कलस्सी 2 - केवट नया कारार

¹ तुहेंसब यी जान कहिके हमे चाहैछियै कि केरंके तुहेंसब आर लाउडिकिया सहरमे भेलसब आर ऊ सभैके खातिर, जकरा हमे नैदेख्लियै छे, हमे कठिन मेहनत करैछियै।

² हमे कठिन मेहनत करैछियै कहिनेकी हमे तोरासिके सभैके आत्मिक रुपसे उत्साह दियैले चाहैछियै, आर तोरसिके एक दोसरके प्रतिके प्रेम तोरासिके एक बनैतौ। हमे चाहैछियै कि ऊसब पुरा भरोसा राखै कहिनेकी ऊसब परमेश्वरके रहस्यमय योजनाके पुरे बुझ्ल छै, जे ख्रीष्ट आपनहैं छै।

³ परमेश्वरके बारेमे बुद्धि आर ज्ञान नुकैल खजानाके जुगुर छै। एकर विषयमे खाली ख्रीष्टके मालुम छै आर उहे सभे आदमीसिके उटा प्रकट करैछै।

⁴ यी हमे सेल्याके कहैछियौ, कि कोय आदमी तोरासिके झुट्ठा शिक्षामे विश्वास करैके लिए नैबहकाबौ।

⁵ कहिनेकी हमे तोरसिसे दूर भेलपर भी तोरसिके बारेमे सोच्ते रहैछियौ आर तोरसिके ख्रीष्टमे विश्वास, एकता आर जेरंके जिना चाही ओरंके जिल देखिके हमे खुश छियै।

ख्रीष्टमे जीवनके पूर्णता

⁶ सेल्याके जेरंके येशू ख्रीष्टके प्रभु कहिके तुहेंसब विश्वास कैल्हैं, ओहिने करिके ओकरामे एक भ्याके जिल आदमीके जुगुर जीवन बिता।

⁷ जेरंके गहिर जड गाछके थामैछै आर जग घरके मजगुत राखैछै, ओहिने करिके तुहेंसब भी आपन विश्वासमे मजगुत हु आर तोरासिके सिखैल मुताबिक आपन विश्वासमे निरन्तर बढ्ते जो। आर परमेश्वरप्रति बहुते धन्यवादी हु।

⁸ होशियार र, कहीं एरं नैहौ कि कोय भी तोरासिके छल-कपटसे बेकारके तर्क-वितर्कके द्वारा धोखा दौ। निश्चित कर कि तोरासिके कोय भी आपन बातमे विश्वास करैके लिए आपन जालमे नैफसाबौ। एरंको बात ख्रीष्टके मुताबिक नैछै, मगर आदमीके सिखैल शिक्षासे ऐलै छे।

⁹ कहिनेकी जब ख्रीष्ट आदमी बन्लै तखन भी ऊ पुरा तरहसे परमेश्वर रहै।

¹⁰ ऊ सभे प्रधानता आर अधिकारमे सर्वोच्च छै। सेल्याके यदि तुहेंसब ख्रीष्टमे छैं ते, तुहेंसब ओकरामे पुरा छैं।

¹¹ जब तुहेंसब ख्रीष्टमे विश्वास कैल्हैं, तोरसिके खतना शारीरिक तरिकासे नैभेलौ। मगर ख्रीष्टद्वारा तोरसिके खतना भेलौ, यी तोरसिके पापमय स्वभावके काटिके हटैल जुगुर छै।

¹² जब तुहेंसब बप्तिस्मा लेल्हैं, तुहेंसब ख्रीष्टके जुगुर गाड्ल गेल्हैं, आर ख्रीष्टके जुगुर मुर्दासे जिन्दा करैल गेल्हैं। यी इहे ल्याके भेलै कि तुहेंसब यी बातमे विश्वास कैल्हैं कि परमेश्वर, आपन शक्तिद्वारा, ख्रीष्टके मुर्दासे जिन्दा बनैल्कै।

¹³ तुहेंसब पाप करैके कारण आर विधि-विधानके मुताबिक शारीरिक रुपमे खतना नैभेल आदमी हुऐके कारणसे एक समय तुहेंसब आत्मिक रुपसे मर्ल रहैं। मगर परमेश्वर तोरासिके ख्रीष्टके संगे जिन्दा बनैल्कौ आर आपनसिके सभे खराब कामसिके माफ कैल्कै।

¹⁴ यी एरं रहै जेरं कि परमेश्वर आपनसिके पापके हिसाब मेट्या देल्कै रहे, जकरामे आपनसिके विरुद्ध आरोपसब रहै। जब ख्रीष्ट क्रूसमे काँटी ठोकिके मार्ल गेलै, ऊ पुरा रुपसे उटा हिसाबवाला तमसुक रद्द करिदेल्कै।

¹⁵ प्रधानता आर अधिकारसिके क्रूसके द्वारा पराजय करिके ख्रीष्ट ओकरासिके सार्वजनिक रुपसे लज्जित बनैल्कै।

¹⁶ सेल्याके तोरासिके कोय धोखा नैदौ। आर खैमे आर पियैमे या पावनके दिनमे या अम्बसियामे या यहूदी आदमीसिके विश्रामके दिनके मानैके विषयमे कोनो आदमी तोरासिके दोष नैदौ।

¹⁷ कहिनेकी यी सभे विधि-विधान परमेश्वरके द्वारा अपनासिके प्रतिज्ञा कैल बढियाँ बातसिके खाली एकटा छायाके जुगुर छै, मगर वास्तविकता ख्रीष्टमे छै।

^18-19 ख्रीष्ट शरीरके शिर छै, ओकरे लिए ही शरीरके सभे अंगके देखभाल कैल जैछै आर संगहै राख्ल जैछै, एरंके यी परमेश्वरके चहेल मुताबिक बढैछै। अपने आपके अपमान करिके आर स्वर्गदूतसिके आराधना करैले लग्याके कक्रहौ तोरासिके अयोग्य बनाबैले नैदहैं। एरंको आदमीसब दर्शन देखैछै जे ओकरासिके मानव सोचके कारणसे मूर्खपनके घमण्डसे भरैछै। ऊसब ख्रीष्टके छोडी देल्कै छे।

²⁰ कहिनेकी तुहेंसब ख्रीष्टके संगे मर्ल छैं आर संसारके शासकीय आत्मासे आजाद भेल छैं, सेल्याके संसार तोरासिके आरहौ भी वशमे कैल जुगुर कहिने तुहेंसब आरहौ भी यी नियमसब पालन करैछैं?

²¹ कहिने यी नियमसब एरं कहैछै कि, “तोर आपन हातमे यी चीज नैपकड”, “एरं किसिमके खाना नैचाख” आर “एरं किसिमके चीजके हात भी नैलगा?”

²² यीसब नियमसब बेकार छै कहिनेकी यी सभे बात आदमीसिके आज्ञा आर शिक्षाके मुताबिक छै।

²³ यी नियमसब बुद्धिमान तरिका देखाबैके जुगुर छै, जे अपने आपके परमेश्वरमे आराधना करैले मजबूर करैछै, ऊसब झुट्ठा नम्रता देखाबैछै आर आपन शरीरके कठोर व्यवहार करैछै। मगर वास्तवमे यी नियमसब आदमीसिके ओकरसिके खराब इच्छासिके नियन्त्रित करैमे सहायता नैकरैछै।