हिब्रू 4 - केवट नया कारार

विश्राममे प्रवेश

¹ आब जब कि परमेश्वर अपनासिसे प्रतिज्ञा कैल्कै छे इहे ल्याके अपनासब विश्रामके जगहमे जैबै ते, अपनासिके बहुते होशियार रहना चाही आर तोरसिमेसे कक्रहौ भी उटा विश्रामके जगहमे जैके मौका नैछोडना चाही।

² जेरंके अपनासब येशू ख्रीष्टके विषयमे खुश-खबरी सुन्लियै, ओहिने करिके इस्राएलीसब भी विश्रामके जगहमे प्रवेश करैके खुश-खबरी सुनल्कै। मगर ऊसब एकरापर विश्वास नैकैल्कै। सेल्याके उटा सन्देश ओकरसिके लिए बेकार रहै।

³ आब अपनासब जे ऊ बात पर विश्वास करैछियै, जे बात परमेश्वर कहैल्कै छे, विश्रामके जगहमे प्रवेश कर्बै। आर दोसर आदमीसिके विषयमे परमेश्वर कहैल्कै, “हमे आपन गोस्सामे कसम खैलियै, कि ऊसब ऊ जमिन जते हमे ओकरासिके विश्राम देतियै ओत्ते प्रवेश करैले नैपैतै।” मगर हमेसब जानैछियै कि यी विश्रामके जगह जे एखन ओत्ते छै, उटा जगह संसारके सृष्टिके समयसे ही रहै।

⁴ कहिनेकी सतमा दिनके विषयमे परमेश्वर धरमशास्त्रमे एरं कहैल्कै छे, “परमेश्वर सतमा दिनमे आपन सभे कामसिके खतम करिके विश्राम कैल्कै।”

⁵ अपनासब यी भी पढैछियै कि ऊ पाछु कहैल्कै, “ऊसब हमर विश्रामके जगहमे प्रवेश करैले नैपैतै।”

⁶ इस्राएल देशके ऊ आदमीसब, जकरसिके बीचमे पहेला बेर खुश-खबरी सुनैल गेलै रहे, ऊसब प्रवेश करैमे असफल भ्यागेलै कहिनेकी ऊसब परमेश्वरके आज्ञा नैमानल्कै। मगर आदमीसिके प्रवेश करैके लिए उटा विश्रामके जगहमे जैके मौका एखन भी छै।

⁷ सेल्याके परमेश्वर आपन विश्रामके जगहमे प्रवेश कराबैके लिए एकटा दोसर समय तय कैल्कै, आर उटा समय ऐज छै। आपनसिके पुर्खासिके विद्रोहके बहुते सालके बाद, परमेश्वर दाऊद राजाके द्वारा यी वचनके घोषणा करवैल्कै, जे पहेलासे ही कहेल गेलै रहे, “यदि ऐज तुहेंसब परमेश्वरके आवाज सुन्भैं ते, ओकर आज्ञा मानैसे इन्कार नैकर।”

⁸ अपनासब यी भी जानैछियै कि परमेश्वर जे विश्रामके जगहके प्रतिज्ञा कैल्कै छे, ऊ कनान देश नैछै, जते जैके लिए यहोशू आपनसिके पुर्खासिके अगुवाई कैल्कै। कहिनेकी यदि यी कनान देश हैतियै ते परमेश्वर पाछु यी नै कहतियै कि एकर लिए एकटा दोसर समय रहै।

⁹ सेल्याके परमेश्वरके आदमीसिके लिए एखन भी एकटा जगह तैय्यार छै, जते ऊसब पुरा तरहसे विश्राम करे सकैछै। ऊसब ओहिने करिके विश्राम कर्तै जेरंके परमेश्वर सतमा दिनमे विश्राम कैल्कै।

¹⁰ परमेश्वर आपन काम खतम कैलके बाद विश्राम कैल्कै। आर यी ऊ सभैके लिए समान छै जेसब परमेश्वरके लगत विश्राम करैले जैछै। ऊसब आपन काम खतम कैलके बाद विश्राम कर्तै।

¹¹ सेल्याके अपनासब उटा विश्रामके जगहमे प्रवेश करैके लिए कडा मेहनत कर। कोनो भी आदमीके ऊ आदमीसिके उदाहरणके नकल नैकरना चाही जेसब परमेश्वरके आज्ञा मानैसे इन्कार करिदेल्कै। तब अपनासब उटा विश्रामके जगहमे प्रवेश कर्बै।

¹² कहिनेकी परमेश्वरके वचन काम कर्ते रहेवाला आर जिन्दा छै। यी दोनो बगल धारवाला तलवारसे भी बेसी धर्हा छै। यी भितरमे जैके प्राण आर आत्माके अलग करि दैछै। जोडनी आर हड्डीके भितरके गुद्दीके अलग करि दैछै। परमेश्वरके वचन आदमीसिके हृदयके विचार आर इच्छाके जाँच करैछै।

¹³ सारा सृष्टिमे कोनो भी आदमी परमेश्वरके नजरसे नुकैल नैछै। आर जे कुछु भी अपनासब आपन जीवनकालमे कैलियै छे, अपनासिके परमेश्वरके उटा सभे कामके हिसाब दिए पड्तै। ओकर समनामे सभे बात खुल्ला छै आर झाँप्ल नैछै।

येशू महान प्रधान पुजारी

¹⁴ इहे ल्याके येशू जे स्वर्ग गेलै छे, ऊ परमेश्वरके बेटा छै। ऊ आपनसिके सभैके प्रधान पुजारी छै। सेल्याके या अपनासब ऊ विश्वासके नैछोडिके दृढतासे र, जकरा अपनासब सभैके समनामे स्वीकार कैलियै रहे।

¹⁵ कहिनेकी यी प्रधान पुजारी, जे येशू ख्रीष्ट छै, आपनसिके हरेक कमजोरीके बुझैछै। येशू आपनसिके जुगुर सभे प्रकारके परीक्षाके सामना कैल्कै, मगर ऊ कोनो भी पाप नैकैल्कै।

¹⁶ सेल्याके या, अपनासब साहासके साथ परमेश्वरके लगत चल, जे अनुग्रहसे परिपूर्ण छै, तब परमेश्वर अपनासिके दया आर अनुग्रह देखैतै आर जब अपनासिके जरुरत हैतै तब ऊ अपनासिके सहायता कर्तै।