हिब्रू 1 - केवट नया कारार

बेटाके परिचय

¹ प्राचीन कालमे परमेश्वर आपनसिके बाप-पुर्खासिसे परमेश्वरके वक्तासिके द्वारा बहुतेबेर आर अनेक किसिमसे बोल्लै।

² मगर यी अन्तके दिनसिमे ऊ आपन बेटाके द्वारा आपनसिसे बोल्लै छे। परमेश्वर आपन बेटाके द्वारा सारा संसारके रचना कैल्कै आर ओकरा सभे चीजसिके उत्तराधिकारी बनैल्कै।

³ बेटा ही परमेश्वरके महिमाके उजेत छै आर ऊ सभे प्रकारसे परमेश्वरके जुगुर छै। ऊ आपन शक्तिशाली वचनके द्वारा सृष्टि कैल सभे चीजके सम्हारिके राखैछै। ऊ आदमीसिके ओकरसिके पापसे शुद्ध कैल्कै आर एकरबाद स्वर्गमे परमधन्य परमेश्वरके दहिना हातके बगलमे बैठ्लै।

⁴ सेल्याके परमेश्वर बेटाके एकटा एरंको नाम देल्कै जे स्वर्गदूतसिसे बहुते बेसी महान छै, जकरद्वारा अपनासब देखे सकैछियै कि बेटा ओकरसिसे बहुते महान छै।

येशू स्वर्गदूतसिसे श्रेष्ठ

⁵ धरमशास्त्रमे कहियो कोय नैबतैल्कै कि परमेश्वर कोनो स्वर्गदूतके कहैल्कै, जे बात ऊ आपन बेटासे कहैल्कै, “तुहें हमर बेटा छैं, ऐज हमे तोरा आपन बेटाके रुपमे प्रकट करैछियौ।” फेर ऊ एरं बात आपन कोनो भी स्वर्गदूतके नैकहैल्कै, “हमे ओकर पिता बन्बै, आर ऊ हमर बेटा बनी जैतै।”

⁶ आर जब परमेश्वर आपन आदरणीय बेटाके यी संसारमे भेजल्कै ते कहैछै, “हमर सभे स्वर्गदूतसब ओकरा झुकिके आराधना करक।”

⁷ आर स्वर्गदूतसिके विषयमे परमेश्वर कहैछै, “परमेश्वर आपन स्वर्गदूतसिके हावाके जुगुर बनाबैछै, आर आपन सेवकसिके धधक्ल आगिनके जुगुर बनाबैछै।”

⁸ मगर बेटाके विषयमे कहैछै, “हे परमेश्वर, तुहें सभे दिनके लिए राजाके जुगुर राज्य कर्भ। तुहें आपन राज्यपर धार्मिकतासे राज्य करैछह।

⁹ ठीक बात तुहें पसन्द करैछह आर अधार्मिकता तुहें घृणा करैछह। इहे ल्याके हमे तोर परमेश्वर तोरा चुन्लियौ छे, आर तोर सभे साथीसिसे बेसी तोरा आदर आर आनन्द देलियौ छे।”

¹⁰ आर धरमशास्त्र भी कहैछै, “हे प्रभु, शुरुमे तुहें धर्तीके रचना कैलह, आर तुहें उटा सभे कुछु बनैलह जे आकाशमे छै।

¹¹ ऊ सभेटा नाश भ्याजैतै, मगर तुहें सभे दिन अस्तित्वमे रहेभ। आर ऊ सभे पुरना कपडाके जुगुर पुरना भ्याजैतै।

¹² आर तुहें ओकरा चद्दरके जुगुर समेट्भ, ऊसब कपडाके जुगुर बदल्ल जैतै। ओहिने करिके परमेश्वर यी वर्तमान युगके एकटा नया युगसे बदली देतै। मगर तुहें सभे दिन एक समान रहेभ आर तुहें सभे दिन जिन्दा रहेभ।”

¹³ फेर परमेश्वर आपन कोनो स्वर्गदूतके कहियो नैकहैल्कै, “तुहें हमर दहिना हातके बगल आदरके जगहमे बैठ, जबतक हमे तोर दुश्मनसिके पूर्ण रुपसे तोर अधिनमे नैआन्बौ।”

¹⁴ तब, स्वर्गदूतसब कोन काम करैछै? स्वर्गदूतसब परमेश्वरके सेवा करेवालासब छै, परमेश्वर ओकरासिके ऊ आदमीसिके देखभाल करैके लिए भेजैछै जेसब उद्धार पाबेवाला छै।