गलाती 4 - केवट नया कारार

ख्रीष्टमे परमेश्वरके आजाद बेटा

¹ हमरा यी उदाहरणके द्वारा बुझाबैले दे: एकटा मातबर आदमीके एकटा बेटा रहै। जबतक उटा बेटा छोट छै, तबतक ओकरामे आर एकटा नोकरके बीचमे कोनो अन्तर नैछै। तैय्योपर ऊ पाछु आपन बाबुके दौलतके मालिक बन्तै।

² जबतक कि बाबुके द्वारा तय कैल समय नैआबैछै, तबतक ऊ अपनाके रस्ता देखाबेवाला आर देखभाल करेवालाके अधिकारके अधिनमे रहैछै।

³ ओहिने करिके, अपनासब भी उहे बेटाके जुगुर रहियै आर अपनासब दाससिके जुगुर यी संसारके कुछु धार्मिक नियमसिके पालन कर्ते रहियै।

⁴ मगर जब परमेश्वरके तय कैल समय ऐलै, परमेश्वर खुद आपन बेटाके यी संसारमे भेजल्कै, आर ऊ एकटा आदमीके रुपमे जनम लेल्कै। ऊ एकटा यहूदी आदमीके रुपमे जनम लेल्कै रहे आर मूसाके विधि-विधानके अनुसरण कर्ते रहै।

⁵ ताकी ऊ अपनासिके छुटकारा दिये सकै, जे मूसाके विधि-विधानके अधिनमे रहते रहै, आर अपनासिके ओकर बेटा-बेटीसब बनैल गेलै छे।

⁶ अपनासब ओकर बेटा हुऐके कारणसे परमेश्वर आपन बेटाके आत्मा आपनसिके हृदयमे भेजी देल्कै, जे आत्मा परमेश्वरके “हे अब्बा, पिता!” कहिके पुकारैछै।

⁷ सेल्याके, आब अपनासब नोकर नैछियै, मगर अपनासब परमेश्वरके बेटा बनी गेलियै छे। सेल्याके, अपनासब परमेश्वरके बेटासब छियै, ते ऊ अपनासिके उटा सभे कुछु देतै जे कुछु ओकरलगत ओकर बेटाके लिए छै।

मण्डलीके लिए पावलके चिन्ता

⁸ पहेला जब तुहेंसब परमेश्वरके नैचिन्हते रहैं, उटा समयमे तुहेंसब ओकर दास रहैं, जे वास्तवमे ईश्वरसब छैबे नैकरै।

⁹ आब जब कि परमेश्वरके संगे तोरसिके एकटा सम्बन्ध छौ या हमरा यी कहना चाही कि ऊ अपनासिके आपन बेटाके रुपमे स्वीकार कैल्कै छे, ते फेर तुहेंसब कमजोर आर दयनीय शिक्षासिके दास बनैके लिए कहिने वापस जैछैं?

¹⁰ तुहेंसब कुछु खास दिन या महिना या मौसम या सालके पालन करिके परमेश्वरके पक्ष प्राप्त करैके कोशिश करैछैं।

¹¹ जे कुछु तुहेंसब करैछैं उटा बातके कारण हमे चिन्तित छियै कि तोरसिके बीचमे हमर सेवा बेकार भेलै।

¹² हे विश्वासी भ्या-बहिनसब, हमे तोरासिके बिन्ती करैछियै कि तुहेंसब ओहिने ही व्यवहार कर जेरं व्यवहार हमे करैछियै, कहिनेकी एकटा यहूदी आदमी हुऐके कारण हमे मूसाके विधि-विधानके पालन करैले छोडी देलियै। हमे तोरसिके जुगुर बनी गेलियै, जेसब यहूदी आदमीसब नैछैं। तुहेंसब हमर बढियाँसे देखभाल कैल्हैं।

¹³ तोरासिके याद हैतौ कि यी एकटा बेमारीके कारण रहै कि हमे पहेला बेर तोरसिकेलगत खुश-खबरीके प्रचार करैके लिए ऐलियौ।

¹⁴ जब कि हमर बेमारी तोरसिके लिए एकटा परेशानी रहौ, मगर फेर भी तुहेंसब हमरासे घृणा नैकैल्हैं आर हमरा दूर भी नैकैल्हैं। मगर तुहेंसब हमरा उहे तरिकासे स्वीकार कैल्हैं जेरंके तुहेंसब परमेश्वरके एकटा स्वर्गदूतके या खुद येशू ख्रीष्टके स्वीकार कर्तिहैं।

¹⁵ उटा समयमे तुहेंसब बहुते खुश रहैं! तोरसिके उटा खुशी आब कते गेलौ? हमे वास्तवमे यी कहे सकैछियै कि तुहेंसब यदि सम्भव हैतियै ते आपन आँख भी निकालीके हमरा देतिहैं।

¹⁶ हमे तोरासिके सच बताबैके कारण हमे एखन तोरसिके दुश्मन भ्या गेलियौ छे।

¹⁷ ऊ खुश-खबरीके बिगाडैले चाहेवाला आदमीसब तोरासिके आपन समूहमे सामिल करैके लिए पुरा कोशिश करैछै। मगर ओकरसिके मकसद तोरसिके भलाइ करना नैछै। ओकरसिके मकसद ते तोरासिके हमरासे अलग करना छै ताकी तुहेंसब ओकर चेला बनी जहैं।

