लूका 5 - केवट नया कारार

येशूके पहेला चेलासब

¹ आदमीसब परमेश्वरके वचन सुनैले ओकर चारो बगल ठेलमठेल कर्ते रहै आर ऊ गनेसरेत समुन्दर (अर्थात गालील समुन्दर) के बगलमे खडा रहै।

² येशू समुन्दरके बगल कातमे दीटा नाव देखल्कै, मगर मछबारसब नावसे उतरिके आपन माछ मारेवाला जालसब धोय्ते रहै।

³ उटा दोनोटा नावमेसे एकटा नाव सिमोनके रहै, ओकरामे चढिके ऊ नावके बगल कातसे एक रति आगु लजाबैले कहैल्कै ऊ नावमे बैठिके भीडके शिक्षा दिए लाग्लै।

⁴ भीडके आदमीसिके ओतनें बोल्लके बाद येशू सिमोनके कहैल्कै, “नावके आरहौ गहिर महर लज्याके माछ पक्डैले आपन जाल फेक।”

⁵ मगर सिमोन कहैल्कै, “प्रभु, हमेसब रातभर मेहनत करिके भी कुछु नै हात लाग्लै तैय्योपर भी तोर कहेल मुताबिक हमे जाल फेक्बै।”

⁶ जब पत्रुस आर ओकर संगसब जाल फेकल्कै, तब ऊसब एक ढेरी माछ पक्डल्कै आर ओकरसिके जाल भांगे लाग्लै।

⁷ तब ऊसब दोसर नाववाला संगसिके इशारा करिके बोलैल्कै आर ओकरसिके दोनो नाव माछसे भरि गेलै, एत्तेतक कि दोनो नावसब डुबै जेरं हुए लाग्लै।

⁸ तब यीसब देखिके येशूके पैर पक्डीके सिमोन पत्रुस कहैल्कै, “हे प्रभु हमर लगतसे चल जा कहिनेकी हमे पापी आदमी छियै।”

⁹ एतनें माछ पकड्ल देखिके ऊ आर ओकर संगमे हुएवालासब सभेको बहुते चकित भेलै।

¹⁰ ओहिने करिके ओकर साथी, जब्दियाके बेटासब याकूब आर यूहन्ना भी चकित भ्यागेलै। येशू सिमोनके कहैल्कै, “नैडर, हमरसंगे या, आर हमर चेला बन; आब तुहें माछ नैमार्भैं, मगर हमे तोरा सिखैबौ कि आदमीसिके हमर चेला बनैले केरंके सिखाबे पडैछै।”

¹¹ जब ऊसब आपन नावके किनारमे आनल्कै, तब ऊसब आपन सभे कुछु त्यागीके ओकर चेला बनैले ओकरसंगे गेलै।

कुष्ठरोग लाग्ल आदमीके येशू ठीक कैल्कै

¹² जब ऊ कोनो एकटा सहरमे रहै तब कुष्ठरोग लाग्ल एकटा आदमी येशूके देखिके ओकर पैरमे गोड लागिके बिन्ती करे लाग्लै कि, “हे प्रभु तुहें अगर इच्छा कर्भ ते हमरा ठीक क्या देभ।”

¹³ ऊ आपन हात पसारिके छुबिके कहैल्कै, “हमे इच्छा करैछियै, तुहें ठीक भ्याजो।” आर तुरन्ते ओकर कुष्ठरोग ओकरसे हटिगेलै।

¹⁴ येशू ओकरा आदेश देल्कै, “तुहें यी बात कक्रहौ नैकहिहैं कि हमे तोरा ठीक कैलियौ छे, मगर जैके तुहें पहेला यहूदी पुजारीके आपन घा देखा कि तुहें ठीक भ्या गेल्हैं छे। परमेश्वरके लिए बलिदान चढा जकर विषयमे मूसा कुष्ठरोगसे ठीक भेल आदमीके लिए आज्ञा देल्कै रहे, ताकी पुजारी यी बातके घोषणा करे सकै कि तुहें ठीक भ्या गेल्हैं छे, ताकी आदमीसिके एकर सबूत है।”

¹⁵ मगर येशूके विषयमे खबर आरहौ बेसी चारो महर भ्यागेलै आर आदमीसिके बडका भीड ओकर बात सुनैले आर आपन रोगसिसे ठीक हुऐले जमा है।

¹⁶ मगर येशू अक्सर सुनसान जगहमे जैके प्रार्थना करै।

लखुवा मार्ल आदमीके येशू ठीक कैल्कै

¹⁷ एक दिन येशू शिक्षा दियै बेरियाँ गालील जिला आर यहूदिया प्रदेशके बहुते गाँवके आर यरूशलेम सहरसे ऐल फरिसी समूहके आदमीसब आर यहूदी धरमशास्त्रके पण्डितसब ओकर लग्हैमे आबिके बैठ्ल रहै आर बेमारी आदमीसिके ठीक करैके येशूसंगे परमेश्वरके सामर्थ्य रहै।

¹⁸ तब आदमीसब एकटा आदमीके जकरा लखुवाके बेमारी रहै, खाटमे आनल्कै आर ऊसब ओकरा घरके भितर लज्याके येशूके आगुमे राखैके उपाय खोज्ते रहै।

