हिब्रू 11 - केवट नया कारार

विश्वासके परिभाषा आर उदाहरणसब

¹ यदि अपनासब परमेश्वरमे सच्चेके भरोसा करैछियै ते, अपनासब निश्चित हैछियै कि अपनासब आपन आशा कैल बात पैबै। आपनसिके भरोसाके कारणसे, अपनासब निश्चित छियै कि अपनासब एखनतक देखे नैसकेवाला चीज भी सच छै।

² आपनसिके पुर्खासब एरं विश्वास कैल्कै रहे। खाली इहे कारणसे परमेश्वर ओकरासिसे खुश रहै।

³ विश्वासेद्वारा अपनासब बुझैछियै, कि सारा संसारके सृष्टि परमेश्वरके वचनके द्वारा भेलै छे। अपनासब जे चीज देखैछियै ओकरा बनाबैके लिए कोय भी देखे नैसकेवाला चीज परमेश्वर प्रयोग कैल्कै।

⁴ विश्वासेद्वारा आदमके बेटा हाबिल ओकर बडका भैय्या कयिनसे उत्तम बलिदान परमेश्वरके लिए चढैल्कै, आर बलिदानके द्वारा परमेश्वर स्वीकार कैल्कै कि हाबिल एकटा धर्मी आदमी रहै, कहिनेकी परमेश्वर ओकर बलिदानसे खुश रहै। आर हाबिल आपन मौतके बाद भी, अपनासिके सिखाबैछै कि विश्वास केरं होना चाही।

⁵ हनोक नामके एकटा आदमीके विश्वासेद्वारा परमेश्वर ओकरा स्वर्गमे उठैल्कै, जब ऊ जिन्दा ही रहै। ऊ नैमर्लै आर इहे ल्याके कक्रहौ भी ओकर मर्ल शरीर नैमिल्लै। स्वर्गमे उठैल जैसे पहेला हनोक परमेश्वरके खुश बनैल्कै, जेरं कि धरमशास्त्रमे लिख्ल गेलै छे।

⁶ खाली परमेश्वरपर विश्वास करिके ही अपनासब ओकरा खुश करे सकैछियै। कहिनेकी परमेश्वरके लगत आबेवाला आदमीके विश्वास करना चाही कि परमेश्वर छै आर ऊसब जेसब ओकरा सच्चाईके साथ खोजैछै, ऊ ओकरासिके प्रतिफल दैछै।

⁷ विश्वासेद्वारा नूहके जब एकटा बाढके विषयमे परमेश्वरके द्वारा चेतावनी देल गेलै, जे ऊ कहियो नैदेखल्कै रहे, ऊ परमेश्वरके आज्ञापालन करिके आपन परिवारके बचाबैके लिए एकटा विशाल जहाज बनैल्कै। आर नूहके विश्वास करैसे पहेला, बाँकी संसारके आदमीसब जेसब विश्वास नैकैल्कै, ओकरासिके दोषी ठहरैल गेलै आर ऊसब डुबि गेलै आर मरि गेलै आर परमेश्वर नूहके धर्मी घोषित कैल्कै कहिनेकी नूह परमेश्वरपर भरोसा कैल्कै रहे।

⁸ विश्वासेद्वारा जब परमेश्वर अब्राहमके एकटा जगहमे जैके लिए बोलैल्कै ते आज्ञापालन करिके एरं जगहमे निक्लीके चल गेलै, जे जगह परमेश्वर उत्तराधिकारके रुपमे ओकरा पाछु देतियै, आर कते जाना छै से बात मालुम नैभेल पर भी आपन देश छोडिके बिदा भ्यागेलै।

⁹ विश्वासेद्वारा उटा देशमे जकर प्रतिज्ञा परमेश्वर कैल्कै रहे, अब्राहम एकटा अन्ठिया आदमीके जुगुर पालसिमे रहते रहै। ओकरसंगे, ओकर बेटा इसहाक आर पोता याकूब भी पालमे रहते रहै, जकरासिके परमेश्वरके तरफसे उहे प्रतिज्ञा मिल्लै रहे।

¹⁰ कहिनेकी ऊ स्वर्गमे एकटा एरंको सहरमे रहैके इन्तजार कर्ते रहै जे सभे दिन रहतै, जकरा रचेवाला आर बनाबेवाला परमेश्वर छै।

¹¹ विश्वासेद्वारा अब्राहमके पतनी सारा बुढ भेलपर भी गर्भधारण करैके शक्ति प्राप्त कैल्कै। कहिनेकी ओकरा निश्चय रहै कि परमेश्वर उहे कर्तै जकर ऊ प्रतिज्ञा कैल्कै रहे।

¹² जब अब्राहम सन्तान जनमाबैके लिए बहुते बुढ रहै, ओकरासे आकाशके तारासब आर समुन्दरके किनारके बालुके जुगुर अनगन्ती सन्तान उत्पन्न भेलै।

