हिब्रू 12 - केवट नया कारार

विश्वासके श्रेष्ठ उदाहरण-येशू

¹ आपनसिके अगल-बगल एरंको बहुते आदमीसब छै जकर जीवन अपनासिके बताबैछै कि विश्वासके कि मतलब छै। सेल्याके या, सभे रोकेवाला चीजसब आर सभे ओझराबेवाला पापके दूर करिके अपनासब उटा रस्तापर चल जकरापर अपनासिके चलना चाही।

² या अपनासब आदमीसिके विश्वासके शुरु करेवाला आर सिद्ध करेवाला येशूके विषयमे निरन्तर सोच्ते रहियै। ऊ आनन्दके लिए जे ओकर समनामे भविष्यमे राख्ल रहै, ऊ अपमानके कोनो चिन्ता नैकरिके क्रूसके दुःख सहैल्कै आर एरंके ऊ मरि गेलै आर आब ऊ परमेश्वरके दहिना हातके बगलमे सम्मानके जगहमे बैठ्लै।

³ येशूके उदाहरणके विषयमे सोच। विचार कर कि येशू ऊ सभे पापी आदमीसिके लिए कतनें विरोध सहैल्कै जेसब ओकरासे बहुते नफरत कर्ते रहै ताकी तुहेंसब निराश भ्याके हिम्मत नै हार।

⁴ पापके विरुद्ध आपन संघर्षमे एखनतक तोरासिके उटा स्तरतक संघर्ष नै सहे पड्लौ छे जते आदमीसब तोरसिके हत्या करिदौ।

⁵ कि तुहेंसब उटा उत्साहजनक वचनसब भूली गेल्हैं छे जे बात परमेश्वर आपन बाल-बच्चाके रुपमे तोरासिके कहैल्कौ रहे, “हे हमर बेटा, जब प्रभु तोरा देखाबैछौ कि तुहें गलत छैं ते, उटा बात पर पुरा ध्यान दहैं, आर जब ऊ तोरा अनुशासित करैछौ ते हार नै मानीले।

⁶ कहिनेकी प्रभु जकरासे प्रेम करैछै, ओक्रहै अनुशासित करैछै, आर जकरा आपन सन्तानके रुपमे स्वीकारैछै ओकरा सजाय भी दैछै।”

⁷ जब तुहेंसब यी ईश्वरीय अनुशासनके सहैछैं ते, याद राख कि परमेश्वर तोरासिके आपन बाल-बच्चासिके जुगुर मानैछौ। सभे बच्चासिके ओकरसिके बाबुके द्वारा अनुशासित कैल जैछै।

⁸ मगर यदि सभेकोय पैल उटा अनुशासन तुहेंसब नैपैल्हैं छे ते, तुहेंसब आपन बाबुके खास बेटा-बेटीसब नैछैं आर तुहेंसब वास्तवमे परमेश्वरके बेटा-बेटीसब नैछैं।

⁹ एतनें ही नै, जखन आपनसिके यी धर्तीके बाबुसब अपनासिके अनुशासित कर्ते रहै आर अपनासब ओकर आदर कैलियै। इहे ल्याके यी आरहौ भी महत्वपूर्ण छै कि अपनासब आपनसिके आत्माके पितासे अनुशासनके स्वीकार कर ताकी अपनासिके कहियो खतम नैहुएवाला जीवन मिलै।

¹⁰ आपनसिके यी धर्तीके बाबुसब, जेरं ओकरासिके सभैसे बढियाँ लाग्लै, अपनासिके कुछु समयके लिए अनुशासित कर्ते रहलै। मगर परमेश्वर आपनसिके भलाइके लिए अपनासिके अनुशासित करैछै ताकी अपनासब ओकर जुगुर पवित्र बनी जैयै।

¹¹ जे समय अपनासिके अनुशासन कैल जैछै, उटा समयमे अनुशासन बढियाँ नैलागैछै, बल्की उटा दुःखद लागैछै। मगर पाछु, जब अपनासब एकरासे पाठ सिखैछियै तब अपनासिके शान्ति मिलैछै कहिनेकी अपनासब सही तरिकासे जियैले शुरु करि दैछियै।

उपदेश आर चेतावनीसब

¹² यी सभे बातसिके कारण मजगुत बन आर उत्साहित र।

¹³ आर इन्हर-उन्हर देखैके सिवाय, तुहेंसब उटा सिधा रस्तापर जो जे येशूके लगत पहुँचाबैछै, ताकी आपनसिके बीचमे जे आदमीसब आत्मिक रुपसे कमजोर छै, ऊसब भट्की नैजै मगर ओकरसिके विश्वास मजगुत भ्याजै।

¹⁴ सभे आदमीसिके संगे शान्तिमे रहैके आर एकटा पवित्र जीवन जियैके कोशिश कर। कहिनेकी पवित्रता बिना कोय भी प्रभुके देखे नैसक्तै।

¹⁵ होशियार र, कि कोनो भी आदमी परमेश्वरके अनुग्रह पाबैसे बन्चित नैहै। ध्यान दहैं कि अविश्वासके कोनो तित्त जड तोरसिके बीचमे नैटुसाबौ कहिनेकी जब भी यी टुसाबैछै ते बहुते आदमीसब एकर जहरसे भ्रष्ट भ्याजैछै।