¹⁹ मगर जब भीडके कारणसे ओकरा भितर लजाबैले कोनो रस्ता नैमिल्लै तब ऊसब छपरीके उप्परमे चढ्लै आर ऊसब टाली हट्याके ओकरा खाट सहित येशूके आगुमे उतारि देल्कै।

²⁰ येशू ओकरसिके विश्वास देखिके ओकरासिके कहैल्कै, “हे आदमी, हमे तोर पापसिके माफ करैछियौ।”

²¹ तब यहूदी धरमशास्त्रके पण्डितसब आर फरिसी समूहके आदमीसब सवाल करे लाग्लै “ईश्वर निन्दा करेवाला यी के छै? परमेश्वरके सिवाय आर कोय पापसिके माफ नैकरे सकैछै।”

²² मगर येशू ओकरसिके मनके बात जानीके ओकरासिके जबाब देल्कै, “तोरासिके आपन मनमे एरंको नैसोचना चाही।

²³ कि हमर लिए यी कहना आसान छै, ‘तोर पापसब माफ भेलौ?’ या, कि हमर लिए यी कहना आसान छै, ‘उठ, आर लर?’

²⁴ मगर हमे, आदमीके बेटाके यी धर्तीमे आदमीसिके पापसब माफ करैके अधिकार छै कहिके तुहेंसब जान।” तब येशू लखुवा मार्ल रोगी आदमीके कहैल्कै हमे तोरा कहैछियौ, “उठ्, तोर खाट उठा, आर घर जो।”

²⁵ तब ऊ तुरन्ते ओकरेसिके समनामे उठ्लै आर जे खाटमे ऊ बेमार पड्ल रहै से उठ्याके परमेश्वरके महिमा कर्ते ऊ आपन घर गेलै।

²⁶ तब सभेकोय आश्चर्य भेलै आर ऊ सभेको परमेश्वरके महिमा कैल्कै आर भयभीत भ्याके एरं कहैल्कै, “ऐज हमेसब नया बात देख्लियै।”

लेवीके बोलाहट

²⁷ तब यी सभे बातके बाद येशू बाहार गेलै आर लेवी नामके कर उठाबेवाला एकटा आदमीके कर उठैते कर उठाबेवालासिके जगहमे बैठ्ल देखल्कै आर ओकरा कहैल्कै, “हमर पाछु या आर हमर चेला बन।”

²⁸ तब ऊ सभे कुछु छोडिके उठ्लै आर येशूके चेला बनी गेलै।

²⁹ तकरबाद लेवी येशूके आपन घरमे भोज खैले बोलैल्कै। उटा भोजमे कर उठाबेवाला बहुते झन कर्मचारीसब आर बहुते आदमीसब येशू आर ओकर चेलासिके संगमे खैले बैठ्ल रहै।

³⁰ येशूके चेलाके विरोधमे एरं कहिके यहूदी धरमशास्त्रके पण्डितसब आर फरिसी समूहके आदमीसब कुड-कुडैते येशूके चेलासिके कहैल्कै, “तुहेंसब कर उठाबेवालासिके संगे आर पापी कहलैल ज्यावाला आदमीसिके संगे कहिने खानपिन करैछैं?”

उपास सम्बन्धी सवाल

³¹ मगर येशू ओकरासिके जबाब देल्कै, “निरोगीसिके बैधके जरुरत नैपडैछै, मगर रोगीसिके बैधके जरुरत पडैछै।

³² हमे पापसे भर्ल आदमीसिके पाप करैले छोड कहिके बोलाबैले ऐलियै छे, ओकरासिके नै जे अपने आपके धर्मी छियै कहिके सोचैछै।”

³³ ऊसब येशूके कहैल्कै, “यूहन्नाके चेलासब घुरी-घुरी उपास रहैछै, आर प्रार्थना करैछै, फरिसी समूहके आदमीसिके चेलासब भी ओहिने करैछै; मगर तोर चेलासब खैते पिते रहैछौं।”

³⁴ येशू ओकरासिके जबाब देल्कै “तुहेंसब बिहाके भोजमे दुलहाके संगमे आबेवाला बरातीसिके खाना नैखिल्याके भुख्ले भेज्भैं से?”

³⁵ मगर एरंको समय भी आबेवाला छै जब दुलहा बरातीसिके लगतसे दूर लजैल जैतै तब ऊसब उटा समयमे उपास रहतै।

³⁶ येशू फेर ओकरासिके एकटा खिसा कहैल्कै, “अगर हमर शिक्षाके पुरना रिती-रिवाजके संगमे मिलैल जैतै ते, यी एरं हैतै जेरंके पुरना कपडामे नया कपडाके चिप्पी लगाना। जब कपडा धोयल जैतै तब नया चिप्पी सुकडी जैतै आर कपडाके चिरी देतै। हमर शिक्षा यी कपडाके जुगुर बेकाम भ्याजैतै।

³⁷ ओहिने करिके कोय भी नया अंगुरके मद्द पुरना चमडाके थैलीमे नैराखैछै, नैते उटा अंगुरके मद्द चमडाके थैलीके फोडी देतै, तब अंगुरके मद्द आर चमडाके थैली दोनो खतम भ्याजैतै।

³⁸ नया अंगुरके मद्द नया चमडाके थैलीमे राखे पडैछै।

³⁹ कोनो आदमी पुरना अंगुरके मद्द पिबिके नया अंगुरके मद्दके चाह नैकरैछै, कहिनेकी ऊ कहैछै, पुर्ने बढियाँ छै।”