गलाती 3 - केवट नया कारार

विश्वासके द्वारा धार्मिकता

¹ तुहें, हे गलातिया प्रदेशके विश्वासीसब तोरसिके दिमाग खराब भ्या गेलौ छे, कहिनेकी हमे तोरासिके एतनें साफसे वर्णन कैलियौ कि येशू ख्रीष्ट क्रूसपर कहिने मर्लै, ते फेर तुहेंसब उटा बातसे केरंके दूर ज्या सकैछैं। कोय जरुर तोरासिके धोखा देल्कौ छे।

² हमरा एकटा बात बता: तोरासिके पवित्र आत्मा केरंके मिल्लौ? कि विधि-विधानके अनुसरण करिके तोरासिके पवित्र आत्मा मिल्लौ? नै, तोरासिके पवित्र आत्मा इहे ल्याके मिल्लौ कहिनेकी तुहेंसब खुश-खबरीके सुन्लहैं आर ओकरापर विश्वास कैल्हैं।

³ तोरसिके दिमाग खराब भ्या गेलौ छे। परमेश्वर आपन आत्माके द्वारा तोरासिके एकटा नया तरिकासे जीवन जियैके शुरुआत करैमे सहायता कैल्कौ छे। कि आब तुहेंसब आपन ताकतसे आपन जीवनके अन्त करैले चाहैछैं?

⁴ विश्वासी बन्लके बाद तुहेंसब बहुते दुःख भोग्लहैं। हमे सचमे आशा करैछियै कि यी दुःख बेकार नैरहै।

⁵ परमेश्वर आब तोरासिके खुल्ला दिलसे पवित्र आत्मा दैछौ आर तोरसिके बीचमे चमत्कार करैछौ। यी मूसाके विधि-विधान पालन करैके कारणसे नै मगर तुहेंसब ख्रीष्टके विषयमे खुश-खबरी सुनिके आर ओकरापर विश्वास करैके कारणसे छै।

⁶ उदाहरणके लिए अब्राहमके ले, “अब्राहम परमेश्वरमे विश्वास कैल्कै आर परमेश्वर ओकरा धर्मी घोषित कैल्कै।”

⁷ तोरासिके यी समझना चाही कि जे आदमीसब अब्राहमके जुगुर परमेश्वरपर भरोसा करैछै, ऊसब अब्राहमके सच्चा सन्तान छै।

⁸ परमेश्वर धरमशास्त्रमे बहुते समय पहेला कही देल्कै रहे कि ऊ गैर-यहूदी आदमीसिके विश्वासद्वारा आपन नजरमे धर्मी घोषित कर्तै। इहे कारण छै कि धरमशास्त्रमे, जब परमेश्वर पहेला ही अब्राहमके खुश-खबरी सुनैल्कै ते ऊ ओकरासे कहैल्कै, “तोरद्वारा हमे यी संसारके सभे आदमीसिके आशीर्वाद देबै।”

⁹ जेरंके परमेश्वर अब्राहमके ओकर विश्वासके कारण आशीर्वाद देल्कै, ओहिने करिके जे कोय भी येशू ख्रीष्टमे विश्वास करैछै, ऊ निश्चित रुपसे अब्राहमके संगे आशिष पैतै।

¹⁰ मगर मूसाके विधि-विधानमे एरं लिख्ल छै, “जे मूसाके विधि-विधानमे लिख्ल नियमसब सभे दिन पालन नैकरैछै, ओकरापर परमेश्वरके सराप ऐतै।” सेल्याके विधि-विधानके नियमके पालन करिके परमेश्वरके नजरमे धर्मी घोषित हुऐके कोशिश करेवाला सभे आदमीमे सराप ऐलै छे। कहिनेकी कोय भी उटा नियमसब पुरा रुपसे पालन करे नैसकैछै।

