू बच्चा सिपर हात राखिके आशीर्वाद देलके बाद ऊ ओत्तेसे चल गेलै।

जवान मातबर आदमी

¹⁶ एकटा आदमी येशूके लगत आबिके कहैल्कै, “हे बढियाँ गुरु, हमे कोन काम करियै कि परमेश्वर हमरा कहियो खतम नैहुएवाला जीवन दै?”

¹⁷ येशू ओकरा जबाब देल्कै, “बढियाँ कामके विषयमे तुहें हमरा कथिले पुछैछैं? बढियाँ ते खाली एकझन छै। तुहें कहियो खतम नैहुएवाला जीवन पाबैले चाहैछैं ते, परमेश्वरके देल विधि-विधान पालन कर।”

¹⁸ ऊ ओकरा कहैल्कै, “कोन-कोन आज्ञा हमे पालन करियै?” येशू कहैल्कै, “तुहें हत्या नैकरिहैं, तुहें व्यबिचार नैकरिहैं, तुहें झुट्ठा गवाही नैदिहैं।

¹⁹ आपन मयाँ-बाबुके आदर करिहैं, आर आपन पडोसीके आपने जुगुर प्रेम करिहैं।”

²⁰ ऊ आदमी ओकरा कहैल्कै, “गुरुजी, यी सभे आज्ञा ते हमे लडकपनसे पालन कैले ऐलियै छे। आब हमरामे कोन कमी छै?”

²¹ येशू ओकरा कहैल्कै, “एकटा काम छै जे तोरा आब करैके जरुरत छौ; जो, आर तोरलगत जे जतनें छौ बेचिके पैसा गरिबसिके दहैं, अगर तुहें एरं करैछैं ते, तोरलगत स्वर्गमे सम्पति हैतौ। तोर एरं कैलके बाद, या आर हमर चेला बनी जो।”

²² जब ऊ आदमी यी बात सुनल्कै, दुःखित भ्याके चल गेलै, कहिनेकी ओकरलगत बहुते धन-दौलत रहै।

²³ तब येशू आपन चेलासिके कहैल्कै, “हमे तोरासिके सच कहैछियौ, मातबर आदमीसिके परमेश्वरके राज्यमे प्रवेश करना बहुते कठिन छै।”

²⁴ फेर हमे तोरासिके कहैछियौ, “एकटा ऊँटके लिए सियाके छेद द्याके ढुकना मुश्किल छै, मगर एकटा मातबर आदमीके लिए परमेश्वरके राज्यमे जाना बहुते मुश्किल छै।”

²⁵ यी सुनिके चेलासब बहुते चकित भ्याके पुछल्कै, “फेर ककरो लिए परमेश्वरके राज्यमे प्रवेश करैके लिए बचैल जाना केरंके सम्भव छ?”

²⁶ येशू ओकरासिके देखिके कहैल्कै, “यी आदमीसिके लिए ते यी असम्भव छै, मगर परमेश्वरके लिए नै, कहिनेकी परमेश्वरके लिए सभे कुछु सम्भव छै।”

²⁷ तब पत्रुस ओकरा कहैल्कै, “हमरसिके कि हैतै? हमेसब तोर चेला बनैके लिए सभे कुछु छोडी देलियै छे।”

²⁸ येशू ओकरासिके कहैल्कै, “हमे तोरासिके सच कहैछियौ, तुहेंसब जे हमर चेला बन्लहैं छे, नया सृष्टिमे जखनी हमे, आदमीके बेटा आपन महिमामय सिंहासनपर विराजमान हैबै, तहिया तहुँसब बारह सिंहासनमे बैठिके इस्राएलीसिके बारह कुलके न्याय कर्भैं।

²⁹ जे भी आदमी आपन घरके त्याग करिदेल्कै या भ्या-बहिनके या मयाँ-बाबुके या बेटाबेटीके या जगह जमिनके त्यागल्कै छे, जे चीज ऊ त्यागल्कै छे उटा सभे चीज वापस पैतै, आर कहियो खतम नैहुएवाला जीवन पैतै।

³⁰ मगर बहुते आदमीसब जे एखनी महान छै ओकरासिके तखनी विनम्र बनैल जैतै, आर बहुते आदमी जे एखनी विनम्र छै, ऊसब उटा समयमे महान बनी जैतै।”