¹⁶ तोरसिमेसे कोय भी व्यबिचारी या अब्राहमके पोता एसावके जुगुर अधर्मी नैहु। कहिनेकी ऊ बडका बेटा रहै, इहे ल्याके ओकरलगत खास उत्तराधिकारी हुऐके अधिकार रहै। मगर ऊ आपन जनमके अधिकारके सम्मान नैकैल्कै आर इहे ल्याके ऊ आपन छोटका भ्या याकूबके यी अधिकारके एक छाँकके भोजनके लिए बेचि देल्कै।

¹⁷ तोरासिके मालुमे छौ, कि पाछु जब ऊ आपन बाबुके आशिष चहते रहै ओकरा यी नैदेल गेलै। आर लोर बहयाके ऊ आशीर्वाद चहते रहै मगर जे कुछु ऊ पहेला करि चुकल्कै रहे ओकरा बदलैके लिए ऊ कुछु भी नैकरे सकल्कै।

¹⁸ तुहेंसब सिनै पहाडके जुगुर जगहमे नैऐल्हैं छे, जकरा देख्ल आर छुल ज्या सकैछै। एत्ते कोनो धधक्ल आगिन या करिया बादल या अन्हर नैछै आर आदमीसब एकटा अहिने जगहमे रहै जब परमेश्वर ओकरासिके आपन विधि-विधान देल्कै।

¹⁹ तुहेंसब धुतहुकके आवाजके लगत नैऐल्हैं छे या बोलेवालाके एरं शब्दके लगत नैऐल्हैं छे, जे इस्राएलीसब सुनल्कै आर आरहौ एक वचन भी नैसुनियै कहिके बिन्ती कैल्कै।

²⁰ ऊसब एरं इहे ल्याके कहैल्कै कहिनेकी ऊसब यी आज्ञाके सहे नैसकल्कै कि परमेश्वर ओकरासिके कहैल्कै, “यदि कोनो जंगली जानवर उटा पहाडके छुतै ते ओकरा पत्थल ल्याके मारिहैं।”

²¹ आर ओत्करो दृश्य एतनें भयानक रहै, एत्तेतक कि मूसा भी कहैल्कै, “हमे डरसे थर-थर काँपैछियै।”

²² मगर तुहेंसब यरूशलेम सहरके पहाडके लगत ऐल्हैं छे, जते स्वर्गीय यरूशलेम छै जे जिन्दा परमेश्वरके सहर छै। जते लाखो स्वर्गदूतसब भोजमे उत्सव मनाबैके लिए जमा भेलै छे।

²³ तुहेंसब परमेश्वरके पहलौठा सन्तानसिके मण्डलीमे ऐल छैं, जकरसिके नाम स्वर्गमे लिख्ल छै। स्वर्गमे ऊसब परमेश्वरके नजरमे धर्मी घोषित कैल आदमीसिके आत्मासब छै जकरा आब सिद्ध बनैल गेलै छे। तुहेंसब खुद परमेश्वरके लगत ऐल छैं जे सभे चीजके उप्परमे न्यायधीश छै।

²⁴ तुहेंसब येशूके लगत ऐल्हैं छे, जे परमेश्वर आर आदमीसिके बीचमे नया करारके मध्यस्थ छै, जे आपन खूनसे आपनसिके हृदयके पवित्र बनैल्कै छे। आर ओकर मौत अपनासिके आपनसिके पापसिके विषयमे बताबैछै आर उटा मौत हाबिलके मौतसे उत्तम छै कहिनेकी ओकर मौत परमेश्वरके सजायके चिन्ह रहै।

²⁵ होशियार र, आर ऊ परमेश्वरके बात मान जे तोरसिसे बात करैछौ। कहिनेकी यदि धर्तीमे चेतावनी दिएवाला मूसाके इन्कार करेवाला इस्राएलीसब परमेश्वरके सजायसे नैबचे सकल्कै ते, स्वर्गसे चेतावनी दिएवाला परमेश्वरके बात सुनैसे इन्कार कर्बै ते अपनासब जरुर उटा सजायसे बचे नैसक्बै।

²⁶ जब परमेश्वर सिनै पहाडसे बोल्लै ते ओकर आवाज धर्तीके हिल्या देल्कै मगर आब ऊ एरं प्रतिज्ञा कैल्कै छे, “एकबेर फेर हमे खाली धर्तीके ही नै, मगर आकाशके भी हिल्या देबै।”

²⁷ आर यी वाक्य “एकबेर फेर” यी बातके देखाबैछै कि सारा सृष्टि हिली जैतै आर हटैल जैतै, ताकी जे चीजसब हिलैल नैजैछै उटा सभे अटल बन्ल रहै।

²⁸ इहे ल्याके अपनासिके जे राज्य मिल्लै छे, ओकरा हिलैल नै ज्या सकैछै। या अपनासब धन्यवादी भ्याके भक्ति आर भयके साथ परमेश्वरके एरंको आराधना करियै जकरासे ऊ खुश हैछै।

²⁹ जेरंके आगिन नाश करैछै ओहिने करिके आपनसिके परमेश्वर भी आपन दुश्मनसिके नाश कर्तै।