हिब्रू 8 - केवट नया कारार

येशू आपनसिके प्रधान पुजारी

¹ आब जे बात हमेसब कहैछियै, ओकरामे सभैसे बडका बात यी छै कि आपनसिके लगत जरुर ही एरंको प्रधान पुजारी छै जे स्वर्गमे परमधन्य परमेश्वरके दहिना हातके बगलमे सम्मानके जगहमे बैठ्ल छै।

² ऊ स्वर्गमे महापवित्र-स्थानमे सेवा करैछै, जे आदमीसिके द्वारा नै बरु प्रभु परमेश्वरके द्वारा बनैल गेलै छे।

³ हरेक प्रधान पुजारी पापके माफीके लिए बलिदान आर दान चढाबैके लिए नियुक्त भेल हैछै। सेल्याके यी जरुरी छै कि आपनसिके प्रधान पुजारी येशूके लगत भी चढाबैके लिए कुछु है।

⁴ आर यदि ख्रीष्ट संसारमे हैतियै ते ऊ पुजारी नैहैतियै, कहिनेकी यी संसारमे मूसाके विधि-विधानके मुताबिक पहलहैसे ही यहूदी पुजारीसब छै जेसब दान चढाबैछै।

⁵ पुजारीके रुपमे ऊसब जे काम करैछै ऊ खाली ओकर एकटा नकल आर एकटा छाया छै जे स्वर्गमे छै, मगर यी ओरंको नैछै जेरं स्वर्गमे छै। कहिनेकी जब मूसा परमेश्वरके पाल बनाबैके लिए तैय्यार हैते रहै, तब परमेश्वर ओकरा यी चेतावनी देल्कै, “देख, जे नमुना तोरा पहाडपर देखैल गेलौ रहे, ओकर मुताबिक सभे कुछु बनैहैं।”

⁶ मगर ख्रीष्टके जे प्रधान पुजारीके काम देल गेलै छे, ऊ उटा कामसे बहुते बडका छै जे दोसर पुजारीसिके देल गेलै रहे। कहिनेकी ऊ जे करारके मध्यस्थ छै ऊ पुरना करारसे उत्तम छै आर उत्तम चीजसिके प्रतिज्ञापर आधारित छै।

⁷ कहिनेकी यदि पहेलाके करार निर्दोष हैतियै ते, दोसर करारके जरुरते नैपड्तियै।

⁸ मगर परमेश्वर आदमीसिपर दोष पाबिके कहैल्कै, “प्रभु कहैछै, देख, उटा दिन आबैछै, कि हमे इस्राएलीसिके संगे आर यहूदा कुलके आदमीसिके संगे एकटा नया करार स्थापना कर्बै।

⁹ यी करार ओरंको नैहैतै जेरंको हमे ओकरसिके पुर्खासिके संगे उटा समयमे कैलियै रहे, जब हमे ओकरासिके मिश्र देशसे बाहार ल्याके ऐलियै रहे। जे करार हमे ओकरसिके संगे बान्हलियै रहे, ऊसब उटा करारके पालन नैकैल्कै, सेल्याके हमे ओकरसिके वास्ता नैकैलियै।

¹⁰ फेर प्रभु कहैछै, कि जे करार भविष्यमे हमे इस्राएलीसिके संगे बान्हबै, ऊ यी छै, हमे ओकरासिके हमर विधि-विधानके बारेमे सोचैले देबै आर ऊसब ओकरा आपन मनमे राख्तै, हमे ओकरसिके परमेश्वर बन्बै आर ऊसब हमर आदमी हैतै।

¹¹ उटा समयमे कक्रहौ भी, आपन साथी यहूदीसिके आर रिश्तेदारसिके ‘प्रभुके चिन’ कहिके नै सिखाबे पड्तै, कहिनेकी सभैसे कम महत्वपूर्णसे सभैसे महत्वपूर्ण आदमी तक हमरा आपन परमेश्वरके रुपमे पहचानी लेतै।

¹² कहिनेकी हमे ओकरसिके दुष्टताके प्रति दया देखैबै, आर ओकरसिके पाप फेर कहियो याद नैकर्बै।”

¹³ परमेश्वर एकरा नया करार कहैल्कै, सेल्याके ऊ पहेला करारके पुरना बन्या देल्कै। आर जे कुछु भी पुरना छै आर कोनो कामके नैछै ऊ अस्तित्वमे नैरहतै।