¹⁸ सभे दिन बढियाँ मकसदके लिए कोशिश करना बहुते बढियाँ बात छै आर खाली उहे समयमे नै, जब हमे तोरसिके बीचमे हाजिर रहैछियै।

¹⁹ हमर बच्चासब, जेरंके एकटा जनानी बच्चा जनमाबैके समयमे दरद महसुस करैछै, ओहिने करिके ही हमे एकबेर फेर तोरसिके लिए दरद महसुस करैछियै। हमे यी दरदमे तबतक रहैछियै जबतक तुहेंसब ख्रीष्टमे परिपक्क नैभ्याजैछैं।

²⁰ हमे बहुते चाहैछियै कि आब हमे तोरसिके संगे रहियै ताकी हमे तोरसिसे नम्र तरिकासे बात-चित करे सकियै। कहिनेकी हमर समझमे नैआबैछै कि हमे तोरासिके कि कहियौ।

दीटा करार: सारा आर हागार

²¹ आर तुहेंसब, जे मूसाके विधि-विधानके अधिनमे हुऐले चाहैछैं, हमर बात सुन! हमे तोरासिके बतैबौ कि मूसाके विधि-विधानके किताबमे कि लिख्ल छै।

²² कहिनेकी धरमशास्त्रमे यी लिख्ल छै, “अब्राहमके दीटा बेटा रहै। ओकर एकटा बेटाके जनम हागारसे भेलै रहे, जे एकटा नोकरनी रहै। आर दोसर बेटाके जनम सारासे भेलै रहे, जे नोकरनी नैरहै।”

²³ अब्राहमके बेटा, जे ओकरा नोकरनी जनानी हागारसे मिल्लै रहे, ऊ खाली आदमीसिके योजनासे ही जनम भेलै रहे। मगर अब्राहमके दोसर बेटा, जे ओकरा ओकर पतनीसे मिल्लै रहे, ओकर जनम परमेश्वरके प्रतिज्ञाके पुरा हुऐके नतिजा स्वरुप भेलै रहे।

²⁴ यी दीटा जनानीसब परमेश्वरके बनैल दीटा करारके जुगुर छै। उटा करार जे परमेश्वर इस्राएलीसिके संगे सिनै पहाडपर बान्हल्कै रहे, जब ऊ ओकरासिके आपन विधि-विधान देल्कै रहे, ऊ हागारके जुगुर छै। ऊ उटा बच्चासिके जनम दैछै जेसब दाससब बनैछै।

²⁵ ऐजके यरूशलेम सहरके आदमीसब यहूदी आदमीसिके विधि-विधानके पालन करैके कारण दास छै। ऊसब हागारके जुगुर दास छै जे अरब देशके सिनै पहाडपर बान्हल करार देखाबैछै।

²⁶ मगर साराके तुलना ऊ यरूशलेम सहरसे कैल ज्या सकैछै जे स्वर्गमे छै। सारा ही छै जे आब आपनसिके लिए एकटा मयाँके जुगुर छै कहिनेकी ऊ एकटा नोकरनी नैरहै, आर अपनासब मूसाके विधि-विधानके पालन करैसे आजाद छियै।

²⁷ कहिनेकी जेरंके यशैया परमेश्वरके वक्ता धरमशास्त्रमे लिखल्कै छे, “हे सभे बाँझिन जनानीसब, तोर जकर कहियो बाल-बच्चा नैभेलौ, खुश हु, जोरसे हल्ला कर आर आनन्दसे उत्साहित हु! जब कि तुहेंसब बच्चाके जनम दियैके दरद कहियो महसुस नैकैल्हैं। कहिनेकी तोर जकर कहियो बाल-बच्चा नैभेलौ आर तुहेंसब जे आपन पतिसे त्याग्ल छैं, पति भेल जनानीसिसे बेसी पतिद्वारा त्याग्ल जनानीसिके सन्तानसब बहुते छै।”

²⁸ आब हे विश्वासी भ्या-बहिनसब, अब्राहमके बेटा इसहाकके जुगुर जे परमेश्वरके प्रतिज्ञाके मुताबिक जनम भेलै रहै, अपनासब भी परमेश्वरके प्रतिज्ञाके मुताबिक ओकर सन्तान बनी गेलियै छे।

²⁹ मगर आब तोरासिके ऊ आदमीसिके द्वारा सतैल जैछौ जेसब चाहैछै कि तुहेंसब विधि-विधानके पालन करहैं, ओहिने ही जेरंके ईश्माएल, यानिकी आदमीके योजनाके मुताबिक जनम लेल बच्चा इसहाकके, यानिकी परमेश्वरके आत्माके शक्तिसे जनम लेल बच्चाके सतैल्कै।

³⁰ मगर धरमशास्त्र कहैछै कि “नोकरनी जनानी आर ओकर बेटाके दूर भेजी दहैं, कहिनेकी नोकरनीके बेटाके लगत बाबुके सम्पत्तिमेसे कुछु भी नै होना चाही। यी बाबुके पतनीके बेटाके मिलना चाही जे नोकरनी नैछै।”

³¹ जे बात हमे कहैछियै ओकर निष्कर्ष यी छै: हे हमर विश्वासी भ्या-बहिनसब, अपनासब नोकरनी जनानीके सन्तानसब नैछियै, जकरा विधि-विधानके पालन करैके जरुरत छै। अपनासब बाबुके पतनीके सन्तान छियै जे आपनसिके विश्वासके कारण परमेश्वरके स्वीकार योग्य छै।