¹³ यी सभे आदमीसब जेसब परमेश्वरपर भरोसा कैल्कै, उटा चीजसब पैले बिना मरि गेलै जकर प्रतिज्ञा परमेश्वर कैल्कै रहे। मगर ऊसब यी बात आपन मनमे देखल्कै आर आनन्दित रहलै आर ऊसब यी बात बुझी गेलै कि ऊसब यी धर्तीमे खाली अन्ठिया आर परदेशी छियै।

¹⁴ एरं बात कहेवाला आदमीसब वास्तवमे एरं कहैछै कि ऊसब एकटा एरंको देशके प्राप्त करैके आशा करैछै जे ओकरसिके हैतै।

¹⁵ आर उटा देश जतेसे ऊसब निक्लीके ऐलै रहे, यदि उहे देशके विषयमे सोच्तियै ते, ऊसब वापस लौटिके ज्या सक्ते रहै।

¹⁶ ऊसब एकटा उत्तम देशके आशा कैल्कै, जकर मतलब छै स्वर्ग जैके लिए, सेल्याके परमेश्वर ओकरसिके परमेश्वर कहलैल जैसे खुश रहै, कहिनेकी ऊ ओकरसिके लिए एकटा सहर तैय्यार कैल्कै छे।

^17-18 विश्वासेद्वारा अब्राहम इसहाकके एकटा बलिदानके रुपमे परमेश्वरके चढ्या देल्कै जब कि परमेश्वर ओकर जचना लेते रहै। परमेश्वर अब्राहमसे कहैल्कै रहे, “इसहाक ऊ बेटा छौ जकरद्वारा तोर वंशके नाम रहतौ।” अब्राहमके परमेश्वरके तरफसे यी प्रतिज्ञा मिल्लै रहे, तैय्योपर भी ऊ आपन एकलौता बेटाके बलिदान चढाबैके लिए तैय्यार रहै, जे परमेश्वरके प्रतिज्ञाके पुरा करे सक्ते रहै।

¹⁹ अब्राहम विचार कैल्कै कि यदि इसहाक मरि भी जैतै ते परमेश्वर ओकरा फेर जिन्दा बनाबैमे सक्षम छै। आर यी मतलबमे अब्राहम सचमे आपन बेटाके मुर्दासे जिन्दा वापस पैल्कै।

²⁰ विश्वासेद्वारा इसहाक आपन दीटा बेटा याकूब आर एसावके भविष्यके विषयमे आशीर्वाद देल्कै।

²¹ विश्वासेद्वारा याकूब आपन मरैके समयमे योसेफके दोनो बेटामेसे एक-एकके आशीर्वाद देल्कै आर ऊ आपन लाठीके सहारा ल्याके झुकिके परमेश्वरके आराधना कैल्कै।

²² विश्वासेद्वारा योसेफ, जब ऊ मरै पर रहै ते निश्चयके साथ कहैल्कै कि इस्राएलीसब मिश्र देशसे निकल्तै आर एत्तेतक कि ऊ ओकरासिके आज्ञा देल्कै कि ऊसब ओत्तेसे निक्लीके जैके समयमे ओकर शरीरके हड्डीसब आपनसंगे ल्याजै।

²³ फेर जब मिश्र देशके राजा यी आज्ञा देल्कै कि जनम हैते ही सभे इस्राएलीसिके बेटा बच्चासिके जान मारि देल जाना चाही, तखन भी विश्वासेद्वारा मूसाके मयाँ-बाबु ओकर जनम भेलके बाद तीन महिनातक नुक्याके राखल्कै कहिनेकी ऊसब देखल्कै कि ऊ साधारण बच्चा नैछै आर ऊसब राजाके आज्ञा उलंघन करैसे डर नैमानल्कै।

²⁴ मिश्र देशके राजा फारोके बेटी मूसाके पालल्कै रहे। जब मूसा बडका भ्यागेलै ते, विश्वासेद्वारा ऊ नैचहते रहै कि आदमीसब ओकरा राजकुमारीके बेटा कहै।

²⁵ ऊ कुछु समयके लिए पापके सुखके आनन्द लियैके बदलामे, ऊ परमेश्वरके आदमीसिके संगे आपन उप्परमे आदमीसिके अत्याचार करैले दियैके चुनाव कैल्कै।

²⁶ मिश्र देशके सारा धन-दौलतसे बेसी ख्रीष्टके लिए निन्दित हुऐले बेसी बहुमूल्य बुझल्कै, यी जानीके कि ऊ जे करैछै उटा कामसे ओकरा स्वर्गमे प्रतिफल मिल्तै।

