एफिसी 4 - केवट नया कारार

ख्रीष्टके शरीरमे एकता

¹ सेल्याके, हमे जे प्रभु येशूके सेवा करैके कारणसे कैदी छियै, तोरासिके बिन्ती करैछियौ कि उटा बोलावटके संगे जकरासे परमेश्वर तोरासिके आपन सन्तान हुऐके लिए बोलैल्कौ छे, ओकर मुताबिक जीवन जी।

² सभे दिन नम्र आर कोमल बन। एक दोसरके संगे धीरज राख, प्रेमके कारण एक दोसरके व्यवहारके सहन कर।

³ यी काममे आपन सबसे बढियाँ कोशिश कर ताकी तुहेंसब लगातार मेल-मिलापमे र, कहिनेकी तुहेंसब पवित्र आत्माद्वारा एक बनैल गेल्हैं छे।

⁴ अपनासब सभे विश्वासी एक्केटा शरीरके अंगसिके जुगुर छियै। अपनासिके एक्केटा पवित्र आत्मा मिल्लै, जेरंके तोरासिके एक्केटा आशा देल गेलौ रहे, जब तोरासिके परमेश्वरके आदमीसब हुऐके लिए चुन्ल गेलौ।

⁵ आपनसिके एक्केटा प्रभु छै, जकरापर अपनासब विश्वास करैछियै, खाली ख्रीष्टके नाम पर ही अपनासिके बप्तिस्मा देल गेलै छे।

⁶ अपनासब एक्केटा परमेश्वरके आराधना करैछियै जे आपनसिके सभैके पिता छै। ऊ आपनसिके सभैके उप्परमे राज्य करैछै, ऊ अपनासब सभैके द्वारा काम करैछै आर ऊ अपनासब सभैमे रहैछै।

⁷ मगर ख्रीष्ट आपनसिमेसे हरेकके ओकर काम करैके लिए अलग-अलग विशेष योग्यतासब देल्कै छे।

⁸ सेल्याके धरमशास्त्रमे ख्रीष्टके बारेमे एरं लिख्ल छै, “ऊ स्वर्गमे चढिके जैबेरियाँ बहुते कैदीसिके आपनसंगे ल्यागेलै, आर आदमीसिके उपहारसब देल्कै।”

⁹ “ऊ उप्पर चढिके गेलै” कहैके मतलब कोन चीज छै? एकर मतलब यी छै कि ऊ धर्तीके निच्चा भागसिमे उतर्लै भी रहे।

¹⁰ सेल्याके ख्रीष्ट निच्चा ऐलै, आर ऊ उहे छै जे स्वर्गमे सबसे ऊँचा पदपर चढी गेलै। ख्रीष्ट सभे चीज आपन उपस्थितिसे भरैके लिए एरं कैल्कै।

¹¹ यी दान ख्रीष्ट ही मण्डलीके देल्कै: ऊ कुछु आदमीसिके चुन्ल आर भेज्ल चेला बनैके लिए, कुछु आदमीसिके परमेश्वरके वक्ता बनैके लिए, कुछु आदमीसिके खुश-खबरी सुनाबेवाला बनैके लिए, कुछु आदमीसिके मण्डलीके रेख-देख करेवाला बनैके लिए आर कुछु आदमीसिके शिक्षक बनैके लिए चुनल्कै।

¹² ओकरसिके जिम्मेदारी यी छै कि ऊसब विश्वासीसिके परमेश्वरके काम करैके लिए तैय्यार करै आर ख्रीष्टके शरीर यानिकी मण्डलीके निर्माण करै।

¹³ यी तबतक चल्तै जबतक कि अपनासब आपनसिके विश्वास आर परमेश्वरके बेटाके विषयमे आपन समझमे एक नैभ्याजैछियै। तब अपनासब परिपक्क भ्याजैबै, जेरं ख्रीष्ट छै आर अपनासब पुरा तरहसे ओकरे जुगुर भ्याजैबै।

¹⁴ सेल्याके, आब अपनासिके बच्चासिके जुगुर नै होना चाही। आब अपनासब उटा नावके जुगुर नैहु जकरा लहर आगु पाछु धक्लैछै आर हावा इन्हर-उन्हर घुमाबैछै। एकर मतलब छै कि चलाक आर ठग आदमीसब आब आपन झुट्ठा शिक्षासे अपनासिके धोखा नै दिए सकैछै।

¹⁵ बरु, प्रेमसे सच बोलीके अपनासब हरेक बातमे परिपक्क आर ख्रीष्टके जुगुर भ्याजैयै, जे आपनसिके शरीर यानिकी मण्डलीके शिर छै।