¹¹ मगर यी बात साफ छै कि कोय भी आदमी परमेश्वरके समनामे मूसाके विधि-विधानके पालन करिके परमेश्वरके द्वारा धर्मी घोषित नैहुए सकैछै। कहिनेकी धरमशास्त्रमे लिख्ल छै, “जे आदमी परमेश्वरमे विश्वासके माध्यमसे परमेश्वरके नजरमे धर्मी घोषित कैल जैछै, ऊ सभे दिनके लिए जियैछै।”

¹² मूसाके विधि-विधान पालन करैके लिए परमेश्वरपर भरोसा राखैके जरुरत नैछै। मगर जेरं धरमशास्त्रमे लिख्ल छै, “जे आदमीसब यीसब बातसिके पालन कर्तै, ऊसब उटा बातसब पालन करैके कारणसे जिन्दा रहतै।”

¹³ मगर विधि-विधानके देल सरापसे ख्रीष्ट अपनासिके छुटकारा देल्कै छे। जब ख्रीष्ट क्रूसमे मर्लै, ऊ आपनसिके पापके सराप खुदपर लेल्कै। कहिनेकी धरमशास्त्रमे लिख्ल छै, “क्रूसमे मरेवाला सभेको श्रापित है।”

¹⁴ ख्रीष्ट यी इहे कारणसे कैल्कै ताकी गैर-यहूदी आदमीसब उहे आशीर्वाद पैतै जे येशू ख्रीष्टद्वारा परमेश्वर अब्राहमके दियैके लिए प्रतिज्ञा कैल्कै रहे, आर येशू ख्रीष्टमे विश्वास करैके कारणसे ऊ अपनासिके प्रतिज्ञा कैल पवित्र आत्मा अपनासब पाबे सकियै।

स्थिर प्रतिज्ञा

¹⁵ हे विश्वासी भ्या-बहिनसब, हमे सामान्य जीवनसे उदाहरण दैछियौ, जब दीटा आदमी एकटा करारनामा बनाबैछै आर ऊसब ओकरामे सही छाप लगाबैछै, ओत्ते उटा करारनामाके कोय भी आदमी खारिज नैकरे सकैछै आर ओकरामे कुछु थपे भी नैसकैछै।

¹⁶ अहिने करिके परमेश्वर अब्राहमसे यी प्रतिज्ञा कैल्कै कि “तोर सन्तानके द्वारा सभेको आशिष पैतै।” धरमशास्त्रमे यी नैलिख्ल छै, “तोर सन्तानसिसे”। ओकर बहुते सन्तानसिके बारेमे ऊ यी नैकहैल्कै छे। यी एकटा आदमीके बारेमे कहैछै, जब यी “तोर सन्तानके” कहैछै, आर ऊ आदमी ख्रीष्ट छै।

¹⁷ जे हमे कहैछियौ ओकर मतलब यी छै कि अब्राहमके संगे प्रतिज्ञा कैल चार स तीस सालके बाद आपन कैल प्रतिज्ञाके पुष्टि करैके लिए परमेश्वर मूसाके विधि-विधान देल्कै। मगर अपनासब यी नैकहे सकैछियै कि परमेश्वरके करारके कोनो मोल नैछै कहिनेकी आब विधि-विधान छै। परमेश्वरके करार एखन भी पक्का छै आर परमेश्वरके एकरा पुरा करे पडैछै।

¹⁸ मूसाके विधि-विधानके पालन करैके कारणसे परमेश्वर अपनासिके आपन आशिष नैदैछै, मगर ऊ उटा बातके प्रतिज्ञा करैके कारणसे उटा आशिष दैछै। ओहिने करिके, परमेश्वर आपन अनुग्रहसे उटा आशिष अब्राहमके मुफ्तमे देल्कै कहिनेकी ऊ अब्राहमके यी बातके प्रतिज्ञा कैल्कै रहे।