²⁷ विश्वासेद्वारा राजाके क्रोधसे नै डर्याके ऊ मिश्र देशके छोडी देल्कै। कहिनेकी कठिनाईसिके सामना कैलके बाद भी, ऊ फेर वापस नैभेलै कहिनेकी मान कि यी एरं रहै जेरं कि ऊ परमेश्वरके देखल्कै रहे, जे अदृश्य छै।

²⁸ विश्वासेद्वारा मूसा इस्राएलीसिके केबाडके चौखटमे भेंडाके खून छिटिके निस्तार पावनके विधि मानैके आज्ञा देल्कै, ताकी पहलौठा बेटासिके विनाश करेवाला दूत, इस्राएल देशके पहलौठा इस्राएलीसिके छुवे तक नैसकै।

²⁹ विश्वासेद्वारा इस्राएलीसब लाल समुन्दरके एरंके पार कैल्कै जेरं कि उटा सुख्खा जमिन छै। मगर मिश्री आदमीसब ओहिने करिके समुन्दर पार करैले खोजल्कै ते ऊसब डुबिके मर्लै।

³⁰ कहिनेकी इस्राएलीसब परमेश्वरपर विश्वास कैल्कै, सेल्याके ऊसब सात दिनतक यरिहो सहरके दिवालके चारो बगल घुम्लै। तब परमेश्वरके कहेल मुताबिक दिवाल गिरी गेलै।

³¹ विश्वासेद्वारा राहाब वेश्या परमेश्वरके आज्ञा उलंघन करेवालासिके संगे नाश नैभेलै, कहिनेकी ऊ इस्राएली सुराकीसिके स्वागत कैल्कै जेसब गुप्त रुपसे यरिहो सहरके भेद लियैके लिए ऐलै रहे।

³² हमरा आर कुछु कहैके कोनो जरुरत नैछै। हमरलगत समय नैछै कि गिदोन, बाराक, शिमशोन, यिप्ता जेसब न्यायकर्ता रहै आर दाऊद राजा, शमूएल परमेश्वरके वक्ता आर दोसर परमेश्वरके वक्तासिके विषयमे बात करियै।

³³ यीसब विश्वासेद्वारा राज्यसब जितल्कै, धार्मिकताके काम कैल्कै, प्रतिज्ञा कैल चीजसब प्राप्त कैल्कै, शेरसब ओकरासिके नैखैल्कै,

³⁴ आगिन ओकरासिके नैजरैल्कै, तलवार ओकरासिके नैमारल्कै, एकबेर कमजोर भेलके बाद ओकरासिके फेरसे मजगुत बनैल गेलै, युद्धमे शक्तिशाली भेलै, ऊसब आपन दुश्मनसिके सेनासिके दूर भग्या देल्कै।

³⁵ कुछु जनानीसब आपन मर्ल आदमीसिके मुर्दासे जिन्दा भेल पैल्कै। कुछु आदमीसब मार खैते-खैते मरि गेलै, कहिनेकी कैदसे छुटैके लिए आपन विश्वास छोडैले नैचहते रहै। ऊसब एरं कैल्कै ताकी मरिके फेरसे जिन्दा भेलके बाद ऊसब एकटा बहुते बढियाँ जीवन पाबे सकै।

³⁶ कुछु आदमीसिके उपहास सहे पड्लै, कोडाके मार ख्या पड्लै जब कि कुछु आदमीसिके सिक्कड ल्याके बान्हिके जेलमे कैद करि देल गेलै।

³⁷ ओकरासिमेसे कुछु विश्वासीसिके पत्थल ल्याके जान मारि देल गेलै। कुछु आदमीसिके आरी ल्याके चिरिके दी फाँक करि देल गेलै। कुछु आदमीसिके तलवार ल्याके मारि देल गेलै। एकरामेसे कुछु आदमीसब आपन विश्वासके कारण देशमे एत्ते-ओत्ते भटकते घुम्लै, खाली एरं कपडा पिन्हीके जे भेंडा आर बकरीके चमडासे बन्ल रहै। ओकरसिके लगत कोनो पैसा नैरहै। ओकरासिके लगातार दमन कैल गेलै आर तडपैल गेलै।

³⁸ संसार यी बढियाँ आदमीसिके लायकके नैरहै। ओकरासिके मरुभूमीमे, पहाडमे, गुफामे आर धर्तीके सुरुङसिमे शरण लिए पड्लै।

³⁹ परमेश्वर यी आदमीसिसे खुश रहै कहिनेकी ऊसब ओकरामे भरोसा कैल्कै। मगर ओकरसिके मौत नैहुऐतक परमेश्वरके प्रतिज्ञा कैल चीज ऊसब प्राप्त नैकैल्कै।

⁴⁰ कहिनेकी परमेश्वरके लगत खाली ओकरसिके लिए नै बल्की आपनसिके लिए भी एकटा उत्तम योजना छै। परमेश्वर ओकरासिके सिद्ध बनाबैले चाहैछै, मगर खाली आपनसिके संगे मिल्याके।