¹⁶ अपनासब जे ख्रीष्टमे विश्वास करैछियै, ओकर शरीरके अंगसिके जुगुर छियै। जेरंके एकटा आदमीके शरीर ओकर सभे जोडनीके द्वारा एक साथ जोड्ल रहैछै, आर जब शरीरके हरेक अंगसब ठीक तरिकासे काम करैछै ते, शरीर बाढैछै आर मजगुत हैछै। ओहिने करिके, जब अपनासिमेसे हरेक आदमीसब ख्रीष्टके देल उटा काम करैछै ते, अपनासब मजगुत हैबै आर परिपक्क हैबै आर एक दोसरसे आरहौ बेसी प्रेम कर्बै।

ख्रीष्टमे नया जीवन

¹⁷ सेल्याके प्रभु हमरा देल अधिकारके साथ हमे तोरासिके यी बताबैछियौ कि जेरं अविश्वासी आदमीसब ओकरसिके बेकारके विचारके साथ आपन रीतिमे चलैछै, आब तुहेंसब फेर एरं जीवन नैजिते र।

¹⁸ कहिनेकी ऊसब सम्झैमे सक्षम नैछै आर ओकरासिमे भेल अज्ञानताके कारण आर ओकरसिके मानैले इन्कार करैके कारण ऊसब उटा नया जीवनसे दूर छै जे परमेश्वर दैछै।

¹⁹ ऊसब आब खराब काम करैके लिए दोषी महसुस नैकरैछै, सेल्याके ऊसब खुदके खराब काम करैके लिए द्या देल्कै छे। ऊसब लगातार सभे किसिमके अनैतिक काम करैछै आर ऊसब यी चीजसिके ललसा करैले कहियो बन्द नैकरैछै।

²⁰ मगर तुहेंसब एरंको व्यवहार करैले ख्रीष्टके शिक्षासे नैसिख्लहैं छे।

²¹ हमरा निश्चय छै कि जब तुहेंसब येशूके विषयमे सुन्लहैं, तब तुहेंसब ओकरसे सच्चा शिक्षासब सिख्लहैं।

²² तोरसिके शिक्षकसब तोरासिके उटा तरिकाके त्यागैके शिक्षा देल्कौ, जकर मुताबिक तुहेंसब व्यवहार कर्ते रहैं आर आपन पापमय व्यवहारके त्याग। तोरसिके खराब इच्छासब तोरासिके धोखा देल्कौ आर तोरसिके जीवनके बर्बाद करि देल्कौ।

²³ आब तुहेंसब परमेश्वरके तोरसिके सोचैके तरिकाके बदलैले देना चाही।

²⁴ परमेश्वर तोरासिके एकटा नया चरित्र देल्कौ छे जे ओकर खुदके चरित्रके जुगुर छै। सेल्याके यी नया चरित्रके मुताबिक व्यवहार कर। सच्कोरे धर्मी आर पवित्र आदमी बन।

पवित्र आत्माके दुखित नैबनाबिहैं

²⁵ सेल्याके झुठ बोलैले छोडिके आपन-आपन विश्वासी भ्या-बहिनसिके संगे सच बोल, कहिनेकी अपनासब सभेको एक्केटा शरीरमे अंगसब छियै।

²⁶ यदि तुहेंसब गोसाबैछैं ते, ध्यान राख कि तोरासिसे पाप नैहौ। सझौवा हुऐसे पहलहै तोरसिके गोस्सा मरौ।

²⁷ आर शैतानके तोरासिके धोखा दियैके मौका नैदहैं।

²⁸ चोरी करेवाला आदमी आब चोरी नैकरक। मगर ऊ मेहनत करक कि ऊ आपन हातसे कैल उपयोगी कामसिके द्वारा जरुरतमे पडल दोसर आदमीसिके भी सहायता करे सकै।

²⁹ तोरसिके मुखसे कोनो खराब बात नैनिक्लौ, बल्की खाली उहे बात बोल जे आदमीसिके उन्नति कराबैके लिए सुहाबेवाला छै, ताकी जे कुछु भी तुहेंसब बोलैछैं उटा बातसब सुनेवाला आदमीसिके आत्मिक रुपसे फैदा दिए सकै।

³⁰ आर परमेश्वरके पवित्र आत्माके आपन जीवन जियैके तरिकासे दुखित नैबना। परमेश्वर तोरासिके पवित्र आत्मा एकटा चिन्हके रुपमे देल्कौ, यी देखाबैके लिए कि तुहें परमेश्वरके छैं। आर एक दिन ऊ तोरासिके पुरा तरहसे उद्धार देतौ।

³¹ सभे प्रकारके तित्तपनके विचार, क्रोध, गोस्सा, झगडा, निन्दा आर सभे किसिमके दुष्ट व्यवहार तुहेंसब त्यागी दहैं।

³² जेरंके परमेश्वर ख्रीष्टमे तोरासिके माफ कैल्कौ, ओहिने करिके एक दोसराके माफ करिके तुहेंसब एक दोसरपर दयालु आर कोमल मनके बन।