एफिसी 1 - केवट नया कारारनमस्कार 1 हमे, पावल यी चिट्ठी लिखैछियै। परमेश्वरके इच्छा रहै कि हमे ख्रीष्ट येशूके एकटा चुन्ल आर भेज्ल चेला बनियै। एफिसस सहरमे रहेवाला तुहें विश्वासीसिके हमे यी चिट्ठी लिखैछियौ। 2 हमे प्रार्थना करैछियौ कि आपनसिके परमेश्वर पिता आर आपनसिके प्रभु येशू ख्रीष्ट तोरासिके अनुग्रह आर शान्ति दौ। ख्रीष्टमे छुटकारा 3 आपनसिके प्रभु येशू ख्रीष्टके पिता परमेश्वरके प्रशंसा है। ख्रीष्टके संगे आपनसिके सम्बन्धके कारण स्वर्गसे आबेवाला आशीर्वादसब द्याके ऊ अपनासिके सभे तरिकासे आत्मिक आशिष देल्कै छे। 4 यानिकी परमेश्वर संसार बनाबैसे पहेला ही अपनासिके ख्रीष्टके कारण आपन प्रजा हुऐके लिए चुनल्कै। ताकी अपनासब ओकर समनामे पवित्र आर दोषरहित हुए सकियै। 5 कहिनेकी परमेश्वर अपनासिके प्रेम कैल्कै, ऊ बहुते पहलहैसे येशू ख्रीष्टके कैल कामके द्वारा अपनासिके आपन सन्तान बनाबैके फैसला कैल्कै रहे। 6 यी कारणसे कि ओकर महिमामय अनुग्रहके प्रशंसा है, जे ऊ आपन प्रिय बेटाके कैल कामके कारण अपनासिके मुफ्तमे देल्कै छे। 7 ख्रीष्टके खून बहैल जैके कारणसे आपनसिके छुटकारा भेलै छे। यानिकी, आपनसिके पाप माफ कैल गेलै छे। परमेश्वरके अनुग्रह बहुते ही महान छै जे ऊ अपनासिके प्रशस्त करिके देल्कै छे। 8 परमेश्वर यी अनुग्रह बहुते ज्ञान आर समझमे अपनासिके बहुते करिके देल्कै छे। 9 परमेश्वर उहे कैल्कै जे ऊ नुक्याके राखल्कै, आर अपनासिके उटा नुकैल योजना प्रकट कैल्कै जे ऊ पहलहैसे ही ख्रीष्टके द्वारा पुरा करैके फैसला कैल्कै रहे। 10 परमेश्वरके तय कैल समयमे, ऊ स्वर्ग आर धर्तीमे भेल सभे चीजसिके एक बनैतै आर ख्रीष्टके ओकरासिपर शासन करैके अधिकार देतै। 11 ख्रीष्टके संगे आपनसिके सम्बन्धके कारण परमेश्वर अपना यहूदी आदमीसिके चुनल्कै ताकी अपनासब ऊ पाबे सकियै जकरा दियैके प्रतिज्ञा परमेश्वर कैल्कै रहे। यी उहे प्रतिज्ञा रहै जे ऊ बहुते पहेला ही करैके योजना बनैल्कै रहे आर ऊ सभे कुछु आपन योजना आर इच्छासे पुरा करैछै। 12 अपना यहूदी आदमीसब पहेला आदमीसब छियै जेसब ख्रीष्टमे आशा राख्लियै आर अपनासिके इहे ल्याके चुन्ल गेलै रहे ताकी अपनासब परमेश्वरके महिमाके प्रशंसा करे सकियै। 13 आर तोरसिके संगे भी इहे भेलौ छे। तुहेंसब सच्चा खुश-खबरी सुन्लहैं छे, जे यी विषयमे बताबैछै कि परमेश्वर तोरासिके केरंके बचाबैछै। आर ख्रीष्टमे तुहेंसब विश्वास करैके कारण, परमेश्वर आपन आदमीसिके दियैके प्रतिज्ञा कैल पवित्र आत्मा तोरासिके देल्कौ छे। तुहेंसब परमेश्वरके छैं कहिके देखाबैके लिए पवित्र आत्मा तोरसिकेलगत एकटा चिन्हके रुपमे छौ। 14 कहिनेकी परमेश्वर अपनासिके पवित्र आत्मा देल्कै छे, अपनासब यी बातमे निश्चित हुए सकैछियै कि परमेश्वर अपनासिके प्रतिज्ञा कैल दोसर बढियाँ चीजसब भी देतै। यी तब हैतै जब परमेश्वर अपनासब जे ओकर छियै, अपनासिके पुरा रुपसे उद्धार देतै ताकी ओकर अपनासब परमेश्वरके महिमाके प्रशंसा करे सकियै। आत्मिक ज्ञानके लिए प्रार्थना 15 यी सभैके कारण जे परमेश्वर कैल्कै छे, जबसे हमे प्रभु येशूपर भेल तोरसिके विश्वास आर सभे विश्वासीसिके प्रति तोरसिके प्रेमके विषयमे सुन्लियौ, 16 तबसे हमे सभे दिन तोरसिके लिए परमेश्वरके धन्यवाद दैछियै, आर आपन प्रार्थनामे तोरासिके याद करैछियौ। 17 हमे प्रार्थना करैछियै कि परमेश्वर, आपनसिके प्रभु येशू ख्रीष्टके महिमामय पिता, तोरासिके आत्मिक ज्ञान आर समझ दौ आर तोरा यी समझैके लिए सहायता करौ कि परमेश्वरके जानैके मतलब कि छै। 18 हमे यी भी प्रार्थना करैछियौ कि ऊ तोरासिके सचके आर उटा आशाके जकर लिए ऊ तोरासिके बोलैल्कौ छे, ओकरा समझैमे तोरसिके सहायता करौ। ताकी तुहेंसब जाने सक्हैं कि उटा आशिषसब कतनें महान आर महिमामय छै जकर प्रतिज्ञा परमेश्वर आपन सन्तसिके संगे कैल्कै छे। 19 हमे चाहैछियै कि तुहेंसब उटा महान आर बडका शक्तिके विषयमे जान्हैं जे परमेश्वरके लगत आपनसिके लिए छै, जेसब ख्रीष्टमे विश्वास करैछै। यी उहे बडका शक्ति छै, 20 जकर इस्तमाल परमेश्वर तब कैल्कै रहे जब ऊ ख्रीष्टके फेरसे जिन्दा बनैल्कै, आर ऊ ख्रीष्टके स्वर्गमे आपन दहिना हातके बगल सम्मानके जगहमे बैठैल्कै। 21 ख्रीष्ट सभे शासनसब, अधिकारसब, शक्तिसब, आर राज्यसिसे उप्पर छै। ओकर पदवी खाली यी युगमे ही नै, मगर आबेवाला युगसिमे भी हरेक शासकसिके पदवीसे उप्पर छै। 22 परमेश्वर सभे चीज ख्रीष्टके अधिकारके अधिनमे करिदेल्कै छे। आर ओकरा मण्डलीके भलाइके लिए हरेक चीजपर सर्वोच्च बनैल्कै छे। 23 अपना विश्वासीसब ख्रीष्टके शरीरके अंगसिके जुगुर छियै। एकरा ख्रीष्टके द्वारा परिपूर्ण आर पुरा बनैल गेलै छे, जे सभे जगहमे सभे चीजसिके आपन उपस्थितिसे भरैछै। |
Kayort (केवट) Bible by The Love Fellowship is licensed under Creative Commons Attribution-ShareAlike 4.0 License.
Beyond Translation