हिब्रू 2 - केवट नया कारार

उद्धारके तुच्छ समझेवाला आदमीसिके चेतावनी

¹ सेल्याके जे बात अपनासिके सिखैल गेलै रहे, ओकर अनुसरण करैके लिए अपनासब बहुते होशियार र। तब अपनासब सचसे नै भटक्बै।

² कहिनेकी परमेश्वर स्वर्गदूतसिके द्वारा मूसाके विधि-विधान देल्कै आर एकरा सच साबित कैल गेलै, आर जे कोय भी एकर पालन नैकर्ते रहै या एकरा नैमान्ते रहै ऊ आदमीके परमेश्वरके द्वारा पाबेवाला सजाय मिल्लै।

³ सेल्याके जरुर ही अपनासिके सजाय मिल्तै यदि अपनासब यी महान उद्धारके तुच्छ समझबै। यी महान उद्धारके घोषणा सभैसे पहेला खुद प्रभु येशू ख्रीष्टके द्वारा कैल गेलै रहे, आर यी बात जे आदमीसब सुनल्कै रहे ओकरसिके द्वारा सच साबित कैल गेलै।

⁴ परमेश्वर बहुते किसिमके चिन्हसब, चमत्कारके कामसब, आर विभिन्न प्रकारके शक्तिशाली कामसिके प्रयोग करिके आर आपन इच्छाके मुताबिक पवित्र आत्माके द्वारा आदमीसिके वरदानसब द्याके प्रभु ओकरासिके सहायता कैल्कै आर ओकरसिके सन्देश सच्चा रहै कहिके साबित कैल्कै।

⁵ परमेश्वर उटा आबेवाला युग जकर विषयमे अपनासब छलफल करैछियै, स्वर्गदूतसिके अधिनमे नैराखल्कै मगर प्रभु येशूके अधिनमे राखल्कै।

⁶ धरमशास्त्रमे कोनो एक जगहमे यी बात लिख्ल छै, “मनुष्य कि छै, से परमेश्वर, तोरा ओकर बारेमे चिन्ता करे पडै, या ओकर देखभाल करे पडै? ऊ आदमीके बेटाके सिवाय आर कुछु भी नैछै।

⁷ तुहें आदमीके कुछु समयके लिए स्वर्गदूतसिसे कम शक्तिशाली बनैलह, मगर एकरबाद तुहें ओकरा एकटा राजाके जुगुर महिमा आर सम्मान देलह छे।

⁸ तुहें ओकरा सभे चीजके उप्परमे अधिकार देलह।” सेल्याके एत्ते एरंको लागैछै कि परमेश्वर सभे कुछु आदमीके शक्तिके अधिनमे करिदेल्कै छे। यानिकी, एरंको कुछु भी नैछै, जे ओकर शक्तिके अधिनमे नैछै। मगर अपनासब देखे सकैछियै कि ऐजतक भी सभे कुछु आदमीसिके शक्तिके अधिनमे नैछै।

⁹ मगर अपनासब येशूके देखैछियै! ओकरा कुछु समयके लिए स्वर्गदूतसिसे कम महत्वपूर्ण बनैल गेलै रहे, ताकी परमेश्वरके अनुग्रहसे ऊ सभैके लिए मरि जै। आर कहिनेकी ऊ तकलीफ उठैल्कै आर मरि गेलै, परमेश्वर ओकरा महिमा आर आदर देल्कै।

¹⁰ परमेश्वर यी सभे चीजसिके बनैल्कै आर सभे चीजके आपन लिए सम्हारिके राखल्कै छे। यी कारणसे कि बहुते आदमीसिके आपन महिमामे सामिल करे सकै, परमेश्वर यी निर्णय कैल्कै कि इहे सही हैतै कि प्रभु येशू तकलीफ उठ्याके एरंको आदमी बनी जै जे चरित्रमे पूर्ण छै। कहिनेकी येशू ही छै जे आदमीसिके उद्धारके तरफ ल्याजैछै।

¹¹ कहिनेकी जे आदमीसिके ओकरसिके पापसिसे शुद्ध करैछै आर आदमीसब जे आपन पापसे शुद्ध बनैल छै, ऊ सभैके पिता एक्केटा छै, सेल्याके येशूके ओकरासिके आपन भ्या-बहिन मानैमे शरम नैआबैछै।

¹² एकर विषयमे ख्रीष्ट परमेश्वरसे एरंके कहैछै, “जे भला काम तुहें हमर लिए कैलह छे, उटा बात हमे आपन विश्वासी भ्या-बहिनसिके बतैबै। जब ऊसब तोर आराधना करैके लिए जमा हैतै, तब हमे तोर महिमा कर्भौं।”

¹³ आर ऊ फेर कहैछै, “हमे परमेश्वरमे भरोसा राखैछियै।” फेर आरहौ कहैछै, “हमे एत्ते ओकरसिके संगे छियै जकरासिके परमेश्वर हमरा देल्कै छे, ऊसब बच्चासिके जुगुर छै।”

¹⁴ कहिनेकी आदमीसब परमेश्वरके बेटा-बेटीसब छै, यानिकी मास आर खूनसे बन्ल आर येशू भी एकटा आदमी बनी गेलै। कहिनेकी खाली एकटा आदमी बनिके ही ऊ मरे सक्ते रहै, आर खाली मरैके द्वारा ही ऊ शैतानके शक्तिके तोडे सक्ते रहै, जकर लगत मौतके शक्ति रहै।

¹⁵ इहे कारणसे प्रभु येशू ऊ आदमीसिके उद्धार कैल्कै जेसब मरैके डरसे आपन जीवन दाससिके जुगुर जिते रहै।

¹⁶ कहिनेकी प्रभु येशू स्वर्गदूतसिके नै, मगर अब्राहमके सन्तानके चिन्ता करैछै।

¹⁷ सेल्याके सभे बातमे येशू दोसर विश्वासी भ्या-बहिनसिके जुगुर बनना जरुरी रहै, ताकी ऊ आपनसिके दयालु आर विश्वासयोग्य प्रधान पुजारीके रुपमे परमेश्वरके सेवा करे सकै आर आपनसिके पापसिके माफीके लिए खुदके बलिदान करे सकै।

¹⁸ कहिनेकी येशू तकलीफ सहन कैल्कै आर परीक्षित भेलै, इहे ल्याके आब ऊ, ऊसब आदमीसिके सहायता करे सकैछै जेसब परीक्षाके सामना करैछै।