गलाती 5 - केवट नया कारार

ख्रीष्टमे आजादी

¹ ख्रीष्ट अपनासिके मूसाके विधि-विधानसे आजाद कैल्कै छे। सेल्याके आपन आजादीके पक्डीके राख। विधि-विधानके पालन करैके लिए खुदके फेरसे दास नैबना।

² जे हमे, पावल तोरासिसे कहैले जैछियौ, ओकरा ध्यानसे सुन। यदि परमेश्वरके नजरमे धर्मी घोषित कैल जैके लिए खतना करैभैं ते, ख्रीष्ट जे काम कैल्कै छे, ओकरासे तोरा कोनो फैदा नैहैतौ।

³ हमे फेर तोरासिके चेतावनी दैछियौ कि जे आदमी यी कहिके खतना करवाबैछै कि परमेश्वरके नजरमे धर्मी घोषित हुऐके लिए ओकरा उटा सभे कुछु करना चाही जे बात मूसाके विधि-विधान करैले कहैछै।

⁴ तुहें जेसब विधि-विधानके पालन करिके धर्मी घोषित हुऐले चाहैछैं, तुहेंसब अपने आपके ख्रीष्टसे अलग करैछैं आर तुहेंसब अपने आपके उटा अनुग्रहसे अलग करि लेल्हैं छे जकरासे परमेश्वर तोरासिके बचाबे सकैछौ।

⁵ हमे एरं कहे सकैछियै कहिनेकी अपनासिके पवित्र आत्माके द्वारा पुरा आशा मिल्ल छै कि परमेश्वर अपनासिके धर्मी घोषित कर्तै कहिनेकी अपनासब ख्रीष्टमे विश्वास करैछियै।

⁶ कहिनेकी यदि अपनासब ख्रीष्ट येशूके संगे एक छियै ते आपनसिके खतना भेल छै या नैभेल छै यी बात महत्वपूर्ण नैछै। मगर महत्वपूर्ण बात यी छै कि अपनासब ख्रीष्टके आपन उद्धारकर्ताके रुपमे विश्वास करैछियै, आर परमेश्वर आर दोसर आदमीसिके प्रति प्रेम राखैछियै।

प्रेमद्वारा विधि-विधानके पुरा होना

⁷ तुहेंसब ख्रीष्टके संगे आपन सम्बन्धमे एतनें बढियाँसे उन्नति कर्ते रहैं। तोरासिके खुदके कक्रहौ भी प्रभावित नैकरैले देना रहौ कि आब तुहेंसब ख्रीष्टके विषयके सच्चा सन्देशपर विश्वास नैकरैछैं।

⁸ यी शिक्षा परमेश्वरके तरफसे नैआबैछै, जे तोरासिके आपन सन्तान हुऐके लिए चुनल्कौ।

⁹ होशियार र, कहिनेकी आदमीसब जे कहैछै ऊ सच छै कि, “कनेजरा खमीर सान्ल सभे अट्टाके फुल्या दैछै।”

¹⁰ हमे परमेश्वरपर भरोसा राखैछियै कि ऊ तोरासिके झुट्ठा शिक्षासिपर विश्वास करैसे बच्याके राख्तौ। मगर तोरसिके लिए परेशानी खडा करेवाला सभे आदमीसब परमेश्वरके द्वारा सजाय पैतै।

¹¹ मगर हे विश्वासी भ्या-बहिनसब, हमे प्रचार करैछियै कि खतना महत्वपूर्ण नैछै, आर इहे कारणसे हमरा यहूदी आदमीसिके द्वारा निरन्तर सतैल जैछै। यदि हमे ख्रीष्टके मौतके विषयमे प्रचार नैकरिके खतनाके विरुद्धमे प्रचार कर्तियै ते यहूदी आदमीसिके लिए कोनो अपमान नैहैतियै।

¹² तोरासिके भर्माबेवाला आदमी ते खुदके नपुंसक बन्या लेतियै ते हैतियै।

¹³ हे विश्वासी भ्या-बहिनसब, तुहेंसब परमेश्वरके द्वारा आजाद हुऐके लिए चुन्ल गेल्हैं रहे आर सेल्याके आब तोरासिके मूसाके विधि-विधानके पालन करैके जरुरत नैछौ। मगर यी आजादीके आपन पापमय स्वभावसिके पुरा करैके बहाना नैबना। बरु, एक दोसरसे प्रेम कर आर एक दोसरके सेवा कर।

¹⁴ कहिनेकी सभे विधि-विधानके सार यी एकटा आज्ञामे बतैल ज्या सकैछै, “तुहें आपन पडोसीके आपने जुगुर प्रेम कर।”

¹⁵ मगर यदि तुहेंसब लगातार एक दोसरसे लड्ते रहैछैं आर एक दोसरके परेशान कर्ते रहैछैं ते होशियार र, तुहेंसब खुदके बर्बाद करि देभैं।

पवित्र आत्माके शक्तिसे जिना

¹⁶ मगर हमे तोरासिके कहैछियौ, पवित्र आत्माके तोरसिके जीवनके अगुवाई करैले दहैं। तब तुहेंसब आपन पापमय स्वभावसिके पालन नैकर्भैं।

¹⁷ कहिनेकी आपनसिके पापमय स्वभाव पवित्र आत्माके विरुद्धमे हैछै, आर पवित्र आत्मा पापमय स्वभावके विरुद्धमे हैछै। कहिनेकी यी दोनो शक्तिसब लगातार एक दोसरसे लड्ते रहैछै, सेल्याके अपनासब सभे दिन उटा बढियाँ कामसिके नैकरे सकैछियै जे अपनासब करैले चाहैछियै।

¹⁸ यदि पवित्र आत्मा तोरसिके जीवनके अगुवाई करैछौ ते तुहेंसब मूसाके विधि-विधानके अधिनमे नैहैछैं।

¹⁹ पापमय स्वभावके कामसब साफसे देखे सकैछियै, जे इहे छै: व्यबिचार, अनैतिक काम, खराब काम,

²⁰ मूर्तिपूजा, जादु-टोना, दुश्मनी, झरझगडा, जर्नी, क्रोध, स्वार्थीपन, फुट, गुटबन्दी,

²¹ डाहा, पियक्कडपन, मौजमजा आर ऊसब एरंको दोसर सभे खराब कामसब करैछै। यी सभैके विषयमे हमे तोरासिके चेतावनी दैछियौ आर पहेला भी देलियौ छे। जे एरंको कामसब करैछै, ऊसब परमेश्वरके राज्यके हकदार नैबन्तै।

²² पवित्र आत्माद्वारा उत्पन्न हुएवाला चरित्रसब यी छियै: प्रेम, आनन्द, शान्ति, धीरज, दया, भलाइ, विश्वस्तता,

²³ नम्रता आर संयम। एरंको किसिमके चरित्रपर रोक लगाबैके लिए कोनो नियम नैछै।

²⁴ जब आदमीसब येशू ख्रीष्टसे सम्बन्ध राखैछै ते ऊसब आपन पापमय स्वभावके द्वारा नैचलैछै। ओकरसिके स्वभाव क्रूसमे चढैल जुगुर छै।

²⁵ अपनासिके आपन नया जीवन पवित्र आत्माके तरफसे मिलैछै आर सेल्याके अपनासिके पवित्र आत्माके अगुवाईमे चलना चाही।

²⁶ अपनासिके घमण्ड नैकरना चाही, अपनासिके एक दोसरके परेशान नैकरना चाही आर अपनासिके एक दोसरके जर्नी नैकरना चाही।