कलस्सी 4 - केवट नया कारार

प्रार्थनाके लिए हौसला

¹ हे मालिकसब, आपन-आपन नोकरसिके संगे न्यायपूर्ण आर एक समान व्यवहार कर। यी सोचिके कि स्वर्गमे तोरसिके भी एकटा मालिक छौ।

² निरन्तर प्रार्थना कर, जब तुहेंसब प्रार्थना करैछैं, निरन्तर सचेत र, आर परमेश्वरके सभे दिन धन्यवाद दहैं।

³ आर एकर साथे-साथ हमरसिके लिए भी प्रार्थना कर कि परमेश्वर हमरासिके ख्रीष्टके सन्देश सुनाबैके लिए एकटा मौका दै कि हमे ख्रीष्टके उटा रहस्यके वर्णन करे सकियै जकर खातिर हमे एखन जेलमे पडल छियै।

⁴ आर प्रार्थना कर कि हमे ख्रीष्टके रहस्यके स्पष्ट रुपसे आर खुलिके घोषणा करे सकियै।

⁵ तुहें विश्वासी छैं कहिके देखाबैके लिए हरेक अवसरके उपयोग बढियाँसे कर आर जे विश्वासी नैछै ओकरसिके संगे बुद्धिमानीसाथ व्यवहार कर।

⁶ नूनसे खाना स्वादिष्ट बनैल जुगुर सभे दिन नम्रतापूर्वक ओकरासिसे बोल, आर एरंको बात क जे चाख लागेवाला छै। यदि तुहें एरं कर्भैं ते, तोरसिके विश्वासके बारेमे तोरा सवाल करेवाला आदमी सभैके तुहेंसब केरंके जबाब दिए पडैछै से बात सिख्भैं।

⁷ हमरसिके प्रिय विश्वासी भ्या तुखिकस हमर सभे बात तोरासिके बतैतौ। ऊ एकटा विश्वासयोग्य सहकर्मी छै आर ऊ हमरसंगे प्रभुके सेवा करैछै।

⁸ हमे ओकरा तोरसिकेलगत यी मकसदसे भेजैछियौ ताकी तोरासिके हमरसिके हालखबर मालुम हौ आर ऊ बात तोरासिके विश्वासमे मजगुत बनाबौ।

⁹ आर तुखिकससंगे ओनेसिमस भी आबैछै, जे तोरसिके सहरके छै आर हमरसिके विश्वासयोग्य आर प्रिय विश्वासी भ्या छै। ऊ तोरासिके एत्करो सभे हालखबर बतैतौ।

¹⁰ अरिस्तार्खस, जे हमरसंगे कैदी छै, तोरासिके नमस्कार भेजल्कौ छे। मर्कूस, जे बरनाबासके दियादि भ्या छै, ऊ भी नमस्कार भेजल्कौ छे। हमरा मालुम छै कि मर्कूसके विषयमे तोरासिके पहलहै बतैल गेलौ छे। यदि ऊ तोरसिकेलगत ऐतौ ते ओकरा बढियाँसे व्यवहार करिहैं।

¹¹ आर येशू जकरा आदमीसब युस्तस कहैछै, तोरासिके नमस्कार भेजल्कौ छे। यहूदी विश्वासीसिके बीचमे खाली यी तीनटा आदमीसब ही परमेश्वरके राज्यके लिए हमर सहकर्मी आर उत्साह भेलै छे।

¹² इपाफ्रास जे तोरसिके सहरसे छै, आर ख्रीष्ट येशूके दास छै, तोरासिके नमस्कार भेजल्कौ छे। आर ऊ सभे दिन तोरसिके लिए लगनशील भ्याके यी प्रार्थना करैछौ कि तुहेंसब परमेश्वरके सभे इच्छामे पूर्ण रुपसे आज्ञाकारी हुऐके कारणसे विश्वस्त हुए सक्हैं।

¹³ हमे ओकर गवाही दैछियै, कि ऊ तोरसिके लिए आर लाउडिकिया सहरके आर हिरापोलिस सहरके आदमीसिके लिए लगनशील भ्याके प्रार्थना कैल्कै छे।

¹⁴ प्रिय बैध लूका आर डेमास भी तोरासिके नमस्कार भेजल्कौ छे।

¹⁵ लाउडिकिया सहरके विश्वासी भ्या-बहिनसिके, आर बहिन नुम्फास आर ओकर घरमे भेल मण्डलीके हमर नमस्कार कहिदिहैं।

¹⁶ तोरसिके बीचमे यी चिट्ठी पढ्ल गेलके बाद लाउडिकिया सहरके मण्डलीमे भी यी चिट्ठी पढैले लगा। आर लाउडिकिया सहरके विश्वासीसिके लिख्ल हमर चिट्ठी भी तुहेंसब पढिहैं।

¹⁷ अर्खिप्पससे कहिहैं कि प्रभुमे जे सेवाके काम ओकरा सौंप्ल गेलै छे, ऊ उटा जरुर पुरा करै।

¹⁸ हमे, पावल, चिट्ठीके यी भाग तोरासिके नमस्कार करैके लिए हमे आपने हातसे लिखैछियौ। याद कर कि हमे जेलमे छियै आर हमर लिए प्रार्थना कर। तोरसिके संगे परमेश्वरके अनुग्रह रहौ। आमेन।