लूका 23 - केवट नया कारार

राज्यपाल पिलातस आर हेरोदके समनामे येशू

¹ तकरबाद यहूदी आदमीसिके महासभाके सभे सदस्यसब येशूके यहूदिया प्रदेशके रोमी शासक राज्यपाल पिलातसके घरमे ल्यागेलै।

² ऊसब येशूपर एरं कहिके दोष लगाबे लाग्लै, “यी आदमीके हमरसिके आदमीसिके बहकैते पैलियै। यी हमरासिके रोमी महाराजाके कर तिरैसे रोकैछै, आर अपने आपके ख्रीष्ट, एकटा राजा छियै कहिके कहैछै।”

³ ओकरसिके बात सुनिके रोमी राज्यपाल पिलातस येशूके पुछल्कै, “कि तुहें यहूदी आदमीसिके राजा छैं?” येशू ओकरा जबाब देल्कै, “जेरं तुहें कहैछ यी ओहिने ही छै।”

⁴ तब रोमी राज्यपाल पिलातस प्रमुख पुजारीसिके आर आदमीसिके भीडके कहैल्कै, “हमे यी आदमीमे कोनो दोष नैदेखैछियै।”

⁵ मगर ऊसब हल्ला करिके कहैल्कै, “यी आदमी यहूदिया प्रदेशके सभे आदमीसिके बीचमे आपन शिक्षाके द्वारा दंगाके कारण बनैछै। यी आदमी गालील जिलामे शुरु कैल्कै आर एखन एत्ते ऐलै छे।”

⁶ यी बात सुनिके रोमी राज्यपाल पिलातस पुछल्कै, “कि यी आदमी गालील जिलाके रहेवाला छै?”

⁷ तब येशू, हेरोद राजाके द्वारा शासन कैल ज्यावाला इलाकाके आदमी छै कहिके मालुम भेलके बाद रोमी राज्यपाल पिलातस येशूके हेरोद राजाके लगत भेजी देल्कै। उटा समयमे हेरोद राजा यरूशलेम सहरमे ही रहै।

⁸ येशूके देखिके हेरोद राजा बहुते खुशी भेलै, कहिनेकी ऊ येशूके विषयमे सुनल्कै रहे आर बहुते दिनसे ओकरा देखैके इच्छा कैल्कै रहे। ऊ येशूके कुछु चमत्कार कर्ते देखैके आशा कर्ते रहै।

⁹ ऊ येशूके बहुते बात पुछल्कै, मगर येशू ओकरा कोनो जबाब नैदेल्कै।

¹⁰ प्रमुख पुजारीसब आर यहूदी धरमशास्त्रके पण्डितसब खडा भ्याके येशूके विरोधमे अनेक बातके दोष लगाबे लाग्लै।

¹¹ तकरबाद हेरोद राजा आर ओकर सिपाहीसब येशूके मजाक उडैते अपमान कैल्कै। येशूके राजाके लगाबेवाला जुगुर कपडा पिन्हयाके राज्यपाल पिलातसके लगत वापस भेजी देल्कै।

¹² उटा समयतक रोमी राज्यपाल पिलातस आर हेरोद राजा एक दोसरके दुश्मन रहै, मगर उहे दिन ऊसब दोनो दोस्त बनी गेलै।

¹³ तब राज्यपाल पिलातस प्रमुख पुजारीसब, यहूदी अगुवासब आर आदमीसिके भीडके बोल्याके कहैल्कै।

¹⁴ ऊ ओकरासिके कहैल्कै, “तुहेंसब यी आदमीके हमरलगत आन्लहैं आर कहलहैं कि यी दंगा कराबैके लिए आदमीसिके भडकैल्कै रहे। एखनी हमे एकरा तोरेसिके सामने पुछ-ताछ कैलियै मगर तोरसिके लगैल बातके कोनो भी दोष हमे यी आदमीमे नैपैलियै।

¹⁵ हेरोद राजा भी एकरा दोषी नैपैल्कै, सेल्याके ऊ एकरा हमरलगत भेजी देल्कै। देख, यी आदमी मृत्युदण्ड पाबैके योग्यके कोनो गलत काम नैकैल्कै छे।

¹⁶ सेल्याके हमे एकरा कोडा मारिके छोडी देबौ।”

¹⁷ रोमी राज्यपाल पिलातस निस्तार पावनके अवसरमे यहूदी आदमीसिके रिवाजके मुताबिक ओकरसिके लिए एकटा कैदीके छोडी देते रहै।

¹⁸ मगर सभे आदमीसब जोरसे कहैल्कै, “एकरा जानसे मार्है पड्तै, बरु बारब्बाके छोडी दह।”

¹⁹ बारब्बा अन्य क्रान्तिकारीसिके संगमे जेलमे रहै, जे रोमी सरकारके खिलाफ विद्रोहमे कुछु आदमीसिके जान मारल्कै रहे।

²⁰ येशूके छोडी दियैके इच्छा करिके राज्यपाल पिलातस फेर आदमीसिके सम्झैल्कै।

²¹ मगर ऊसब सभेको एक्केबेर एरं कहिके चिकरीके कहैल्कै, “ओकर जान मार ओकरा क्रूसमे काँटी ठोकिके जान मार!”

