याकूब 5 - केवट नया कारारमातबर आदमीके चेतावनी 1 हे प्रभुमे विश्वास नैकरेवाला मातबर आदमीसब सुन! तुहेंसब खुदपर आबेवाला कष्टसिके लिए जोर-जोरसे कान आर विलाप कर। 2 तोरसिके धन नाश हैतौ आर तोरसिके कपडासब पिल्लुके कारणसे खराब भेल छौ। 3 तोरसिके सोना-चानीमे काजी लाग्ल छौ, आर उहे काजी उटा दिन तोरसिके विरोधमे गवाहके जुगुर हैतौ जे दिन परमेश्वर तोर न्याय कर्तौ आर यी काजी तोरसिके शरीरके आगिनके जुगुर जर्या देतौ। यी अन्तिम दिनसिमे तुहेंसब धन-दौलत जमा कैल्हैं छे। 4 देख, जे जनसब तोरसिके खेतके फसल काटल्कौ छे आर ओकरसिके रोजी जे तुहेंसब ओकरासिके नैदेल्हैं, उटा खेतके जन-बनिहारसब तोरसिके विरोधमे परमेश्वरके पुकारा करैछै। आर ऊ जन-बनिहारसिके पुकारा सर्वशक्तिमान प्रभु सुनी लेल्कै छे। 5 धर्तीपर तोरसिके जीवन बहुते आरामदायक भेलौ छे आर एत्ते तुहेंसब भोग-विलासके जीवन जिल्हैं छे। एरं करिके, तुहेंसब ऊ जानवरके जुगुर भेल छैं जकरा पाली-पोसीके काटिके खैले राखैछै। ओकरेसिके जुगुर, तोरासिके भी यी मालुम नैछौ कि तोरसिके फैसला हुएवाला छौ। 6 तुहेंसब धर्मी आदमीसिके दोष लग्याके ओकरसिके जान मारि देल्हैं, जब कि ऊ तोरसिके विरोध नैकर्ते रहौ। धीरज राख 7 सेल्याके हे विश्वासी भ्या-बहिनसब, प्रभुके फेरसे वापस आबैके समयतक धीरज राख, जेरंके किसान धर्तीके किमती फसलके लिए आशा राखिके पहेला आर आखरी बर्षा नैहुऐतक धीरज धारण करैछै। 8 अहिने करिके, तहुँसब धीरज धारण कर, आर हिम्मत राख कहिनेकी प्रभु जल्दी फेर वापस ऐतै आर ऊ सभैके न्याय कर्तै। 9 हे विश्वासी भ्या-बहिनसब, एक दोसरके विरोधमे नैकुडकुडा। एरंके परमेश्वर तोरसिके न्याय नैकर्तौ। देख्, न्यायधीश बहुते नज्दिक छै आर आबैके लिए तैय्यार छै। 10 हे विश्वासी भ्या-बहिनसब, परमेश्वरके वक्तासिके याद कर जे परमेश्वरके नामसे बोलैछै। ऊसब आपनसिके लिए कष्टके समयमे धीरज धारण करैके नमुना छै। 11 तोरासिके मालुम छौ, हमेसब अन्ततक धीरज धारण करेवालासिके धन्यके कहैछियै। तुहेंसब अय्युब नामके आदमीके विषयमे सुन्ले ही छैं, ऊ दुःखके समयमे भी स्थिर रहै आर प्रभुके तरफसे जे ओकर प्रतिफल भेलै से भी तुहेंसब जानी लेल्हैं छे, जकरासे प्रभुके बहुते करुणा आर दया प्रकट हैछै। 12 हे विश्वासी भ्या-बहिनसब, सभैसे बडका बात यी छै कि, तुहेंसब कसम खैबे नैकर। स्वर्ग, धर्ती या कोनो चीजके नाम ल्याके कसम नैखो। तोरसिके बातचितमे तोर “हँ” के मतलब “हँ” आर “नै” के मतलब “नै” होना चाही। ताकी तुहेंसब परमेश्वरके द्वारा दोषी नैठहरहैं। विश्वाससे पूर्ण भेल प्रार्थना 13 यदि तोरसिमेसे कोय दुःखी छै ते ऊ प्रार्थना करक। यदि आनन्दित छै ते ऊ स्तुतिके भजन गाबक। 14 यदि तोरसिमेसे कोय बेमारी छै ते ऊ मण्डलीके अगुवासिके बोलाबक। आर ऊसब प्रभु येशूके नामसे ओकरा तेल लग्याके ओकर लिए प्रार्थना करक। 15 आर विश्वासके प्रार्थनाके द्वारा बेमारी आदमी बची जैतै, आर प्रभु ओकरा ठीक कर्तै, आर यदि ऊ पाप भी कैल्कै छे ते परमेश्वर ओकरा माफ कर्तै। 16 सेल्याके तुहेंसब एक दोसरके समनामे आपन-आपन पाप स्वीकार कर। आर तुहेंसब ठीक हुऐके लिए एक दोसरके लिए प्रार्थना कर। धार्मिक आदमीके प्रार्थना शक्तिशाली आर प्रभावशाली हैछै। 17 परमेश्वरके वक्ता एलिया भी ते आपनेसिके जुगुर भोग्ल आदमी रहै। आर ऊ पानी नैबर्षै कहिके पुरा मनसे परमेश्वरसे प्रार्थना कैल्कै रहे आर तीन साल छ महिनातक धर्तीमे पानी नैबर्सलै। 18 फेर ऊ बर्षा है कहिके प्रार्थना कैल्कै आर आकाशसे बर्षा भेलै, आर धर्तीमे फसलके उब्जा हुए लाग्लै। 19 हे हमर विश्वासी भ्या-बहिनसब, यदि तोरसिमेसे एकटा भी विश्वासी परमेश्वरके सच्चा वचन पालन नैकरैछै आर कोय ओकरा पाप करैले छोडिके परमेश्वरके तरफ मन लगाबैके लिए सहायता करैछै, 20 ते तोरासिके यी मालुम होना चाही कि जे कोय परमेश्वरके सच्चा वचन पालन नैकरेवाला आदमीके पाप करैले छोडिके परमेश्वरके तरफ मन लगाबैके लिए सहायता करैछै, तुहेंसब एकटा जीवनके कहियो खतम नैहुएवाला मौतसे बचैभैं आर परमेश्वर ओकर बहुते पापसिके माफ कर्तै। |
Kayort (केवट) Bible by The Love Fellowship is licensed under Creative Commons Attribution-ShareAlike 4.0 License.
Beyond Translation