हिब्रू 7 - केवट नया कारार

पुजारी मल्किसदेक

^1-3 यी मल्किसदेक शालेम सहरके राजा आर सर्वोच्च परमेश्वरके पुजारी रहै। ओकर नामके मतलब छै “न्यायके साथ शासन करेवाला राजा” आर शालेमके राजाके मतलब छै “शान्तिके राजा”। धरमशास्त्रमे ओकर बाबु, मयाँ, ओकर पुर्खासब या ओकर जनम या ओकर मौतके बारेमे कुछु भी नैलिख्ल गेलै छे। ऊ सभे दिनके लिए एकटा पुजारी छै। सेल्याके ऊ परमेश्वरके बेटाके जुगुर छै। जब अब्राहम चारटा राजासिके मारिके वापस ऐते रहै, तब मल्किसदेक ओकरासे भेट कैल्कै आर ओकरा आशीर्वाद देल्कै। अब्राहमके उटा लडाईमे जित प्राप्त भेलके बाद जे कुछु भी मिल्लै रहे, ऊ मल्किसदेकके उटा सभे चीजसिके दशांश देल्कै।

⁴ आब विचार कर ते, मल्किसदेक कतनें महान रहै, जकरा पुर्खा अब्राहम लडाईसे जितिके जे कुछु भी लेल्कै रहे ओकर दशांश देल्कै।

⁵ मूसाके विधि-विधान यी बात सिखाबैछै कि लेवीके सन्तानसब जे पुजारी छै, ओकरासिके इस्राएल देशके दोसर आदमीसिसे, जे ओकरसिके आपन आदमीसब छै, ओकरसिसे दशांश लिए पडैछै। मगर ऊ पुजारीसब आर दोसर आदमीसब भ्या-भैय्यारीसिके जुगुर छै कहिनेकी ऊसब सभेको अब्राहमके सन्तान छै।

⁶ मगर यी मरद, मल्किसदेक जे लेवी कुलके सन्तान भी नैरहै अब्राहमसे दशांश लेल्कै आर जब कि अब्राहम ऊ रहै जकरा परमेश्वरके प्रतिज्ञा मिल्लै रहे, तैय्योपर भी मल्किसदेक ओकरा आशीर्वाद देल्कै।

⁷ हमेसब निश्चित रुपसे जानैछियै कि जे आदमी आशीर्वाद दैछै ऊ आदमी आशीर्वाद पाबेवाला आदमीसे बडका हैछै।

⁸ पुजारी दशांश प्राप्त करैछै, जब कि ऊ खाली आदमी छै, जे जिन्दा रहैछै आर फेर मरि जैछै। मगर यी पुजारी मल्किसदेक जे दशांश लेल्कै रहे, ओकर विषयमे धरमशास्त्रमे गवाही देल गेलै छे कि ऊ एखन भी जिन्दा छै।

^9-10 लेवी कुल जे आदमीसिसे दशांश लेते रहै ऊसब अब्राहमके सन्तान रहै। सेल्याके अब्राहम जब मल्किसदेकसे मिल्लै आर ओकरा दशांश देल्कै ते, अपनासब यी कहे सकैछियै कि लेवी कुल भी अब्राहमके द्वारा ही दशांश देल्कै।

¹¹ आदमीसिके ऊ पुजारीके आधारपर विधि-विधान देल गेलै जेसब लेवी कुलके हारुनसे ऐलै रहे, मगर ओकरासिके ऊ प्रणालीके द्वारा सिद्ध नैबनैल गेलै। सेल्याके एकटा आरहौ पुजारीके आबैके जरुरत रहै, एकटा एरंको पुजारी जे हारुनके जुगुर नै मगर मल्किसदेकके जुगुर रहै।

¹² कहिनेकी जब पुजारी पदमे बदलाव हैछै तब विधि-विधानके भी बदलहै पडैछै।

¹³ हमेसब यी बातसब ख्रीष्टके विषयमे कहैछियै, जे एकटा अलग कुलसे रहै। उटा कुलमेसे कहियो भी कोय एकटा पुजारीके रुपमे वेदीमे सेवा नैकैल्कै रहे।

¹⁴ सभेको जानैछै कि आपनसिके प्रभु येशू यहूदा कुलके सन्तान छै आर मूसा यहूदा कुलके कोनो भी सन्तानके पुजारी बनैके विषयमे कुछु नैबतैल्कै छे आर नैते यहूदा कुलके कोनो भी सन्तान कहियो पुजारी बन्लै रहे।