विधि-विधानके मकसद

¹⁹ तब फेर विधि-विधान कहिने देल गेलै ते? विधि-विधान आदमीसब कतनें पापी छै कहिके देखाबैके लिए देल गेलै। मूसाके विधि-विधानके तबतक रहना रहै जबतक अब्राहमके उटा सन्तान नैऐलै, जकर विषयमे परमेश्वर प्रतिज्ञा कैल्कै रहे। विधि-विधान मूसाके स्वर्गदूतसिके सहायतासे देल गेलै रहे आर मूसा परमेश्वर आर आदमीसिके बीचमे मध्यस्थकर्ता भेलै।

²⁰ एक मध्यस्थके जरुरत तभे पडैछै जब दीटा पक्ष सामिल हैछै। मगर अब्राहमके देल प्रतिज्ञा बिना कोनो मध्यस्थके सिधे परमेश्वरके द्वारा देल गेलै रहे।

²¹ कि एकर मतलब यी छै कि विधि-विधान जे कहैछै ऊ ओकर विरुद्ध छै जकर प्रतिज्ञा परमेश्वर कैल्कै रहे? हर्गिस नै! कहिनेकी अगर विधि-विधान अपनासिके कहियो खतम नैहुएवाला जीवन देतियै ते अपनासब एकर पालन करिके परमेश्वरके संगे धर्मी घोषित कैल ज्या सक्तियै।

²² मगर धरमशास्त्र कहैछै कि यी संसारके सभे आदमीसब पापके शक्तिके बन्धनमे छै, ताकी उटा उपहार जकरा परमेश्वर विश्वासके आधारमे दियैके प्रतिज्ञा कैल्कै रहे, उटा प्रतिज्ञा ऊ आदमीसिके मिले सकै जे येशू ख्रीष्टमे भरोसा राखैछै।

²³ मगर ख्रीष्टके आबैसे पहेला, अपना यहूदी आदमीसिके कैदमे राख्ल गेलै रहे आर विधि-विधान आपनसिके रखवाली कर्ते रहै। तब परमेश्वर प्रकट कैल्कै कि कोनो आदमी विधि-विधानमे कैदी हुऐसे ख्रीष्टमे विश्वास करिके छुटकारा पाबे सकैछै।

²⁴ सेल्याके एकटा बाबुके जुगुर जे आपन जवान बेटाके रस्ता देखाबैके लिए आर ओकर सहायता करैके लिए एकटा दासके नियुक्त करैछै, ओहिने करिके परमेश्वर ख्रीष्ट आबैतक आपनसिके देखभाल करैके लिए विधि-विधानके प्रयोग कैल्कै। ताकी अपनासब येशू ख्रीष्टमे विश्वास करिके परमेश्वरके नजरमे धर्मी घोषित हुए सकियै।

²⁵ मगर आब जब कि ख्रीष्ट आबी गेलै छे आर अपनासब ओकरापर विश्वास करे सकैछियै, आब अपनासिके रस्ता देखाबैके लिए आर आपनसिके देखभाल करैके लिए विधि-विधानके जरुरत नैछै।

^26-27 तुहेंसब सभेको येशू ख्रीष्टमे बप्तिस्मा लेल्हैं छे आर ख्रीष्टके चरित्रके मुताबिक चलैछैं। सेल्याके तुहेंसब येशू ख्रीष्टमे विश्वास राखैके द्वारा परमेश्वरके सन्तान बनी गेल्हैं छे।

²⁸ ख्रीष्टमे एकटा यहूदी आदमी या गैर-यहूदी आदमी या एकटा दास या एकटा दास नैभेल आदमीके बीचमे कोनो अन्तर नैछै। एकरामे कोनो अन्तर नैछै कि तुहें एकटा मरद छैं या जनानी। अपनासब सभेको येशू ख्रीष्टमे एक समान छियै।

²⁹ कहिनेकी तुहेंसब ख्रीष्टके संगे एक छैं, आब तुहेंसब अब्राहमके परिवारके आदमी छैं आर तुहेंसब अब्राहमके हकदार छैं आर तोरासिके उटा सभे कुछु मिल्तौ जकर परमेश्वर अब्राहमसे प्रतिज्ञा कैल्कै रहे।