²² फेर तेसर बेर राज्यपाल पिलातस ओकरासिके कहैल्कै, “कहिने? यी आदमी कोन अपराध कैल्कै छे? हमे ते एकरा जानसे मारैके कोनो दोष नैपैलियै, सेल्याके हमे एकरा कोडा लग्याके छोडी देबौ।”

²³ मगर ऊसब आरहौ बडका आवाजसे चिकर्ते कहैल्कै, “ओकरा क्रूसमे काँटी ठोकिके जान मार्है पड्तै!” एक्केसंगे चिकरैके कारण ओकरसिके यी माँग मन्जुर करि देल गेलै।

²⁴ तब राज्यपाल पिलातस ओकरसिके माँग पुरा करैके लिए फैसला सुनैल्कै।

²⁵ आर आदमीसिके माँगके मुताबिक राज्यपाल पिलातस बारब्बाके छोडिदेल्कै, जे विद्रोह आर हत्याके अपराधमे जेलमे बन्द रहै। येशूके ओकरसिके इच्छामे सौंपी देल्कै।

येशूके क्रूसमे काँटी ठोकिके जान मारल्कै

²⁶ जब ऊसब येशूके ल्याके जैते रहै, तब ऊसब सिमोन नामके एकटा आदमी जे कुरेनी सहरके रहै ऊ गाँवसे ऐते रहै। ऊसब ओकरा पक्डीके ओकरापर क्रूसके लादी देल्कै कि क्रूसके येशूके पाछु-पाछु ल्याजै।

²⁷ आदमीसिके बडका भीड येशूके पाछु लाग्लै। ओकरासिमे जनानीसब भी रहै जे विलाप कर्ते आर कान्ते रहै।

²⁸ मगर ओकरसिके महर घुमिके येशू कहैल्कै, “हे यरूशलेम सहरके बेटीसब, हमर लिए नैकान, मगर आपन आर आपन बेटा-बेटीसिके संगे जे कुछु हुएवाला छै ओकर लिए कान।

²⁹ कहिनेकी कष्टके दिन आबैछै, जब आदमीसब कहतै, ‘धन्य छै ऊ जनानीसब जकर कहियो बच्चा नैरहै, जे कहियो बच्चासिके जनम नैदेल्कै, जे कहियो ओकरासिके दूध नैपियैल्कै।’

³⁰ तब उटा समयके आदमीसब पहाडसिके कहतै, ‘हमरासिपर खस।’ आर छोटका पहाडसिके कहतै, ‘हमरासिके झाँप।’ ”

³¹ अगर कोनो एरंको आदमीके संगमे एरं हैछै जे धार्मिक छै ते, कल्पना कर कि ऊ आदमीसिके संगे केरं हैतै जे यी सजाय पाबैके योग्य छै।

³² तब ऊसब दीटा अपराधी आदमीसिके भी येशूके संगे सिपाहीसिके द्वारा मृत्युदण्ड दियैले ल्यागेलै।

³³ जब ऊसब “खोपडीवाला जगह” मे ऐलै, ओत्ते ऊसब येशूके क्रूसमे काँटी ठोकिके टाँगल्कै आर ऊ दोनोटा अपराधीसिके एकटाके येशूके दहिना बगल आर दोसरके बायाँ बगल क्रूसमे काँटी ठोकिके टाँगल्कै।

³⁴ तब येशू कहैल्कै, “हे पिता! एकरासिके माफ कर, कहिनेकी यीसब जे करैछै, से एकरासिके मालुम नैछै। ओकर कपडासब ककर भागमे पड्तै कहिके निर्णय करैले ऊसब चिट्ठा बन्याके बाँटल्कै।”

³⁵ आदमीसब खडा भ्याके देख्ते रहै। अगुवासब ओकर मजाक कर्ते कहैल्कै, “देख, यी आदमी दोसरके ते बचैल्कै। यदि यी परमेश्वरसे भेज्ल ख्रीष्ट छै ते ऊ अपने आपके बचाबक।”

³⁶ सिपाहीसब भी आबिके येशूके निन्दा कैल्कै, आर ओकरा खट्टा अंगुरके मद्द पियैले द्याके कहैल्कै,

³⁷ तुहें यहूदी आदमीसिके राजा छैं ते अपने आपके बचा।

³⁸ सिपाहीसब येशूके मथाके उप्परमे एकटा तख्ता लगैल्कै। ओकरामे येशूके क्रूसमे काँटी ठोकैके कारण देल रहै आर ओकरामे यी शब्द लिख्ल रहै: “यहूदी आदमीसिके राजा।”