¹⁵ आब तुहेंसब बढियाँसे बुझे सकैछैं कि हमे कोन विषयमे बात करैछियै। सेल्याके यी बात आरहौ भी साफ छै कि मूसाके विधि-विधान आर पुजारीसिके बदली देल गेलै छे, कहिनेकी आपनसिके प्रधान पुजारी जे एखन ऐलै छे, ऊ मल्किसदेकके जुगुर छै।

¹⁶ येशू कोनो विशेष आदमी यानिकी लेवी कुलके सन्तान हुऐके नियमसब आर विधि-विधानके कारण पुजारी नैबन्लै मगर ऊ आपन जीवनके सामर्थ्यके कारण पुजारी बन्लै जे कहियो खतम नैहैतै।

¹⁷ कहिनेकी ओकर विषयमे परमेश्वर धरमशास्त्रमे गवाही दैछै, “तुहें, पुजारी मल्किसदेकके जुगुर सभे दिनके लिए प्रधान पुजारी बनी गेल्हैं छे।”

¹⁸ एरंके पुरना विधि-विधान उटा काम नैकरे सकल्कै जे काम एकरा करना रहै आर यी कोनो कामके नैरहैके कारण एकरा बदली देल गेलै।

¹⁹ कहिनेकी विधि-विधान कुछु भी सिद्ध नैबनाबे सकल्कै। आर ओकर जगहमे अपनासिके एकटा उत्तम आशा छै, जे येशू ख्रीष्टमे छै। जकरद्वारा अपनासब परमेश्वरके नज्दिक ज्या सकैछियै।

²⁰ एकर सिवाय जब परमेश्वर येशूके पुजारीके रुपमे नियुक्त कैल्कै ते, ऊ एकटा कसम खैल्कै।

²¹ कहिनेकी लेवी कुलके सन्तान बिना कसमके पुजारी बनैल गेलै मगर येशू कसमके साथ परमेश्वरके तरफसे नियुक्त कैल गेलै, जे ओकर विषयमे कहैल्कै, “हमे परमेश्वर यी कसम खैलियै छे, आर हमे आपन मन कहियो नैबदल्बै, कि तुहें सभे दिनके लिए पुजारी छैं।”

²² येशू ऊ छै जे एकटा उत्तम करारके पुरा हुऐके कारण बनैछै।

²³ एत्ते येशूके पुजारी हुऐके एकटा आरहौ फैदा छै, ऊसब यहूदी पुजारीके रुपमे आपन काम जारी नैराखे सकल्कै, बरु दोसर आदमी ओकर जगह ल्या लेल्कै, कहिनेकी ऊसब सभेको मरि गेलै।

²⁴ मगर येशू सभे दिन जिन्दा रहैछै, इहे कारणसे कोय भी पुजारीके रुपमे ओकर जगह नै लेतै।

²⁵ इहे ल्याके जे येशूके द्वारा परमेश्वरके नज्दिक आबैछै, ऊ ओकरासिके सभे दिन बचाबे सकैछै। कहिनेकी ऊ ओकरसिके लिए बिन्ती करैके लिए सभे दिन जिन्दा छै।

²⁶ येशू ओरंको प्रधान पुजारी छै जकर जरुरत अपनासिके छै। ऊ पवित्र छै, पापरहित छै, शुद्ध छै, पापीसिसे प्रभावित नैहैछै आर ओकरा स्वर्गसे भी उप्पर उठैल गेलै छे।

²⁷ आर ऊसब प्रधान पुजारी जेसब हारुनके सन्तान रहै ओकरसिके जुगुर येशूके जरुरी नैछै कि हरेक दिन पहेला आपन पापके लिए आर फेर दोसर आदमीसिके पापके लिए बलिदान चढाबै। कहिनेकी ऊ अपने आपके बलिदान चढ्याके ऊ एक्केबेरमे सभे आदमीसिके पापके लिए अपने आपके बलिदान चढ्या देल्कै।

²⁸ कहिनेकी मूसाके विधि-विधान ते कमजोर आदमीसिके प्रधान पुजारी नियुक्त करैछै, मगर उटा कसम जे मूसाके विधि-विधानके बाद ऐलै ऊ परमेश्वरके बेटाके प्रधान पुजारीके रुपमे चुनल्कै। ऊ सभे दिनके खातिर आपनसिके लिए सिद्ध प्रधान पुजारी बनी गेलै छे।