³⁹ क्रूसमे काँटी ठोकिके टाँग्ल अपराधीसिमेसे एकटा अपराधी ओकर निन्दा कर्ते कहैल्कै, “कि तुहें ही ख्रीष्ट नैछैं? छैं ते तुहें अपने आपके आर हमरासिके भी बचा।”

⁴⁰ मगर ओकरा धोपिके दोसर अपराधी जबाब देल्कै, “तुहें भी इहे सजायमे पड्ल छैं, सेल्याके तोरा भी परमेश्वरके डर मानना चाही आर एरंके नैबोलना चाही।

⁴¹ आपनसिके सजाय ते उचित छै, कहिनेकी अपनासब आपन कामसिके उचित फल भोगैछियै, मगर यी आदमी ते कोनो अनुचित काम नैकैल्कै छे।”

⁴² तकरबाद ऊ येशूके कहैल्कै, “हे येशू, तुहें राजाके जुगुर आपन राज्यमे आबै बख्तियाँ हमरा याद करिह!”

⁴³ येशू ओकरा कहैल्कै, “हमे तोरा सच कहैछियौ, ऐजे तुहें हमरसंगे स्वर्गलोकमे हैभैं।”

येशूके मौत

⁴⁴ लगभग दिपहरियाके बार बज्लै रहे। उहे समयसे तीन बजेतक पुरा देशमे अनहार भेलै।

⁴⁵ आर तखनिहैं सुरुजके रोशनी गुम भ्यागेलै आर चारो महर अनहार-कुप्प भ्यागेलै। तब उटा मोटका पर्दा जे परमेश्वरके मन्दिरमे लट्कैल रहै, जे सभैके परमेश्वरके उपस्थितिमे प्रवेश करैसे रोकते रहै, उप्परसे निच्चातक दी टुकरा भ्याके चिर्ल गेलै,

⁴⁶ आर येशू बडका आवाज निकालीके कहैल्कै, “हे पिता परमेश्वर, हमे आपन आत्मा तोर हातमे सौंपैछिहौं।” एतनें कहिके ऊ आपन जान त्यागल्कै।

⁴⁷ यीसब घटना देखिके रोमी कप्तान एरं कहिके परमेश्वरके प्रशंसा कर्ते कहैल्कै, “यी सच छै, कि यी आदमी निर्दोष रहै।”

⁴⁸ यी घटनाके देखैले जमा भेल आदमीसिके भीड जब यी सभे बात हैतै देखल्कै ते, ऊसब आपन छाती पिटते आपन-आपन घरमहर गेलै, यी देखाबैके लिए कि ऊसब बहुते दुखित रहै।

⁴⁹ मगर येशूके व्यक्तिगत रुपसे जानेवाला आदमीसब जे येशूके दूरसे खडा भ्याके यी सभे घटनासब देख्ते रहै, उटा आदमीसिमे गालील जिलासे ऐल जनानीसब भी रहै।

येशूके दफन

^50-51 ओत्ते योसेफ नामके एकटा आदमी रहै, जे यहूदिया प्रदेशके अरिमाथिया सहरके रहेवाला रहै। ऊ एकटा सज्जन आर धार्मिक आदमी रहै। जे खुद परमेश्वरके राज्यके आबैके इन्तजार कर्ते रहै। ऊ यहूदी आदमीसिके महासभाके सदस्य भी रहै। मगर येशूके बारेमे महासभाके जे फैसला आर कारवाही भेलै, उटा बातसे ऊ एकदम सहमत नैरहै।

⁵² इहे योसेफ रोमी राज्यपाल पिलातसके लगत जैके येशूके लास लजाबैके अनुमति माँगल्कै,

⁵³ अनुमति पैलके बाद ऊ लासके क्रूससे निच्चा उतारल्कै आर ओकर लासके मलमलके कपडामे लपेटिके चट्टानमे खोधिके बनैल दफ्नाबेवाला गुफामे राखल्कै। उटा सारामे पहेला ककरो लास नैराखल्कै रहे।

⁵⁴ उटा दिन तैय्यारीके दिन रहै, आर यहूदी आदमीसिके विश्रामके दिन शुरु हुहै लाग्ल रहै।

⁵⁵ जब येशूके लासके लजैते रहै ते, ऊ जनानीसब जे येशूके संगे गालील जिलासे ऐलै रहे, ऊसब ओकर पाछु-पाछु गेलै। ऊसब जैके देखल्कै कि केरंके येशूके लासके राखल्कै।

⁵⁶ तब ऊ जनानीसब घर वापस आबिके येशूके शरीरमे लगाबैके लिए गमकौव्वा तेल आर मसाला तैय्यार कैल्कै। तब मूसाके विधि-विधानके मुताबिक यहूदी आदमीसिके विश्रामके दिनमे ऊसब विश्राम कैल्कै।